قلب الرفاعي

الحلقة الخامسة والثلاثون

بعد مرور عدة ايام قارب فيها ادهم على الشفاء فأصبح اقوى قليلا وذلك بعد الالتزام بتعليمات سلمى الصارمة والتي كان ينفذهابكل حب واحترام لتلك القطة الوديعة الهادئة والتي سرعان ما تتحول لنمرة شرسة عند غضبها أما فاطمة فقد اتصلت بهم لتخبرهم بوصول الحفيد الاول الذكري لتلك العائلة (آسر مدحت )ابن نجلاء ففرحوا جميعا بذلك .

.

.

اما سلمى برغم البرود التي كانت تظهره أمام الجميع الا انها كانت تعاني صراعا داخليا قويا فهناك شيء ما يجذبها لادهم بقوة وكأن بينهما رباط قوي يربطهما معا وهناك شيئا اخر يذكرها بما حدث لها من زواجها الاول من طبيب وكيف عانت منه وكادت تفقد حياتها وحياة ابنتها بسببه .

.

.

تخبط .

.

تخبط هو شعور سلمى الداخلي .

اما هدى فلاول مرة في حياتها تشعر بالسعادة لانها تعيش الان مع بابا وماما مثل كل الاطفال لاول مرة في حياتها تجرب شعور الاسرة المتكاملة ...

واما عبد العزيز فكان يشعر بأدهم ويعلم جيدا ان سلمى امتلكت قلبه ومشاعره ولكن ما آلم قلبه هو انه كان يشعر بتخبط سلمى فكر جديا ان يتحدث اليها ولكن على أي اساس سيفاتحها في الموضوع لابد وان ينتظر حتى يأخذ ادهم الخطوة الاولى لعلها تستمع اليه والى قلبها .

.

.

في الصباح دلفت سلمى لادهم مع عبد العزيز فهي لا تدخل غرفته الا مع والدها

سلمى بابتسامة :

_صباح الخير يا دكتور ادهم

ادهم بابتسامة مماثلة :

_صباح الخير يا استاذة

عبد العزيز :

_ازيك دلوقتي يابني

ادهم :

_الحمد لله يا عمي بقيت كويس واقدر ارجع بيتي بقى

سلمى بمكر :

_يااه للدرجة دي مش طايق القعدة مع هدى

هدى بحزن :

_كدة يا بابا عاوز تسيبني ..هو انت معنتش بتحبني

فنظر ادهم لسلمى بعتاب ثم وجه نظره لهدى هاتفا :

_لا ياهدى والله بحبك بس ...

سلمى مقاطعة :

_لو بتحبها تصبر شوية كمان لحد ما نطمن عليك

_واضح انك عارفة ازاي تستغلي نقطة ضعفي كويس قوي

_دي شغلتي ولا نسيت اني محامية يا ادهم

فتوترت وسارعت تهتف بارتباك :

_اسفة قصدي يا دكتور ادهم

_والله ادهم كويسة قوي من غير دكتور ..انا ممكن اغيرها لو تحبي

فضحكت سلمى بخجل وهتفت بمرح :

_يبقى تبطل انت كمان استاذة دي

_يالا علشان تاكل قبل ميعاد العلاج

ادهم بمكر :

_قصدك الحقن

سلمى بضيق :

_مش بحب اسمع الكلمة دي

_انا اسف

سلمى :

_ولا يهمك

_صباح الخير يا مدام سلمى ...اخبارك ايه ياكبير

ادهم بحنق :

_ايه كبير دي يا حازم احنا رجالة عصابات ولا ايه ؟

حازم ضاحكا :

_خلاص ولا يهمك يابرنس

فضحكت سلمى على مرحهما ولكنها توقفت عن الضحك وهي ترى نظرات ادهم الغاضبة فأرادت الخروج ولكن ناداها حازم هاتفا ليثير غضب العاشق :

_استني من فضلك ..انا كنت عاوز اعرفك مواعيد الدوا الجديد

فانتبهت اليه سلمى وهو يخبرها عن الادوية الجديدة حتى انتهى فهتفت :

_اهم حاجة ان مفيش حقن مش كدة

حازم :

_للاسف لا فيه بس نوع تاني اخف شوية

_ليه بقى ما هو اتحسن وبقى كويس

_لازم نقضي على الميكروب بقوة والا هيرجع اقوى من الاول بس متخافيش مش هتوجعه زي الاولى

سلمى بهمس (وصل لادهم ):

_اتمنى

_نعم !!

_لا ابدا ولا حاجة عن اذنكم

_معلش هتقل عليكي شوية كمان ممكن تساعديني

_في ايه بالظبط ؟

حازم بمشاكسة لا يعلم انه سيدفع ثمنها غالي :

_اقنعيه لانه كل مرة يعمل نفسه طفل ولازم نتحايل عليه شوية

سلمى بعدم فهم :

_نعم !! اقنعه بايه ؟

_بالعلاج طبعا

فنظرت سلمى لادهم نظرة فهمها جيد فهمس لنفسه (وديني وما اعبد لهوريك يا حازم )واسرع مدافعا عن نفسه :

_لا انا مش معترض على العلاج انا اعتراضي عليه هو ..ايده ثقيلة قوي

فضحكت سلمى على تذمره الذي يشبه الاطفال كثيرا هاتفة :

_طب والحل

ادهم برجاء :

_اكرم ارحم هاتولي اكرم

_كان على عيني يا حبيبي اكرم عنده حالة طارئة ومقدرش يجي

ادهم بحزن :

_اه يعني مفيش قدامي غيرك

حازم غامزا له :

_مضطر يا برنس ..استاذة سلمى من فضلك جهزيه

ادهم بغضب :

_حازم

_يا عم اهدى دي كلها شكة دبوس

ادهم وقد قارب على التحول ليفتك بحازم :

_انا مش بهزر دلوقتي

فاتجهت سلمى اليه وجلست امامه على الفراش وبتردد واضح امسكت يده فالتفت اليها وهو غاضب ويكاد ينفجر لكنها عندما نظرت لعينيه وجدتها تعود لهدوئها وخضارها الهادئ تاهت فيهما وشعرت كمن يسحبها في دوامة فيهما بل تكاد تقسم انها سمعته يتحدث اليها عن طريقهما سمعتها منه بوضوح اذاب عظامها (بحبك ياسلمى )ولكن الاكثر عجبا انها لم تتوارى عنهما بل قابلت نظراته بنظرات حيرتها وترددها ففهما ولكن رسالته لعينيها ابدا لم تتغير فظلت كما هي تسمعها تتردد من عيناه وتجوب جوانب عقلها (بحبك ياسلمى ) لوهلة شعر ادهم انها تبادله مشاعره بل شعر انها على وشك الاعتراف له حتى انتفض كلاهما على صوت حازم :

_ادددددهم ..خلاص خلصت يابرنس شوفت بقى ايدي طلعت خفيفة اخيرا وما حستش بحاجة والعرق مهربش زي كل مرة

_حازم بطني بتوجعني قوي

حازم بجدية وهو يقترب منه :

_فين وريني كدة ؟

وبمجرد ان اقترب حتى هجم عليه ادهم جاذبا اياه من قبة قميصه ومسددا له عدة لكمات كان يحاول حازم تفاديها وهو يهتف به :

_يعني يوم ما تفوق تستقوى على مخاليق ربنا ..يا عم اوعى

ادهم بغل :

_ده انا هقتلك النهاردة واخلص منك

ونظرا لضعف قوى ادهم الذي لم يستعيدها كاملة استطاع حازم الهرب من تحت يديه وهو يهتف :

_كل ده ليه ها ؟انت بتحبها وواضح جدا كان لازم اثبتلك انها كمان بتحبك عشان تاخد خطوة بقى ..اشمعنى انا يعني اللي اتحبس لوحدي لازم تتحبس زيي

زفر ادهم بضيق وهو يضطجع على الفراش هاتفا :

_مش عارف يا حازم سلمى متعقدة من الدكاترة وممكن ترفض للسبب ده

حازم بجديه :

_اسمع كلامي ومتعلقش نفسك على الفاضي اطلب ايدها وافقت خير وبركة موافقتش خلاص ابعد ومتوجعش قلبك زيادة

ادهم بألم :

_خايف ترفض وتبعدني عن حياتها وعن هدى

حازم وهو يربت على كتفه :

_انا واثق ان ربنا مش هيخذلك وخلي بالك ان الحاج عبد العزيز بيحبك واكيد هيساعدك

ادهم بتردد :

_تفتكر

_ايوة اتوكل على الله وخد خطوة قبل ما حد يسبقك وياخدها منك

شرد ادهم مفكرا قليلا ولم يشعر بحازم الذي تركه وخرج وظل هكذا لبعض الوقت حتى انتبه على عبد العزيز الذي دخل اليه ليطمئن عن احواله

ادهم الذي حسم امره اخيرا :

_عمي انا طالب ايد بنت حضرتك

عبد العزيز بتعجب :

_كدة على طول من غير مقدمات

_انا بقالي هنا فترة كبيرة واظن حضرتك تعرف عني كل حاجة واتعرفت على والدي كمان وانا عارف كل حاجة عن سلمى يبقى ايه المانع

_طيب اصبر لما تخف الاول

_موافقتك هي اللي هتخليني اخف

_ربنا يقدم اللي فيه الخير ..سبني شوية امهد لسلمى واشوف رايها بس خليك فاكر انها لسة متأثرة بالماضي يعني ممكن تخاف

_عارف بس انا اوعد حضرتك انها هتنساه بكل اللي حصل فيه ان شاء الله

_ربنا يقدم اللي فيه الخير ..بالمنسبة احنا كلنا بكرة ان شاء الله هنروح لنجلاء بيتها واكيد انت معانا

_اه ان شاء الله انا بقيت كويس واقدر اسوق

_لا تسوق ايه انت هتيجي معانا

_ياعمي ..

قاطعته هدى وهي تركض له قافزة على الفراش بجواره هاتفة وهي تلهث :

_بابا انا مش عاوزة قول لها لا عشان خاطري

ضمها ادهم لصدره محاولا تهدئتها هاتفا :

_طب اهدي وفهميني في ايه ؟

هدى :

_دادة كريمة عاوزة تديني الدوا اللي طعمه وحش قولها بلاش يابابا

هنا دخلت كريمة هاتفة :

_يا لا يا هدى بلاش دلع

_ايه الدوا ده يا دادة ؟

كريمة :

_ده الفيتامينات اللي حضرتك كاتبهولها يا دكتور

_اه طيب هاتيه وانا هتصرف

هدى وهو تخبء وجهها في صدره :

_ارميه يا بابا طعمه وحش قوي

ادهم بحزن مصطنع :

_طيب خلاص هرميه واروح بيتي طالما انك مش بتسمعي كلامي

هدى بفزع :

_لالالا خلاص هاخده بس بلاش تسيبني تاني

فأعطاها ادهم الجرعة ونظر لوجهها فرأى ملامح الامتعاض تغزو وجهها فضحك على منظرها ثم سارع بدغدغتها لتعلو ضحكاتها عنان السماء بما اثلج قلب عبد العزيز وفكر انها ستكون وسيلة الضغط الرابحة في يده ان ابدت سلمى الرفض

************************************

في تلك الفترة كانت رقية تدور حول افكارها كانت تشعر بالاهانة من جديد فان يعرف الجميع مامرت به قديما شيء يمكن لها ان تتحمله ولكن ما لا يمكن تحمله هي نظرة الشفقة في عيون ابنائها كانت تسأل دوما نفسها لماذا تغيرت ياسمين فجأة واصبحت تقضي معها وقتا اطول ؟

لماذا زاد اهتمام احمد المبالغ فيه بها ؟

طبعا وما سيكون السبب سوى الشفقة على حالها الخادمة .

.

نعم امهم الخادمة

عند تلك الفكرة كانت تحطم كل ما تطاله يدها وهو تصرخ :

_لا مش خدامة ...انا مش خدامة

حاولت جاهدة احتوائها ولكنها كانت تهذي بتلك العبارة مجددا حتى صرخت فيها ياسمين :

_قطع لسان اللي يقول عليكي كدة .

.

انت رقية هانم الرفاعي سيدة المجتمع الراقي .

.

.

زوجة اكبر رجل اعمال في مصر وام لاكبر جراح هنا وفي الوطن العربي كله وام لاكبر دكتور نفسي في مصر وام لمديرة شركات الرفاعي اكبر مجموعة شركات في البلد مين في مستواكي يا ماما محدش.

.

.

انت اعلى وارفع قدرا من كل زميلاتك في النادي كلهم بيحسدوكي على وضعك ونفسهم يكون عندهم نص اللي عندك

هدأت رقية قليلا تنظر لها بدموع هامسة :

_مكنتش عاوزاكم تعرفوا وانزل من نظركوا

ياسمين وهي تسحبها معها للفراش :

_احنا بنتباهى بيكي يا ماما ولينا الفخر والعزة انك امنا وعمرك ابدا ما تنزلي من نظرنا ...طب تعرفي انا حكيت ليوسف على الموضوع كله عارف كان رده ايه ؟

رقية بحزن :

_حتى يوسف عرف

_قالي يابختك يا ياسمين بوالدتك ويا بخت عمي ابراهيم بيها ...الست اللي تتحمل كل ده عشان ولادها وزوجها تبقى جوهرة نادرة مش أي حد يقدر ينولها ابدا ويابخته اللي تكون من نصيبه

رقية بتعجب :

_هو قالك كدة

ياسمين بتاكيد :

_اه والله يا ماما حتى نفسه يقرب منك اكتر وتعتبريه زينا لكن خايف يضايقك فبيحاول يبعد .

.

.

عارفة يا ماما انا بحمد ربنا الف مرة كل يوم على وجود يوسف في حياتي .

.

.

فرق معايا كتير حتى في نظرتي للحياة .

.

.

عارفة انا ليه مصممة انه ميغيرش سكرتيرته عشان .

.

.

.

ثم انتبهت ان والدتها قد غرقت في نوم عميق كانت حرمت منه طوال الايام السابقة فتنهدت بحزن على حالها ودثرتها بالغطاء جيدا ثم خرجت من الغرفة وهي تقسم انها لن تسمح لاحد باهانتها مجددا ولو كان والدها فيكفيها ما فيها وما تحملته زمان .

.

.

*******************************************

اما احمد كان كمن يجلس على صفيح ساخن هو اراد شغلها عن كلام والديه فادعى الضيق والشجار معها لكنه يتمنى لو ترجع لوضعها وتحادثه وتركض وتضحك كما السابق لكنه انتبه لبسمتها وهي شاردة بعيد عنه فعلم حينها سبب ابتسامتها ولم يملك نفسه وانفجر ضاحكا على المشاغب القادم في الطريق هامسا لنفسه (ياجمال ايامك الجاية يا احمد والله اخرتك هتكون زميل لمرضاك في المستشفى على ايد العيلة دي )ثم انتبه لمحاولة مها هي الاخرى التحكم في ضحكها فهتف بضيق مصطنع :

_اضحكي ياختي ما انت وابنك خلتوني كتلة غباء قدام الدكتورة ..انا مش فاهم طفل ده ولا لاعيب كرة

فانفجرت مها ضاحكة هاتفة :

_وليه متقولش انها بنت وهتكون شبهي وهنقطع نفسك جري ورانا احنا الاتنين

احمد مدعيا البكاء :

_يا عيني عليا وعلى بختي هموت بالسكتة القلبية على ايدك انت وعيالك

فتعالت ضحكتها للسماء وشاركها احمد الضحك متمنيا الا تسال عن شيء فيكفيه والدته التي انعزلت عن الجميع في انتظار قراره النهائي

ترى ايهما سيختار احمد ؟

هل ستقبل سلمى ان تعيد التجربة مرة اخرى ؟

مارد فعل رقية على طلب ادهم الزواج من سلمى ؟

السادس والثلاثون من هنا

قراءة رواية قلب الرفاعي الفصل السادس والثلاثون 36 كامل بدون حذف | بقلم لميس عبدالوهاب

تابع أحداث رواية قلب الرفاعي الفصل الخامس والثلاثون 35 كامل بدون حذف لحظة بلحظة في الفصل التالي.

فصول رواية قلب الرفاعي مرتبة كاملة

اقرأ الآن رواية قلب الرفاعي كاملة بجودة عرض واضحة وسريعة.