قلب الرفاعي

الحلقة الثانية والخمسون والاخيرة

بعد مضي عدد كثير من الاعوام جلس ادهم الى طاولة الطعام حتى وجد من انحنت لتقبل راسه هامسة :

_صباح الخير يا بابا يا حبيبي

ادهم باسما :

_صباح الخير يا شقية انت كنت فين امبارح طول النهار انت والواد خالد ابن حازم

هدى :

_كنا بنشتري شوية حاجات عشان الشقة انت عارف معدش حاجة على الفرح

ادهم :

_ ربنا يهنيكي يا حبيبتي لو عوزتي فلوس قوليلي يا هدى

_تسلملي يا حبيبي معايا والله

سلمى الاتية اليهم :

_يا سلام كل الدلع ده لهدى طب وانا يا سي بابا

_انت حبيبة بابا يا لوما

سلوى الاخت التوأم لسلمى :

_وانا يا بابا

_انت روح بابا يا سولي

هدى بمكر :

_جرى ايه يا بابا الدلع ده كله لينا والحاجة اللي وراك دي ايه ؟

فالتفت ادهم هاتفا :

_دي بقى عمري كله اللي جاي واللي راح

سلمى :

_ادهم ..البنات عيب

ادهم بجدية زائفة :

_بنات يالا كله على برا

_يالا يا بنات من هنا خلو بابا يهدى كدة ويروق

_بنت ..عيب

_ايه يا حبيبة قلبي عادي يعني الحاج عاوز يقعد شوية مع المزة بتاعته عادي ولا عاوزاه يبص برا

تعالت ضحكات ادهم هاتفا :

_قوليلها يا هدى

سلمى بغضب :

_والله بقى ساعدتك عاوز تبص برا ؟

سلوى :

_بس يابت ياهدى ما يقدرش يا ماما دا انت الحتة اللي في الشمال

_والله عال البنات بقوا معلمين يا دكتور

ادهم ضاحكا :

_دكتور ايه بقى ..لما بناتي يبقوا معلمين ابقى انا اكيد رئيس عصابة طبعا

سلمى (الصغيرة ):

_عيب يا جماعة كدة وبعدين سيبوا الحاج شوية حرام انتم مزنقين عليه ليل نهار يابنات

_كدة انت كمان يا سلمى طب والله لاعيد تربيتكم تاني يا جزم

وهمت ان تقوم فصرخ الثلاثة وهن يتجهن للاختباء خلف ادهم وهتفت سلمى (الصغيرة ):

_الحقنا يابابا

_دا احنا بناتك بردو

_اتصرف يا حاج هناخد علقة هنتبعتر فيها يا حاج عيب

فاسرع ادهم لسلمى التي قامت فعلا لبناتها وامسكها من خصرها حاكما ذراعيه حولها هاتفا :

_اخرجوا يا بنات بسرعة قبل ما اسيبها

_سيبني يا ادهم البنات دول محتاجين اعادة تربية

_يا ماما بنهزر والله

_بتهزروا ..طب وانا بهزر معاكم كمان بس بطريقتي ...بقولك سيبني يا ادهم

_طب خلاص حقك علينا بقى

_قلبك ابيض بقى يا ماما

_خلاص بقى يا سلمى حقك عليا

سلمى بعند :

_لا يمكن بقولك سيبني عليهم

_بقول ايه انتم تخرجوا احسن يالا لحسن خلاص هسيبها

فخرج الثلاث فتيات ضاحكات الكبرى متجه لعملها والاخريات لجامعتهما والتفت ادهم لسلمى هاتفا بعبث :

_ما تيجي على الاوضة عاوزك في موضوع

_عيب يا ادهم مش كفاية دلعك في البنات

ادهم بحنق :

_هو ايه اللي عيب ؟

_احنا كبرنا على الكلام ده يا دكتور

ادهم بغيظ :

_اه كبرنا لا عندك حق تصدقي

ثم انحنى لاسفل حاملها على كتفه في حركة خاطفة وهو يهتف :

_انا هوريكي يابنت عبد العزيز مين ده اللي كبر ...ياقوي

ثم اتجه بها لغرفتهما متجاهلا تماما هتافها من خلفه ان ينزلها فورا وفي غرفتهما استطاع ان يخبرها بحق بمدى كبرهما فعلا

**************************

في مكان اخر وعلى طاولة الافطار ايضا هتف ادهم :

_بابا لو سمحت انا عاوز اخطب سلمى بنت عمو ادهم

احمد بسعادة :

_يا سلام ده يوم المنى يا ادهم خلاص النهاردة هكلمهولك

_بجد يا بابا

مها :

_بجد يا حبيبي سلمى متربية ومؤدبة وكفاية انها بنت ادهم وسلمى

احمد ضاحكا :

_حلوة دي

_مالك في ايه ؟

احمد :

_الواد ابنك هيعيد قصة حب ادهم وسلمى

سها :

_انا عاوزة اعرفها يا بابا

_عيب يا سها لما تكبري

_يا ماما انا في اولى جامعة يعني مش صغيرة

_هي فعلا مش صغيرة يا مها ..سها بقت عروسة وبيجيلها العرسان

_عرسان ايه ؟

_يوسف كلمني امبارح عاوزها لعبد الرحمن ابنه

_وانت رايك ايه ؟

_انا عن نفسي موافق جدا ...الولد محترم وراجل زي ابوه بالظبط بس المهم راي سها

سها بخجل :

_اللي تشوفه يا بابا

_خلاص على بركة الله ...انا هكلم ادهم ولو وافق هنعمل الخطوبتين سوا

مها ضاحكة :

_قصدك الثلاثة سوا

_ليه مين الثالث ؟

_انت ناسي ان اسر ابن مدحت ونجلاء طلب ايد سلوى بنت ادهم توأم سلمى

_بابا وماما هيفرحوا جدا لما يرجعوا من الحج ويعرفوا الاخبار الحلوة دي

_ربنا يرجعهم بالسلامة ياارب

***********************************

بعد عدة اسابيع عاد ابراهيم ورقية وفاطمة وعبد العزيز من الاراضي المقدسة وتمت حفلة الخطوبةالثلاثية (ادهم احمد +سلمى ادهم ) ( عبد الرحمن يوسف +سها احمد ) (اسر مدحت +سلوى ادهم ) وفيها اجتمع الاخوة والاصدقاء لتذكر ذكرياتهم الجميلة فهتف احمد :

_مش بيفكرك اليوم ده بحاجة يا ادهم ؟

_وهو ده يوم يتنسى

يوسف :

_اه والله اجمل يوم في حياتنا كلنا

مدحت :

_ربنا يحلي ايام ولادنا يارب ويهنيهم

حازم :

_بقول ايه الواد خالد عاوز يتجوز بقى يا سي ادهم ما تحن عليه يا جدع

_ماشي ياعم وماله دا انا بحلم باليوم اللي هفرح بيه بهدى بنتي الكبيرة

_الايام جرت بسرعة قوي يا جماعة الولاد كبرونا ولاد الايه انا فاكر هدى دي وهو بتخبطني في رجلي عشان تدافع عنك يا ادهم فاكر

_اه قصدك يوم ما سلمى ...

حازم مقاطعا :

_خلاص ياعم انت هتسيح ولا ايه

_اه طبعا عشان تعرف بس ان بنات ادهم الرفاعي مش أي بنات

_ليه يعني هما طالعين ليكي ولا لادهم ؟

_لينا احنا الاتنين بس خلي بالك لما بيقلبوا

_ياساتر يارب عارف النمور يا حازم تبقى قطط وديعة جنبهم

_سلام قولا من رب رحيم يا خالد ...تعالى يا خالد انا هشوفلك عروسة تانية انا مش مستغني عنك يابني

هدى بثقة :

_ميقدرش ياعمي اللي يقع في حب بنات الرفاعي ميقدرش يبعد تاني ولا ايه ياخالد

خالد :

_حصل يا حبيبتي وعلى يدي

فتعالت ضحكات الجميع ...

*************************

بعد عدة اشهر خاطفة دخلت سلمى لمنزلها مرهقة هي وادهم فجلست لاقرب مقعد هاتفة :

_اخيرا يا ادهم البنات اتجوزوا

_الحمد لله يا حبيبتي ادينا رسالتنا واطمنا على بناتنا

_نفسي اطمن على هدى خايفة عليها قوي

_ليه بس ما هي الحمد لله كويسة مع خالد

_حملها تعبها قوي

_يا ستي ان شاء الله خير وبعدين ما خالد معاها ومتنسيش انه دكتور بردو

_لا بس بحسه كدة ضعيف مش مسيطر كدة زيك

_ههههه حلوة مسيطر دي

_انا بتكلم بجد انا فاكرة اد ايه كنت بتتالم على المي واحنا في السعودية ومع ذلك كنت بتظهر قدامي انك مسيطر بقوة على كل شيء حتى ضعفي وانهياري

_انا كنت بموت في اللحظة الواحدة ميت مرة وانا شايف انهيارك وضعفك ده

_الحمد لله ان ربنا رزقني بيك يا حبيبي

ادهم مقبلا يدها :

_ربنا يحفظك ليا يا حبيبتي انا وهدى والتوأم سلمى وسلوى ..كلنا من غيرك ولا حاجة ياعمري

سلمى بخجل :

_بحبك و...

قاطعها رنين هاتف ادهم فنظر له ثم هتف ضاحكا :

_شوفتي جبنا في سيرة القط جه ينط

_السلام عليكم ايه يا خالود لحقت اوحشك

_عمي هدى تعبانة قوي وانا مش عارف اتصرف

_ايه ؟مالها هدى طب خدها على المستشفى وانا هحصلكم على هناك

_احنا في المستشفى بس الولادة متعسرة وهي منهارة وعاوزاك

_اهدى يا خالد احنا في الطريق مسافة السكة

_في ايه هدى مالها ؟

_يالا ياسلمى باين هتبقي تيتة الليلة

هدى بتولد !!

_ايوة يالا بينا

وانطلق ادهم وسلمى الى المستشفى وهناك وجدوا خالد يقف يبكي خارج غرفة العمليات فهتفت سلمى :

_بنتي فين ؟هدى فين يا خالد

_في العمليات يا طنط

_وانت مش معاها ليه انت مش دكتور

خالد بانهيار :

_مش قادر اشوفها بتتعذب كدة مش قادر

ادهم وهو يجذبه بقوة :

_استرجل يا خالد واجمد هي دلوقتي محتاجاك قوي تقدر تعتمد عليك عشان متنهرش هي كمان ...اتفضل قدامي

_على فين ياعمي ؟

_على العمليات يا دكتور

_لا لا مش هقدر هفقد اعصابي

سلمى بياس :

_سيبه يا ادهم وادخلها انت ابوس ايدك هي بتحبك وهتستمد منك قوتها

نظر ادهم لخالد باشمئزاز ثم تركه واندفع لغرفة العمليات وفي الداخل هتف :

_ايه الوضع يا نجلاء ؟

نجلاء :

_الولادة متعسرة لازم تولد قيصري

_بس هدى بتتعب من البنج

_هديها بنج نصفي

_بس ده مؤلم مش هتتحمل

_ده بقى دورك مش هتسمع الا ليك انت

اتجه ادهم نحو هدى التي كانت مسطحة على سرير العمليات تئن من الالم بعد ان فقدت صوتها من كثرة صراخها فهتف ادهم :

_هدى حبيبتي اجمدي هانت كلها شوية وهتبقي ماما

هدى بالم :

_مش قادرة يا بابا انا بموت ااااه

_استحملي شوية عشان خاطري بصي ياهدى شكل الولادة كدة محتاجة جراحة ولازم بنج

_هتألم مش كدة

_حبيبتي انا معاكي مش هسيبك بس ساعديني

ولحقت بهم نجلاء واكرم واثنتين من الممرضات ليساعدوها لتجلس فهذا الوضع يحتاج لبنج نصفي (أي حقنة المخدر تؤخذ في الظهر )

_بابا هما هيعملوا فيا ايه

_هدى خليكي معايا بوصيلي يا هدى كلها شوية صغيرة وان شاء الله البيبي هيجي للدنيا استحملي

كشفت احدى الممرضات ظهرها وتم تعقيمه ففوجئ بها الجميع تصرخ :

_استنوا بابا خدني في حضنك يا بابا عشان لو مت اموت زي ما عشت طول عمري في حضنك

ضمها ادهم والدموع تلمع في مقلتيه هاتفا :

_لا يا هدى ..ان شاء الله كل شيء هيعدي على خير استحملي ياعمري هانت

وتم حقنها بالمخدر لتطلق صرخات متتالية من الالم وهي تتعلق به اكثر وتدفن وجهها في صدره لتعمق تلك الصرخات داخل قلبه وما ان انتهى اكرم حتى اعادوها لوضعها وظل ادهم بجانبها يتحدث اليها حتى انتهت نجلاء من الجراحة واخرجت طفل جميل للدنيا وسرعان ما غابت هدى عن الوعي فجن جنون ادهم داخل غرفة العمليات لقد نزفت كثيرا وحاولوا اسعافها بشتى الطرق ولكنهم لم يستطيعوا ففقدوا الامل ولكنه لم يفقده .

.

انها ابنته .

.

.

اول فرحته حاول معها كثير بل لقد عمد الى نقل دماء لها من دمائه هو .

.

ظل يحاول ويحاول ومعه نجلاء حتى عادت للحياة مجرد ان سار دمه في عروقها فتنهد بارتياح وهو يقبلها على راسها هاتفا :

_مش هتروحي مني ..انت بنتي انا وحته مني انا ومش هسيبك تضيعي مني

ونقلت هدى لغرفة عادية مع وليدها وخرج ادهم من غرفة العمليات وهو متعب يكاد يسقط ارضا من شدة ارهاقه فجلس لاقرب مقعد واندفعت اليه سلمى تبكي بحرقة وهي تحتضن وجهه بين يديها لتقبل راسه ثم ضمته لحضنها هاتفة :

_كنت عارفة ان بنتي بخير طول ما انت معاها ياابو هدى

ادهم بدهشة :

_ابو هدى !!اول مرة يا سلمى تقوليلي كدة

_في الاول كنت ابوها اللي مربيها لكن دلوقتي هدى حتة منك يا ادهم ودمك بيجري في عروقها

_طب سيبك من كل ده ويالا عشان نطمن عليها يا تيتة

سلمى ضاحكة من بين دموعها :

_حاضر يا جدو

ودخلوا غرفة هدى التي كانت مازالت نائمة وبجانبها خالد وحازم واماني زوجته وبجانب السرير كان يقبع الصغير في سريره الخاص به

_هي لسة ما فاقتش

_لا لسة انا متشكر قوي لحضرتك يا عمو على اللي عملته مع هدى

فنظر له ادهم بغضب ولم يرد فتدارك حازم الموقف هاتفا :

_ايه يا خالد عيب كدة انت بتشكر ادهم انه انقذ بنته ..انت عبيط يابني

اماني بعجرفة :

_ليه يا حازم عادي يعني ماهو مش باباها الحقيقي يعني

سلمى بحدة :

_لا باباها يا اماني وهدى ملهاش اب غير ادهم

_يا جماعة صلوا على النبي احنا جايين نطمن على البنت ونشوف العسل ده اللي خلانا جدود ولا ايه يا ادهم

_عندك حق يا حازم فعلا بقينا جدود وكبرنا

اماني :

_لا معلش يا دكتور ادهم المولود يبقى حفيد حازم من صلبه لكن اسفة يعني ...

هدى مقاطعة بتعب :

_وحفيد بابا ادهم يا طنط

فالتفت الجميع لها واتجه اهم لها ليقبل جبهتها هاتفا :

_حمد الله على سلامتك يا هدهد والله وعشت وشوفت اليوم اللي بقيتي فيه ام يا شقية

هدى بضحك :

_وانت جد يا سي بابا

سلمى وهي تقبلها :

_حمد الله على سلامتك ياعمري

_الله يسلمك يا ماما

_حمد الله على السلامة يا هدى

_الله يسلمك ياعمي

_ قولي يا خالد هتسمي المولود ايه انا بقول نسميه ...

هدى مقاطعة :

_ادهم

فنظرت لها اماني بغضب وسط دهشة الجميع حتى خالد الذي لم يعلم بذلك من قبل فهتفت اماني بغيظ :

_ياسلام واشمعنى ادهم يعني وليه ميكونش حازم

_معلش يا طنط واعذرني يا خالد بس انا كنت حالفة بيني وبين نفسي اول مولود ليا ولد هيكون ادهم على اسم بابا

_مش للدرجة دي يعني ياهدى ما هو خالد بردو ابوه ومن حقه يسميه

_وماله اسم ادهم يعني يا اماني وحش ولا مش عجبك

_ايه يا جماعة اهدوا شوية خلاص حصل خير احنا نشوف اسم تاني

هدى بحزم :

_انا ابني ادهم ومش هيتغير يا خالد

_خلاص يا حبيبتي خلاص يا خالد اسم ادهم حلو بردو

_مفيش داعي لكدة يا هدى سميه اسم تاني يابنتي

هدى بدموع :

_لا والله ابني ما هيكون غير ادهم يمكن ربنا يكرمه وياخد جزء من اخلاقك يابابا ..انا عشت عمري كله بتعلم منك ونفسي ابني يبقى زيك في اخلاقك النادرة دي

ادهم وهو يحتضنها بقوة :

_ربنا يباركلك فيه يابنتي ويسعده ويجعله ذرية صالحة ليكي ولابوه

وحمله ادهم بين يديه دامع العينين هامسا :

_تعالى يا سي ادهم انت بقى اللي كبرتني وخلتني جدو اوام كدة ...ماشي ياعم وانا بقى مش هسيبك ابدا ماشي ياهدي

هدى وهي تمسح دموعها :

_وانا وابني ملكك يابابا

فخرجت اماني من الغرفة غاضبة متوعدة في حين اطلق حازم عدد من المشاحنات المرحة مع ادهم ليفك جو التوتر السائد في الغرفة في حين كان خالد ذات الشخصية السلبية صامتا كالعادة

ولذلك فلقد تربي ادهم تحت يد ادهم الرفاعي وتعلم منه وجاء ادهم اخر في عالم جديد واشخاص جديدة وزمان جديد باحداث جديدة ولكنه نفس الشخصية المسؤلة ذات الاخلاق النادرة بكل المقاييس وليكن شخص نادر الوجود كجده ادهم ابراهيم الرفاعي والذي كان بحق قلب وعقل عائلة الرفاعي (قلب الرفاعي )

انتظروني في الجزء الثاني باذن الله

قراءة رواية إغواء قلب كاملة جميع الفصول | بقلم ميرا كريم

تابع المغامرة في رواية قلب الرفاعي الفصل الثاني والخمسون والاخير 52 كامل بدون حذف من خلال الفصل التالي.

رواية قلب الرفاعي من الفصل الأول حتى الأخير

يمكنك قراءة رواية قلب الرفاعي كاملة بدون حذف أو اختصار، جميع الفصول مرتبة وسهلة التصفح في صفحة واحدة.