مامتها: وبعدين معاكي يابنتي

بيان: صعب يماما، انتوا كنتوا معاه، انما انا لا، ملحقتش اشوفه ولا احضنه ولا اي حاجه

مامتها: اهم حاجه انك اثبتي براءتك، دا الاهم بالنسباله يابنتي، دلوقتي هو يرتاح

تقى: ماما ماما

مامتها: عايزه ايه

تقى: هو انا لما اكبر، ينفع البس زي رولا دي

مامتها: نعم؟

تقى: ماهي كانت لابسه كدا عادي اهو

مامتها: بت انتي، هقوم اكلك علقه محترمه، دي جسمها كله كان باين، عايزه تمشي تعرضي نفسك للناس؟، مش شايفه اختك بتلبس ايه؟

تقى: بس يماما بصراحه بقى الحجاب بيكبرها، يعني شوفي دلوقتي بشعرها شكلها حلو قوي، ليه بتلبس الحجاب

مامتها: ماهو دا السبب اللي بيخلينا نلبس الحجاب، عشان نداري حلاوتنا

تقى: ونداريها لييييه

مامتها: عشان جوزك بس اللي ينفع يشوفها، وعشان ربنا امرنا ب كدا، واحنا ما الا عباد لله، هو سبحانه وتعالى يؤمر واحنا نقول سمعنا واطعنا

تقى: بس انا مش عايزه اخبي شعري، شعري حلو

مامتها: لما تكبري وتبقي عروسه زي اختك كدا، انتي بنفسك هتقولي عايزه البس لبس محتشم عشان ابقى مرتاحه وراضيه عن نفسي

تقى: وانتي مرتاحه يابيان؟

بيان: بت انتي، قسما بالله هقوم اجيبك من شعرك، متتكلميش معايا انا مش طايقاكي اصلا، وبعدين شعر ايه يام شعر انتي، شعرايتين طلعوا في دماغك هتعملي عليهم فرح؟

تقى: انا عارفه انك متغاظه

بيان: وهتغاظ من ايه ياختي

تقى: عشان عمر حط ايده على شعري وقعد يلعبلي فيه وانتي لا

بيان: شايفه بنتك؟، وحياة ربنا ل اوريكي

رولا: قولتلك اكيد قطه

عمر: من امتى وانتي بتقعدي مع القطط في مكان واحد؟

رولا: معرفش بقى يعمر انا لسه راجعه، اكيد كانت محبوسه هنا ولا حاجه

بصلها بصه غريبه وهي قلقت منها بس قطع نظراته دي رنة موبايله

عمر: ايوا

ـ الشرطه هنا يفندم

عمر: نعم، ليه؟

ـ مش عارف بس بيقولوا انهم عايزين حضرتك

عمر: طيب انا جاي

مشي من عندها وطلع على شقته

الظابط: عمر بيه

عمر: في ايه

الظابط: الحاجات دي خاصه بمعتصم، صح

عمر: ااه، هو فين

الظابط: لقينا الحاجات دي في بيت****، وعليها اثار دم، بس لسه بنحقق في الموضوع

عمر بصدمه: ايه؟، انت بتقول ايه

الظابط: وبصراحه عرفنا انه كان بيدور على كرم

عمر: وقبضتوا على كرم؟

الظابط: لا للاسف لسه

عمر: طيب وفين معتصم، والدم دا بسبب ايه

الظابط: محتاج حضرتك تيجي معايا عشان تشوف حاجه مهمه

رولا: انت مجنون، كنت هتودينا في داهيه

كرم: لولا اني استخبيت كان نفخني، انا مش خايف من الحكومه قد مانا خايف من العلقه اللي هاخدها منه

رولا: مسيطر عمر صح

كرم: طبعا، مش اخويا الكبير

رولا: طبعا،، هو في زي عمر وحلاوة عمر وطعامة عمر

كرم: وفلوس عمر

كرم: بقولك ايه، بطلي تعملي الحبتين دول عليا، انا عارف اللي فيها

رولا بتوتر: وايه اللي فيها

كرم: عمر غايه، هدف بالنسبالك، فرصه متتعوضش، بنك متحرك يعني

رولا: انت اتجننت، انت عارف انا ابقى مين

كرم: ايه دا في ايه، انتي نسيتي ولا ايه، مين يابتاعه انتي، هو مش دا حوار عملناه انا وانتي عليه عشان توقعيه ولا ايه ياختي

رولا: الكلام دا كان زمان، دلوقتي انا بحبه بجد

كرم: ياروووحي، عشان كدا عماله تصرفي فلوسه، وهو يعيني عشان شايفك زوجته المستقبليه، وكدا كدا هيصرف عليكي فَ مش بيقولك لا

رولا: لا طبعا، انا اصلا مش باخد منه فلوس

كرم: والكريدت اللي في جيبك دي، بتاع بابي برضو؟

، بقولك ايه، احنا متفقين اتفاق، وهتكملي فيه غصب عنك، والا هروح اقوله وارسيه على الحوار كله، وبيني وبينك، الواد صعبان عليا، بقاله سنين بيحبك وانتي.

.

هيهي، مالك اتخطفتي كدا ليه، متقلقيش، مش هقوله حاجه، طول مانتي في صفي انا في صفك ، وبصراحه عندي شرط صغير كدا

رولا: شرط ايه

كرم: بيان، فين

رولا: ليه

كرم: عند عمر صح؟

رولا: ليه ياكرم

كرم: متقلقيش، اكيد عامل حسابه ومأمن المكان، وانا مش هعرف اروح

رولا: طب كويس

كرم: انتي اللي هتروحي

رولا: نعم

كرم: هتروحي وتعملي اللي هقولك عليه بالحرف الواحد، والا، فيديوهاتك وحاجاتك كلها هتبقى عند عمر بكرا الصبح..

الظابط: دي اثار الدم اللي لقيناها هنا، وجنبها لقينا حاجة معتصم

عمر باصص لكمية الدم اللي ع الارض ومصدوم

الظابط: وخط الدم دا يدل على ان الجثه تم نقلها من المكان، ولو في احتمال ان الشخص المصاب يكون عايش وهو اللي حاول يخرج من هنا فَ دا احتمال ضعيف بالنسبه لكمية الدم دي..

تعالى شوف يفندم

عمر راح بص لقاها تسجيلات الكاميرا اللي بره، وواضح فيها معتصم وهو بيحاول يسيطر على كرم عشان يدخله البيت

الظابط: دلوقتي في احتمال من اتنين، يا اما كرم قتل معتصم، او العكس

عمر بصله وهو مش مستوعب، مش قادر يتخيل ان الدم اللي جوا دا دم اخوه او صاحب عمره....

بيان: ايوا عايز ايه يعني

امجد: عايز اعرف روحتوا فين، وازاي تمشوا من غير ماتعرفوا حد فينا، ملكوش كبير؟

بيان: لا ملناش

امجد: ابوكي خلاكي فجرتي، ولما مات فجرتي اكتر

بيان: امجد، انت حيوان واتمنى متتكلمش معانا تاني، لو عايز تعمل كبير روح اعمل كبير على عيلتك، ملكش دعوه بينا

امجد: يعني ايه مليش دعوه بيكوا، مش بقولك عايزه تدوري على حل شعرك ومحدش يعرف انتي بتعملي ايه، لا والادهى ان الست الوالده كمان معاكي، والله اعلم اختك الصغيره بتتعلم ايه دلوقتي

قفلت في وشه السكه

مامتها: مين يبيان

بيان: امجد

مامتها: وعايز ايه الزفت دا

بيان: عايز يعمل راجل

مامتها: ااه، خليه يتوكس

بيان: انا زهقت منهم بجد، دا ايه دا، انا مشوفتش كدا، لا والاسم خايفين علينا

مامتها: هنعمل ايه، قدرنا

بيان: ايه دا مين

مامتها: يمكن عمر

بيان: استني اشوف

بصت من العين لقتها رولا

بيان: ماما، رولا

مامتها: وجايه ليه دي

بيان: مش عارفه، افتح ولا اعمل ايه

مامتها: افتحي يابنتي نشوفها عايزه ايه

تقى: لا، عمو عمر قال لا

بيان: ممكن تكون جايبه حد معاها

مامتها: طب رني على عمر بسرعه

مسكت الموبايل ورنت على عمر بس مبيردش والباب كمان مبطلش خبط

مامتها: افتحي يابنتي كدا كدا في حرس بره

بيان من ورا الباب: نعم!، عايزه ايه

رولا: جايه اعتذر، ينفع ادخل!

المنياوي: انت بتقول ايه

الظابط: دا اللي حصل يفندم، بس لسه التحقيقات شغاله

المنياوي بتمثيل: لو معتصم دا عمل في ابني حاجه انا مش هسكت

عمر: ولو كرم هو اللي عمل في معتصم حاجه؟، وقتها مش هتسكت برضو؟

المنياوي: قصدك ايه، انا ابني مش قتال قتله، متنساش انك بتتكلم عن اخوك

عمر بعصبيه: ومعتصم كمان اخويا، يمكن اخويا اكتر من كرم، والصراحه اتوقعها من كرم، انما معتصم استحاله يإذيه، بس صدقني، لو عرفت ان معتصم جراله حاجه وقتها هنسى اي علاقه تربطني بكرم

المنياوي: انت اصلا نسيتها عشان واحده غريبه

عمر: ماشي، مش هتجادل معاك اكتر من كدا، دور على طريقه تخرجه بيها من اللي هيحصل

الشغاله: ربنا يرجعهولك بالسلامه يارب

حرم المنياوي: هيرجعه، دا ابني انا، ابن شويكار هانم، انا هوريهم ازاي يعملوا في ابني كدا

الشغاله: ربنا ينتقم منهم، هو صحيح كرم شقي حبتين، لكن سيد الناس كلهم، ااه والله

حرم المنياوي: اااه من كرم، عايز يموتني من الخوف عليه

الشغاله: ان شاء الله هتيجي سليمة، هو بس عمر بيه يهدى عليه شويه لحد مالدنيا تعدي على خير، وبعد كدا يبقى يعلمه الادب

حرم المنياوي: ايه!، يعلمه ايه؟، انتي مجنونه!، نسيتي نفسك، يظهر قعدتي معاكي نستك انتي بتتكلمي مع مين

الشغاله: يقطعني ياست هانم مقصدش والله، ربنا يعلم انا بحب كرم قد ايه، دا من خوفي عليه بس

حرم المنياوي: اول واخر مره تتكلمي كدا، يلا على شغلك

رولا: جبتلكوا اكل عشان ناكل سوا، اعتبروه اعتذار عن اللي حصل

مامتها: لا اعتذار ليه، مفيش حاجه

بيان: هو ايه اللي مفيش حاجه، لا في، يلا اتفضلي لو سمحتي

رولا: يظهر ان بيان لسه واخده على خاطرها مني، طيب ياست حقك عليا، صدقيني انا بس بغير على عمر قوي، ومستحملتش لما لقيتك قريبه منه، وبعدين بصراحه اصل الشقه دي عزيزه عليا قوي، يعني زي ماتقولي كدا قضينا وقت فيها مع بعض

مامتها: استغفر الله العظيم

رولا: ماهو هيبقى جوزي مانتوا عارفين، عشان كدا اتضايقت لما لقيت حد غريب قاعد في شقتي اللي هتجوز فيها، خاصة يعني ان كتب كتابنا قاعد عليه اسبوع

بيان: اسبوع!

رولا: ايه دا هو مقلكوش؟، ااه، تلاقيه اتكسف منكوا عشان هو كان محتاج الشقه عشان هنقعد فيها

مامتها: يعني احنا كدا معطلينه؟

رولا: ااه طبعا يطنط، هو بس تلاقيه حب يعمل خير معاكوا، بس نسي للحظه انه هيتجوز فيها، عشان كدا كان مكسوف يقولكوا، وقالي انه هيأجل جوازنا عشانكوا، عشان كدا جيت متعصبه كدا

مامتها: لا وعلى ايه يابنتي، احنا منرضاش نوقف حال حد، ربنا يتمملكوا بخير، خلاص يبنتي هنلم حاجتنا ونمشي، بيان، رني على عمر بلغيه اننا هنرجع البلد

رولا بسرعه: ودا كلام برضو يطنط، انا مقصدش كدا

مامتها: لا يبنتي دا حقك

رولا: ماهو لو قولتوله هيرفض طبعا، مانتوا عارفين

بيان: يعني ايه، نمشي من غير مانعرفه؟

رولا: يعني انا اكيد مش عايزاكوا تمشوا بس، كلكوا نظر يعني

مامتها: ماشي يابنتي كتر خيركوا على كدا، احنا هنمشي

رولا: بس اوعى يطنط تجيبيله سيره اني قولتلك حاجه زي دي، هيزعل مني وهنتخانق

عمر: مش معقول اختفى كدا، مصيبه ليكون كرم عمل فيه حاجه فعلا

الظابط: بص يعمر، انت زي اخويا، وخليني اقولك ان الاحتمال الاكبر ان اخوك عمل فيه حاجه ودارى جثته في حته، عمر، الموضوع كل مدى بيكبر اكتر، وهيصعب علينا وقتها نساعده

عمر: تساعدوا مين!

الظابط: اخوك، كرم

عمر: هو انتوا كلكوا كدا، مفيش حد فيكوا عنده دين، مبتخافوش ربنا، مفيش ضمير خالص

الظابط: في ايه يفندم

عمر: مين قالك اني عايزك تساعده، انا عايزك تقبض عليه، شوفلي معتصم فين وكرم هبب ايه، ولو كرم اللي عمل كدا يبقى يتحاسب، والا قسما بالله هقعدك في البيت

سابه ومشي راح اتمشى ع البحر ومحسش بنفسه غير وهو عند بيان في شقته، خبط بس وقتها اتفاجئ ان رولا اللي بتفتحله، بصلها لقاها لابسه لبس مش تمام وكإنها كانت مستنياه

عمر: بتعملي ايه هنا، بيان فين

رولا: مشت

عمر: نعم!

رولا: زي مابقولك كدا، ادخل بس تعالى

دخل وبص عليها جوا ملقاش حد فيهم

عمر: مشت راحت فين

رولا: الله، جيت جبت اكل عشان ناكل سوا، وقعدت اتكلم معاهم وناخد وندي، طلعوا لطاف قوي يعمر، اعتذرتلهم على قلة الذوق بتاعتي واتصالحنا، بعدها معرفش ايه اللي حصل بس هما قالولي انهم مش عايزين يعملوا بينا مشاكل اكتر من كدا، وكمان لازم يرجعوا بلدهم عشان طولوا هنا

عمر: طولوا ايه دول مكملوش يوم، رولا، قولتيلهم حاجه؟

رولا: اكيد لا، حتى اسألهم، اكيد معاك رقم بيان هانم، رن عليها اسألها

عمر: هرن عليها، بس صدقيني هعرف اذا كنتي قولتي حاجه، ووقتها مش هبقى عليكي انتي كمان عشان انا حذرتك

سابها وخرج بسرعه ركب عربيته وعلى ودنه موبايله بيرن على بيان بس مش بترد

رولا: نزلوا من شويه، اكيد وصلوا المكان اللي انت فيه، وعمر نزل دلوقتي

ـ حلو قوي

بيان: عمر عمال يرن يماما

مامتها: لا يابنتي لما نوصل البلد نبقى نقوله ونعتذرله، انما دلوقتي خلينا نشيل من عليه الحرج دا

بيان: قال ايه، فرحهم بعد اسبوع، والنبي هيبص لدي على ايه، شبه السلعوه

مامتها: وميبصلهاش ليه

بيان: لا ميبصلهاش يماما، وكمان هو انسان محترم، ايه اللي يخليه يحب واحده زي دي مش فاهمه انا، دا كفايه لبسها

مامتها: وانتي متضايقه ليه، مايحب اللي يحبه احنا مالنا

بيان: وانا مالي هتضايق ليه، كل انسان حر

ماشيين بالعربيه ووصلوا حته معينه وحسوا بصوت عربيه جايه بسرعه من وراهم وجت وقف قدامهم فجأه

بيان بصت لمامتها اللي كانت مصدومه لما شافته

بيان بزعيق: كرم، كرم يماما

قراءة رواية في حضن الهوي الفصل الحادي عشر 11 كامل بدون حذف | بقلم حسناء رمضان

اكتشف التطورات القادمة في رواية في حضن الهوي الفصل العاشر 10 كامل بدون حذف بالفصل التالي.

اقرأ في حضن الهوي كاملة جميع الأجزاء

يمكنك قراءة رواية في حضن الهوي كاملة بدون حذف أو اختصار، جميع الفصول مرتبة وسهلة التصفح في صفحة واحدة.