عمر: استأذن انا

ـ مين الشاب الحلو اللي جه هنا دا؟

ـ معرفش، بس وهو طالع عدى على بيت بيان

ـ عجايب، تلاقيه واحد من اللي كانت بتروحلهم

ـ ااه، عشان هو شكله غريب، ونضيف كدا

ـ انا مش عارفه ايه البجاحه دي، ليهم عين ازاي يرجعوا هنا، المفروض نمشيهم من البلد كلها

ـ لو البلد فيها رجاله كانوا وقفولهم ومنعوهم يرجعوا، ااه ياختي، يفتحوا عين بناتنا على قلة الادب

ـــــــــــــــــــــــــــــــــــــــــــــــــــــــــــ

ـ كنت فين؟

عمر وهو طالع ع السلم: بعزي

مامته: بتعزي؟، في مين

عمر: بابا بيان

مامته: نعم ياخويا؟

عمر: اللي سمعتيه

مامته: تعالى هنا كلمني، انت مجنون، ازاي تروح هناك، وبعدين ليه عملت كدا في اخوك، انت ازاي عديم الدم كدا

عمر: انا برضو اللي عديم الدم؟

مامته: عمر

عمر: لو سمحتي، انا تعبان وعايز ارتاح

المنياوي: ومين قالك انك هتقعد في البيت بعد اللي عملته

عمر: يعني ايه

المنياوي: يعني اتفضل شوف مكان تقعد فيه، بعد اللي حصل دا انت متستاهلش تشيل اسمي

عمر: انت بتقولي انا الكلام دا؟، انا اللي روحت اعتديت ع البنت وخضيتها وفتحت في وشها مطو*اه؟، انا اللي بعمل مصايب؟

دا بدل ماتروح تربي ابنك؟

المنياوي: اابني دا يبقى اخوك، ولسه عيل صغير، طايش، مش فاهم حاجه

عمر: فهمه، دورك انك تفهمه

المنياوي: ملكش دعوه، واتفضل اطلع بره

مامته: لا لا خلاص، اطلع اوضتك يعمر

عمر: لا همشي

مامته: لا يبني بالله عليك، اطلع يحبيبي اوضتك

عمر: لا، انا اصلا مش عايز اقعد معاكوا، كلها يومين وهسافر، عن اذنكوا

سابهم وخرج راح شقته اللي كان جايبها يقعد فيها بعيد عن اهله، فتح الباب ودخل ياخد دش وهو سرحان

بيان قاعده ع الارض تحت الدش والمايه نازله عليها ودموعها مبتقفش

مامتها من ورا الباب: بيان، انا عارفه ان الموضوع صعب عليكي، حقك عليا يبنتي، عرفتي ليه كنت رافضه تسافري لوحدك؟

، مش عشان انتي مش مصدر ثقه، لا، عشان احنا عايشين في غابه يابنتي، القوي بيدوس ع الضعيف، معلش يبنتي، اختبار من ربنا، والحمدلله كفايه انك قدام ربنا بريئه

بيان بعياط: مشوفتيش الناس كانت بتبصلي ازاي؟، كانوا بيتفوا ع الارض يماما، انا مش هعرف اعيش وسط الناس دول

مامتها: هنمشي يبنتي، هنمشي

بيان لفت نفسها وخرجت

بيان: نمشي!، نمشي نروح فين!

مامتها: هنسيب البلد واهو بدل ماتقعدي في سكن، نجيب شقه ونقعد فيها وامرنا لله

بيان بشك: ماما، انتي كنتي اخر حد ممكن يسيب بلده ويمشي، حصل حاجه؟

مامتها: مش هيسيبونا في حالنا، واحنا ولايه معناش راجل يقفلهم، نبعد عن الناس دي احسن، بس انتي الاول هترجعي جامعتك، وبعدها انا هحصلك لحد ماظبط امور الشقه وابيع البيت دا، ولما نستقر ابقى انقلك في جامعه تانيه

اثناء المقابله

ـ بس كلنا اتفاجئنا ان البنت دي خرجت

المنياوي: ااه انا قولت خلاص كفايه يعني هي ف الاخر بنت، وعرفت اقنع ابني يتنازل عن حقه وربنا يعوضنا خير ان شاء الله

ـ حضرتك هل القرار دا صدر من حضرتك مباشرة ولا في حد اتدخل؟

المنياوي: والله هي والدتها جت واعتذرت، لان طبعا والد البنت دي مات، فضلت تعتذر كتير جدا وكمان نزلت تبوس رجلي انا وكرم والمدام عشان نتنازل، كان بوّدي اخليها عبره لكل البنات اللي زيها، بس نعمل ايه بقاا في قلبي الطيب دا

عمر قفل التليفزيون وخبط الريموت ف الارض

عمر في نفسه: انتوا ازاي كدا بجد، بقيت اخجل اني من العيله دي

ــــــــــــــــــــــــــــــــــــــــــــــــ

عدى اسبوع وكل واحد ملهي في حاله، كرم خرج من المستشفى، وبيان يادوب ماشيه من البلد

بيان: انا ماشيه يماما

مامتها: يبنتي هو مينفعش متروحيش؟، قلبي مش مطاوعني ارميكي عند الناس دي تاني، وفي نفس الوقت مقدرش اقعدك من جامعتك، وقتها هيقولوا قعدتها ليه الا لو هي فعلا عملت كدا

بيان: متخافيش يماما، هنخسر ايه اكتر من اللي خسرناه

مامتها: خلي بالك من نفسك يابنتي، ولو حصل اي حاجه تبلغيني فورا

بيان: حاضر يماما

ودعت مامتها وتقى ومشت

بس مش هتنسى ابدا نظرات الناس ليها وهي ماشيه في الشارع

كل نظره كانت بتتغرز في قلبها وتطعن فيها

لبست وراحت الكليه

دخلت من باب الجامعه وكل الموجودين باصين عليها وهي ماشيه باصه قدامها ومش بتبص لحد بس من جواها موجوعه على الموقف اللي هي فيه

المحاضره ابتدت ولكن الدكتور اتأخر

فضلت نايمه ومخبيه وشها لحد مالدكتور يدخل

رفعت راسها لما سمعت صوت الدكتور، بس لما بصتله ملقتش الدكتور المعتاد، لقته...

بيان في نفسها: عمر!!!

بصت حواليها لقت كل البنات عمالين يبصوا لبعض ويبصوله بنظرات غزل ويتكلموا مع بعض

عمر: صباح الخير، انا اللي هدرسلكوا مادة *****، بدل دكتور محروس

في اي اسئله قبل ما نبدأ

واحده من البنات رفعت ايديها

عمر: اتفضلي

البنت: هو حضرتك مش اخو كرم برضو؟ اللي كنت مسافر

عمر: ااه، بس اي مناسبة السؤال

البنت: لا عادي بسأل

خلصت جملتها وبصت ع بيان بنظرات شماته، عمر شافها بس سكت

عمر: ياريت نركز في المحاضره

ــــــــــــــــــــــــــــــــــــــــــــ

احمد: ولاا يكرم، اخوك ايه اللي جابه هنا

كرم: هنا فين

احمد: شوفته الصبح داخل المدرج

كرم: جاي يعمل ايه دا

محمود: يبني الجامعه كلها مبتتكلمش غير عليه، البنات مش بيعملوا حاجه غير انهم جايبين في سيرته

كرم: معنديش فكره، هو المفروض سافر اصلا

محمود: لا ياخويا، البت هند قالتلي انه الدكتور الجديد، يعني مسافرش ولا حاجه

كرم: الدكتور الجديد؟؟؟؟، يانهار مش فايت

احمد: ليه في اي

كرم: دا هيطلعه على عنينا

بيان كانت قاعده لوحدها وباصه في الارض، عشان تتفادى نظرات اللي حواليها بس برضو مسلمتش منهم

ـ ايه دا، بيان بنفسها هنا؟،

ـ داحنا قولنا مش هنشوفك تاني هنا

بيان بصتلهم ومردتش

ـ بس قوليلنا، انتي خرجتي ازاي، احنا قولنا مش هتعرفي تفلتي بعملتك

ـ ااه، هو صحيح مامتك راحت اتحايلت ع المنياوي بااشا عشان يتنازل؟

ـ اكيد باست ع رجله عشان يوافق يعمل كدا

بيان بعصبيه: اخرسي، رجل مين يامنحطه منك ليها، انا خرجت عشان انا بريئه

ـ بريئه مين ياماما، وبعدين احنا مالنا، هو اللى قال ان مامتك اتحايلت عليهم لما ابوكي مات، ونزلت باست ع رجلهم عشان يتنازلوا

بيان: كدابين، كلهم كدابين، غوري انتي وهي

سابتهم ومشت بس ابتدت تسمع كلام بيتلقح عليها من كل ناحيه

ـ الا قوليلي يابسمه، الشقق اخبارها ايه

ضحكوا هما الاتنين، وبيان لفت وشها وناولتها بالقلم

ـ انتي بتضربي مين يابتاعه انتي

بيان: وهقطع لسانك كمان

ـ تقطعي لسان مين ياختي، هو حد فينا ضربك على ايدك وقالك روحي شقق شباب؟؟، بدل ماتعملي علينا الشريفه العفيفه، روحي لمي نفسك الاول

قالت كلامها بصوت عالي قدامهم والكل بيتفرج، بيان دموعها كانت هتخونها وهتنزل لولا الصحافه اللي لقوهم دخلوا الجامعه

هند: هي الفضيحه مخلصتش ولا ايه، الصحافه جايين وراكي لحد هنا

ظهر عمر من وراهم وجه وقف قدام الكل

وقف ونادى على كرم بصوت عالي

عمر: كرم، تعالى هنا

جه كرم وهو حاسس ان اللي هيحصل مش ولا بُد..

كرم: خير

عمر جمع كل قوته وناوله قلم على وشه صوته دَوى في المكان و وقعه ع الارض قدام الكل

صدرت شهقه من كل الموجودين من اللي حصل

كرم رفع وشه من ع الارض وهو بيبص على عمر وعينيه كلها غل..

وعمر نقل عينيه من على كرم وبص لبيان اللي كانت هي كمان بصاله...

يُتبَع....

رجع بص لكرم اللي قام من ع الارض وقف قدامه

عمر بصوت عالي: اسمعوني كلكوا وركزوا معايا كويس، الكائن دا يبقى اخويا، وانا اكتر حد عارف اخلاقه كويس، وانتوا عارفين وشوفتوا بعينيكوا كل اللي حصل، ومع ذلك في منكوا اللي شهد زور، وفي اللي اكتفى بالصمت، كان شايف الظلم ومع ذلك فضل ساكت.

.

يمكن انتوا حسيتوا بالخوف والضعف قدام المنياوي ومكانة المنياوي، لكن انا مش بخاف، وهقول اللي انتوا خوفتوا تقولوه

بص للكاميرا وابتدا يتكلم بعصبيه

عمر: كل اللي اتكتب في الاخبار كدب، وكل اللي شهد كان بيشهد زور، الحقيقه هي، ان اخويا المبجل، وانا اخجل كل الخجل انه اخويا، حاول الاعتداء على البنت دي " شاور ب ايده على بيان".

.

.

حاول يتعرف عليها بالعافيه، وعشان هي بنت ناس ومتربيه ونفسها عزيزه، ضربته بدل القلم اتنين، خلته عبره لكل اللي زيه، بس اخويا تقدروا تقولوا ان كرامته نقحت عليه شويه، طلع يجري وراها وحاول يعتدي عليها في نص الشارع وفي وضح النهار وقدام كل الناس، ومكتفاش بكدا، بل طلع مطو*اه وطلع يجري وراها، وفي اللحظه دي العربيه كانت له بالمرصاد، ومعنديش فكره بصراحه ازاي جامعه محترمه زي دي تدخل حد معاه سلاح، ولكن هنشوف الموضوع دا بعدين، المهم دلوقتي ان المنياوي بيه، رجل الاعمال المشهور، اللي الكل بيعمله حساب، خاف على نفسه وعلى شكله قدام الناس، وقال مفهاش حاجه لما نشوه سمعة بنت بريئه ونضيع مستقبلها ونقول ان هي اللي حاولت تقتله، عشان الشكل العام قدام الناس وكدا، خاصة ان المنياوي بيه في فترة انتخابات دلوقتي، وطبعا حاجه زي كدا كفيله انها تخليه يخسر، بس هو الخساره عنده اصعب من انه يشهد زور ويتبلى على الناس، ليه بنت بريئه زي دي يتقال عليها كلام زي دا، وخليني اقول ان المقابله بتاع والدي المنياوي بيه، كانت كدب كلها، والدتها معملتش اي حاجه، ولا اتحايلت على حد، انا اللي اجبرت اخويا انه يقول الحقيقه، وطبعا لان اخلاقه منعدمه، عرفت اساومه بمصيبه عملها قبل كدا، وهي انه حرق المصنع بكل اللي فيه، حرق المصنع وتسبب بضرر كبير للعمال، ولكن للاسف مش معايا دليل لحد دلوقتى يثبت دا، غير اني سمعته بنفسي،

ودلوقتي زي مانهشتوا في لحم البنت دي، الكل مُدان باعتذار ليها،

واعتقد اللي حصل دا ميرضيش ربنا

كرم كان باصصله وبيتنفس بغضب لما افشى سره قدام الكل

عمر: وطبعا انتوا هتقولوا في ايه في ايدينا نعمله، انا هقولكوا، زي ماقولت دلوقتي ان والدي في فترة انتخابات، والمنصب دا مهم جدا بالنسباله، وعشان كدا تقدروا وبكل بساطه محدش ينتخبه، انتخبوا واحد غيره، واحد مش بيستخدم سلطته ومكانته في انه يإذي الناس ويطعن في شرفهم، وبكدا نكون قدرنا نرد ولو جزء بسيط من حق البنت دي، خاصة بعد ما والدها توفاه الله بعد معرفة الخبر دا، يعني والدها مات من الحسره ومن هول الصدمه والظلم، اي انسان هيروح يختار الراجل دا وينتخبه يبقى بيشارك في الجريمه دي وفي جرايم تانيه كتير جدا لسه هتحصل

ودلوقتي... كرم، تعالى هنا

عمر: زي الشاطر كدا، هتقول كل حاجه حصلت اليوم دا، والفكره كانت فكرة مين، ومين شهد زور معاك

المنياوي بغضب: شايفه ابنك؟، شايفه ابنك بيعمل ايه؟؟، يادي الفضيحه، يادي المصيبه

مراته: اهدى بس شويه

المنياوي: اهدى ايه وزفت ايه، ابنك فضحنا، الانتخابات راحت من ايدي بسبب الحيوان دا، معملش اعتبار لحد، اعترف على اخوه اللي من لحمه وفضحه عشان بنت متسواش

مراته: بقولك ايه، هو كرم ممكن يجراله حاجه بعد اللي حصل دا؟

المنياوي: طبعا، هتبقى قضية رأي عام، ولو حصل هوجه ضدنا والناس كلها وقفت مع البنت دي، لازم يتحاسبوا ارضاءا للناس والرأي العام، مش بقولك مصيبه

مراته: يلهوي،طب والعمل، نسفره، نخليه يسافر بره وميرجعش هنا تاني

ـــــــــــــــــــــــــــــــــــــــــــــــــــــــــــــ

كرم حكى كل حاجه وذكر اسماء اللي وقفوا معاه

وكل دا قدام الكاميرا بث مباشر

عمر: اقعد ع ركبتك قدامها

كرم: نعم؟؟

عمر: مبكررش كلامي، يلا

قعد كرم ع ركبته قدام بيان اللي واقفه وماسكه الكتب بإيديها الاتنين وواقفه مش مستوعبه اللي بيحصل

قعد كرم قدامها وبدأ كل الموجودين يطلعوا موبايلاتهم عشان يصوروه

عمر: اعتذر... يلا

كرم: انا اسف

عمر: اعلى

كرم: انا اسف، انا اسف ي استاذه بيان، حاجه تاني؟

عمر: خدي حقك منه بالطريقه اللي تريحك

بيان بصتله وهي مش عارفه تعمل ايه وعمر بيطمنها بعينيه عشان تعمل كدا

متعرفش ايه اللي حصل غير انها فقدت السيطره على نفسها وافتكرت والدها اللي معرفتش تودعه حتى، وفضلت تضرب في كرم بالاقلام على وشه، قلعت الكوتش اللي في رجلها وفضلت تضرب فيه وهو مستسلم تماما والكل بيبصوا لبعض في دهشه، معقول كرم المنياوي بيتضرب بالشكل دا قدام الكل

بيان حست برضا داخلي نوعا ما بعد ماحقها رجعلها في نفس المكان اللي اتاخد منها فيه

عمر: اما بالنسبة لاصحابه اللي وقفوا معاه، هي تختار الطريقه اللي تناسبها في عقابهم، اتفضلي

بيان مشت عليهم بخطوات بطيئه وهي مغلوله منهم، وعدت عليهم واحد واحد وهي بتضربهم كلهم

في بيت بيان

مامتها مبطلتش زغاريط جوا وبره البيت، وقفت في نص الشارع وفضلت تزغرط لدرجة ان الناس استغربت ازاي جوزها لسه ميت وبتزغرط كدا

الناس كلها اتلمت حواليها في الشارع، في منهم اللي شاف الفيديو وفي اللي لسه معرفش

امجد: بتعملي ايه ادخلي جوا

مامتها: وادخل جوا ليه، ربنا نصر بنتي، الحمدلله، ربنا اثبت للكل ان بنتي ست الناس كلها ومفيش في اخلاقها وادبها، عشان كل اللي اتكلم وقال كلمه في حقها يحط جزمه قديمه في بوقه ويخرس خالص، دلوقتي ابوها يقدر يرتاح في رقدته، بعد اللي حصل لبنته، ابوها اللي كان خيره على البلد كلها، وكلكوا مقصرتوش في انكوا تنهشوا في لحمه ولحم بنته، ناس متسواش تلاته تعريفه قعدت تتكلم على بنتي ست البنات كلهم، بس نقول ايه، بلد ناقصه وناس ناقصه، اتفوو عليكوا واحد واحد مفكوش حد يعرف ربنا

عمر خلى كل اللي في الجامعه يعتذرولها واحد واحد وهي واقفه حاسه بفرحه جواها عشان حقها رجعلها بس ملامحها لسه ثابته زي ماهي

عمر للكاميرا: واخيرا، كل اللي ساهم في الجريمه اللي حصلت دي لازم بتعاقبوا بالقانون، عشان كدا خلينا نطالب كلنا بمعاقبتهم عشان يكونوا عبره لكل الشباب، وعشان ولادكوا معرضين ل دا في اي وقت، ومن ناحية الجامعه، اعتقد اقل حاجه ممكن تعملها هي انها تحرمهم من دخول الامتحان.

.

وياريت نفهم ونكبر بقى،مش لازم عشان واحد قال كلمه على بنت تبقى زي ماقال، خاصة يعني لو عارفين انه معندوش اخلاق من الاساس

هند: بقى انا اعتذر ل دي؟

مها: مش لوحدك، كلنا اعتذرنا، مش عارفه احنا مالنا يعني، عملنا ايه

هند: هيخلي واحده زي دي تمشي الارض مش شايلاها، مشوفتيهاش كانت بتبصلي ازاي وانا بعتذرلها؟؟؟، كانت شمتانه فيا البتاعه دي

سما: بنات هو حد فيكوا شايف انهم لايقين على بعض زيي ولا انا بس اللي شايفه كدا؟

الاتنين بصولها بتهكم وهي بصت بعيد

بيان قاعده في الاوضه وسرحانه، مش مستوعبه اللي حصل، مكانتش متخيله ان حقها هيرجع قدام الكل كدا

بيان في نفسها: ارن عليه اشكره!، لا لا مينفعش، بس هو، وقف معايا، لا لا ابقى اخلي ماما تكلمه احسن، انا اصلا مش معايا رقمه ايه الغباء دا

قطع تفكيرها رنة موبايلها، مسكت الفون لقته رقم غريب

ـ بيان؟

بيان: ااه، مين

قراءة رواية في حضن الهوي الفصل السابع 7 كامل بدون حذف | بقلم حسناء رمضان

تعرف على مفاجآت رواية في حضن الهوي الفصل السادس 6 كامل بدون حذف في الفصل التالي الآن.

فصول رواية في حضن الهوي مرتبة كاملة

يمكنك قراءة رواية في حضن الهوي كاملة بدون حذف أو اختصار، جميع الفصول مرتبة وسهلة التصفح في صفحة واحدة.