رواية خطه زوجتي الفصل الأول 1 كامل | بقلم نور محمد
تم تحديث الفصل بتاريخ 17 أبريل 2026
خطه زوجتي نور محمد
وقفت قدام موظف الشهر العقاري، الجو حر، والمروحة اللي فوقي بتطلع هوا سخن.
كنت بمسح عرقي بمنديل، وببتسم وأنا بمد إيدي بالبطاقة.
لو سمحت، عايز أستعلم عن العقد المسجل باسم شيرين محمود مراتي، الفيلا اللي في الشيخ زايد.
الموظف خد البطاقة، ضرب كام زرار على الكيبورد، وبص للشاشة كتير.
يا أستاذ مفيش حاجة مسجلة بالاسم ده هنا.
ابتسمت بثقة أكيد في غلطة في السيستم، طب جرب بالرقم القومي ده
رد ببرود الموظفين المعتاد يا فندم، السيستم مابيكدبش.
بس دقيقة، في توكيل عام رسمي حضرتك عامله للمدام من ٥ سنين.
وهي استخدمته من شهرين عشان تنقل ملكية شقتك التمليك اللي في المعادي باسم والدتها.
وكمان باعت عربيتك.
سكتّ.
الصوت حواليا اختفى.
دوشة الناس، زعيق الموظفين، صوت المروحة كله اتبخر.
سبع سنين شقى وغربة في السعودية.
سبع سنين ببعتلها كل ريال بقبضه من شغلي عشان نأمن مستقبلنا ومستقبل الولاد.
سبع سنين من معلش يا يوسف، استحمل الغربة، وأنا هنا بشرف على تشطيب الفيلا اللي هتلمنا ونرتاح فيها طول العمر.
طلعت الموبايل.
رنيت عليها.
أيوة يا حبيبي، أنا في النادي مع الولاد، نصاية وأكلمك.
صوتها كان هادي رقيق ومزيف لدرجة ترعب.
قفلت السكة.
مازعقتش في الشارع.
ولا حتى حسيت بانهيار.
اكتشفت إن الخيانة الحقيقية مش دايماً بتيجي في صورة راجل غريب في حياتها.
الخيانة الحقيقية بتيجي في صورة ست بتاكل من عمرك وتعبك وشقاك في الغربة، وهي بتبتسم في وشك وبتمثل دور الزوجة المخلصة السند.
روحت على البنك فوراً.
عايز كشف حساب للرصيد المشترك بتاعنا.
موظف البنك بصلي بشفقة بعد ما راجع الشاشة يا
فندم الحساب اتصفر إمبارح الصبح.
المدام سحبت كل المبلغ كاش.
أربعة مليون جنيه.
تحويشة عمري، وسهر الليالي، وبعدي عن ولادي.
طلعت من البنك، مشيت في الشارع وأنا حاسس إني خفيف خفيف لدرجة إني ممكن أقع من كتر الصدمة.
رجعت الشقة اللي مأجرينها مؤقتاً لحد ما الفيلا تجهز.
فتحت الباب بالمفتاح لقيت هدوء غريب.
دولابها فاضي، شنط سفرها مش موجودة، والولاد مش في البيت.
بس كانت سايبة حاجة على الترابيزة.
ورقة صغيرة ومفتاح.
قربت من الترابيزة، مسكت الورقة وقريت المكتوب فيها
سامحني يا يوسف، أنا دخلت الفلوس كلها في جمعية كبيرة ومشاريع مع ناس وطلعوا نصابين، مقدرتش أواجهك.
أنا خدت الولاد وهقعد عند خالتي في إسكندرية فترة لحد ما أعرف أحل المصيبة دي.
وهنا ضحكت.
ضحكت بصوت عالي جداً لدرجة إن عيني دمعت.
عشان شيرين الكدابة، اللي فاكرة نفسها ذكية، نسيت حاجة مهمة جداً
نسيت إني بشتغل مدير مالي.
وإني من شهرين، لما حسيت بشوية قلق وتناقض في كلامها، عملت إجراء قانوني واحد بس، هي مستحيل تتخيله، إجراء هيقلبها من هانم هربانة بالغنيمة ل متهمة ملهاش مفر وممنوعة من السفر هي واللي ساعدها.
مسكت تليفوني، وطلعت رقم محدد كنت مجهزه للحظة دي، وقبل ما أدوس اتصال الباب خبط.
فتحت الباب ببطء
كان حازم، أخو شيرين الصغير.
في إيده شنطة سفر فاضية، وبيبص في تليفونه ومبتسم ابتسامة واسعة.
أول ما رفع عينه وشافني، الابتسامة دي اتجمدت على وشه، وتليفونه وقع من إيده على الأرض وكسر صمت المكان.
ي يوسف؟
إنت رجعت إمتى؟
مش المفروض طيارتك الأسبوع الجاي؟
صوته كان بيترعش، وعينيه بتزوغ في كل حتة في
الشقة.
مسكته من دراعه بهدوء مرعب، وشدبته لجوا وقفلت الباب برجلي.
أهلاً يا حازم كنت جاي تاخد إيه؟
بقية الهدوم ولا في دهب شيرين نسيته في استعجالها وهي بتهرب بالغنيمة؟
وشه جاب ألوان، وبدأ يتهته تهرب إيه بس يا يوسف!
شيرين كلمتني وقالتلي إنها خايفة تقعد لوحدها بعد ما خسرت الفلوس في الجمعية، وطلبت مني أجي ألم بقية حاجتها
زقيته على الكرسي وقعدت قدامه، وحطيت رجل على رجل.
جمعية إيه يا حازم؟
إنتوا فاكرين إنكم بتلعبوا مع عيل صغير؟
ولا فاكرين إن شقى سبع سنين في الغربة هيطير في مكالمة تليفون وورقة مكتوبة بخط الإيد؟
سكت وماردش، فكملت أنا وعيني في عينه
أختك فاكرة إن التوكيل العام ده شيك على بياض تعمله وقت ما تحب.
من شهرين، لما بدأت ألاحظ إنها بتتهرب من أسئلتي عن تشطيب الفيلا، وإن فواتيرها بقت أرقامها خيالية، رحت القنصلية المصرية في الرياض.
ولغيت التوكيل.
حازم برّق عينيه بصدمة، فابتسمت بوجع وكملت
مش بس كده، أنا بعت إنذار رسمي على يد محضر على عنوان والدتك إن التوكيل اتلغى.
يعني بيع أختك لشقتي في المعادي، وتنازلها عن عربيتي لوالدتك بعد تاريخ الإلغاء.
ده في القانون اسمه تزوير واستعمال محرر مزور.
جناية يا حازم، عقوبتها السجن المشدد لأختك، ولوالدتك اللي اشترت وهي عارفة إن التوكيل ملغي.
حازم حط إيده على راسه وبدأ ينهج إنت بتقول إيه سجن إيه يا يوسف، دي مراتك وأم ولادك!
ضحكت بسخرية أم ولادي اللي سرقتني ورمتني في الشارع؟
استنى، إنت لسه ماسمعتش الأهم ال ٤ مليون جنيه اللي أختك سحبتهم كاش إمبارح.
قربت منه ووطيت صوتي أختك من غبائها وطمعها ما سألتش نفسها ليه أنا
كمدير مالي، سايب مبلغ زي ده في حساب جاري عادي!
أنا تحويشة عمري كلها مربوطة في ودايع وشهادات استثمار مقفولة باسمي أنا بس.
الحساب المشترك اللي هي صفرته ده، أنا كنت محوله ل حساب سحب ع المكشوف Overdraft بضمان شغلي.
البنك طلعلها الفلوس، بس لأنها سحبتهم بشخصها وبتوقيعها هي، فالفلوس دي طلعت في هيئة قرض شخصي باسمها!
حازم قام وقف وهو بيترعش كله يعني إيه؟
يعني أختك ماسرقتش فلوسي.
أختك لبست نفسها في ديون للبنك ب ٤ مليون جنيه!
وأنا بكل بساطة قدمت ورق إمبارح بيفصل مسؤوليتي عن أي سحوبات تمت في غيابي.
يعني أختك دلوقتي البنك هيحجز على أي حاجة باسمها، ومباحث الأموال العامة هتدور عليها في كل حتة، ده غير قضية التزوير اللي أنا هرفعها بكرة الصبح.
الرعب اللي شوفته في عين حازم كان كفيل يبرد ناري شوية، بس فجأة تليفوني رن.
بصيت على الشاشة، لقيتها شيرين.
أكيد حست إن في حاجة غلط لما حازم اتأخر، أو البنك كلمها.
بصيت لحازم وشاورتله يسكت خالص وفتحت السبيكر، ورديت بهدوء
ألو أيوة يا شيرين، وصلتي إسكندرية ولا لسه في الطريق؟
ردت بصوت مهزوز ومرعوب ومختلف تماماً عن صوتها الصبح
يوسف إنت إنت عملت إيه في الحساب؟
البنك بيكلمني وبيقولي إن عليا مديونية ولازم أسددها فوراً وإلا هيعملوا فيا محضر يوسف إنت فين؟
ابتسمت وأنا باصص لشنطة السفر الفاضية
أنا في شقتنا يا حبيبتي مستنيكي إنتي والولاد عشان نحتفل ب الفيلا الجديدة بس هاتي معاكي ال ٤ مليون عشان البوليس على وصول.
البوليس؟
يوسف أبوس إيدك متهزرش معايا في الحاجات دي!
أنا أم ولادك!
صرخت بيها شيرين في التليفون وصوتها
كله رعب وانهيار.
قفلت السبيكر، وحطيت التليفون على ودني، واتكلمت
شارك
قراءة رواية خطه زوجتي الفصل الثاني 2 كامل | بقلم نور محمد
لا تفوت الفصل التالي من رواية خطه زوجتي الفصل الأول 1 كامل لمزيد من التفاصيل.
جميع قصص وروايات نور محمد
استمتع بقراءة قصص وروايات نور محمد كاملة بجميع الفصول.
