علياء بصراحه / اه حبيته جدا ولقيت نفسي فيه بس انا مستنيه اخد قرار نهائي بعد ما اخلص الكليه انت عارف عمي كل اما اقوله اشتغل يقولي بعد ما تخلصي

مروان ابتسم / هتخلصي ان شاء الله وبتقدير حلو كمان زي كل سنه انا واثق .

بعد شويه كان مروان وصل علياء وطلع على شغله .. علياء دخلت الكليه وقابلت صاحبتها سندس ..

سندس / ايوه يا ستي القمر جايبك لحد هنا بنفسه ..

علياء ابتسمت / يا بنتي يا قمر ايه مروان ده زي اخويا بالظبط وطول الوقت بيعاملني على اني اختي ده لسه من سنه فاتت كان بيجيلي شيكولاته وهو راجع البيت عادي جدا كانه بيجيبها لاخته الصغيره .

سندس غمزت / بس مش الصغيرين بس اللي بيجيلهم الشيكولاته يعني .. على فكره الواد فعلا بيحبك وعينه منك ريحيه بقى ولو طلب منك الجواز وافقي ...

علياء / شوف البنت اقولها ايه تقول لي ايه يا بنتي بقول لك بيعاملني زي اخته بالظبط يعني مفيش اي حاجه بينها ده انا حتى عمري ما لاحظت انه بيبصلي اي بصه فيها حب او شوق ده غير انه حرفيا كل تركيزه في شغله مش بيفكر في اي حاجه تانيه بصراحه انا اللي حاسه اني فعلا بحبه قوي قوي ونفسي يتقدم لي هو يوسف .

.

.

سندس / ايه يوسف ايه الصايع الضايع ده انتي بتهزري يا بنتي اسمعي الكلام والله مروان راجل محترم وما يتعوضش وبعدين لو انتي مش عايزاه يبقى تسيبيهولي انا بقى انا اولى من الغريب ..

علياء ضحكت جدا وفضلت تتكلم هي وصاحبتها ويهزروا وبعدين دخلوا المحاضره

اما يوسف كان قاعد بيتكلم مع حنين في كافيه ..

حنين / انت مش قلتلي قبل كده ان البنت دي غنيه جدا ومعاها فلوس

يوسف / ايوه وارثه الفلوس دي عن ابوها و بابا هو المسؤول عنها لحد ما تتخرج من الجامعه ..

حنين / طيب بقولك ايه هقولك على خطه كده اللي بيها نضمن حياتنا و مستقبلنا ..

حنين قالتله اللي ف دماغها .

حنين / ايه رايك بقى في الاقتراح ده ..

يوسف بتفكير / هو اقتراح حلو بصراحه وجامد قوي تسلم دماغك بس مش عارف بابا هيوافق ولا لا ..

حنين / وما يوافقش ليه هو اصلا في غيرك ممكن يطلب ده و بعدين ما انت هتلعب عليهم يعني .

يوسف / لا من ناحيه فيه ف هو فيه وانا عارف ده .. بس فكرتك عجبتني وهنفذها ما هو مش معقول يعني كل الحاجات دي تروح للغريب ليه ما انا موجود واولى

يوسف قرر فعلا انه هينفذ الخطه اللي قالتله عليها ..

جه الليل و يوسف روح البيت وكان ماسك علبه هدايا كبيره خبط على اوضه علياء ..

علياء فتحت / ايوه يا يوسف خير .

يوسف اداها الهديه ..

يوسف / علياء انا اسف على الكلام اللي قولته الصبح انا مش قصدي انتي خالص انا بس متضايق من بابا و وماما عشان دايما شايفيني غلطان .

علياء اتبسطت جدا من تصرف يوسف وكانت مبتسمه اوي و باين عليها الفرحه ..

علياء / خلاص يا يوسف حصل خير وشكرا على الهديه ..

يوسف / بقولك يا علياء هو انتي مش بتفكري تخرجي تتمشي او تتفسحي انا ممكن على فكره اجي معاكي افسحك واوديكي اماكن كتيره اوي ..

علياء / والله انا نفسي يا يوسف بس انا ورايا مذاكره انت عارف ان انا في اخر سنه ممكن لما اخلص الامتحانات نبقى نخرج براحتنا ..

يوسف ابتسم / ماشي انا على فكره هفضل مستني فتره الامتحانات تخلص على نار ..

علياء ابتسمت و قفلت الباب و دخلت اوضتها و هي مبسوطة ..

بعد شويه تليفونها رن وكانت عمتها سميه هي اللي بتطلبها ..

سميه / ازيك يا حبيبتي عامله ايه .

علياء باستغراب / الحمد لله يا عمتو خير في حاجه .

سميه / سلامتك يا حبيبتي انا بس بطمن عليكي يعني عامله ايه في المذاكره والجامعه ..

علياء / الحمد لله انا مستغربه عشان حضرتك عمرك ما كلمتيني او حتى سلمتي عليا

سميه بتصنع الحب / يا حبيبتي والله مش بمزاجي ده عمك هو اللي مانعني اكلمك كل ده علشان قررت ان انا اخد حقي اللي ربنا شرعه ليا طب انتي يرضيكي كده يا علياء ..

علياء / لا يا عمتو ما يرضينيش ..

سميه / طب ايه رايك لو تيجيلي بكره تتغدي معايا ده ابن عمتك جاي بكره من السفر ونفسه يشوفك ..

علياء قدام اصرار عمتها وافقت انها تروحلها و تاني يوم كانت قاعده عندها وكان موجود ابن عمتها شهاب عنده 29 سنه ..

سميه / ايه الاخبار بقى قوليلي عمك ومرات عمك عاملين معاكي ايه .

علياء ابتسمت / الحمد لله عمو بيعتبرني زي مروان ويوسف بالظبط ويمكن بيعاملني احسن كمان ...

سميه / بس مرات عمك بتميز ما بينكم تنكري لما ابنها يوسف بيرخم عليكي مبتكلموش ولا بتزعقله ..

علياء / عارفه بس رغم كده هي بتحبني وبعدين مهما كان يوسف ابنها انا مش بنتها .

شهاب / طيب ايه رايك يعني لو جيتي عيشتي عندنا بصفتك .مراتي ..

علياء اتصدمت و معرفتش تقول ايه ..

سميه ضحكت / يا شهاب قلتلك بلاش تفاجئها كده كنا نمهد لها الاول بس عموما كده احسن ايه رايك بقى يا علياء ..

علياء / بصراحه يا عمتو انا مش بفكر في الموضوع ده غير لما اتخرج الاول .

سميه / وماله احنا ممكن نعمل خطوبه ونقدملك الشبكه وبعد ما تخلصي الجامعه ان شاء الله نجهز الدنيا وتدخلوا على طول ..

علياء / معلش يا عمتو انا مش عايزه اشغل دماغي الفتره دي لازم الاول اخد الشهاده

علياء روحت البيت وهي متضايقه جدا وحكيت لعمها اللي حصل ..

حسام / بصي يا حبيبتي لو انتي عايزه شهاب فعلا انا ما عنديش مشكله وهقف في ظهرك مهما حصل بس نصيحتي انا بقى يا بنتي بلاش شهاب شاب مستهتر وبتاع بنات وانا نفسي حضرت كتير مع ابوه مشاكل كان بيعملها فنصيحه ركزي في دراستك واشتغلي الاول ولما تعرفي تقفي على رجلك ابقي قرري هتعملي ايه

اما عند سميه كانت قاعده هتتجنن ..

سميه / بقى البت بترفضك انا مش فاهمه البنت دي جايبه البجاحه والقوه دي منين.

شهاب بلامبالاه / خلاص بقى هي تقريبا كده رفضت بس ما عرفتش تقولها ازاي ..

سميه / وهي ترفض ليه اصلا هي تحلم دي واحده يتيمه يعني تقبل باللي موجود وخلاص ما لو كنت انا اللي وصيه عليها مكنتش اتجرأت تتكلم بالطريقه دي ولا ترفض اي كلمه اقولها

فات كذا يوم وامتحانات علياء بدات كان الكل واقف معاها وبيدعمها واولهم مروان اللي كان اهتمامه بيها واضح جدا كان بيوصلها بعربيته كالعاده .

مروان / علياء خلي بالك وانتي بتجاوبي ركزي في الاسئله كويس اوي ..

علياء / حاضر يا مروان انا خايفه اوي كاني اول مره امتحن ..

مروان / متقلقيش انا واثق ان انتي هتعدي يلا خشي وربنا معاكي ..

علياء نزلت ودخلت الامتحان وبعد فتره خرجت وهي مبسوطه جدا بس اول ما خرجت لقيت مروان واقف مستنيها قدام العربيه .

مروان اول ما شافها قرب منها .

مروان بلهفه / ها طمنيني الامتحان كان عامل ازاي .

علياء باستغراب / كويس الحمد لله بس هو انت كنت مستنيني ولا روحت وجيت .

مروان / لا طبعا ما انتي عارفه ان انا شغلي بياخد وقت طويل عشان كده اخدت اجازه النهارده .

علياء / معقوله يا مروان اخدت اجازه اكيد هيخصمولك كتير من المرتبك ..

مروان ابتسملها / مش مهم المهم انت .

خلص اليوم مروان كان قاعد في اوضته وشويه واماني دخلت عليه .

اماني / قولي بقى انت ناوي على ايه بعد ما هي تخلص ..

مروان / مش فاهم قصدي حضرتك يا ماما يعني ايه ناوي على ايه ..

اماني / يا واد ما تلعبش على امك هتكلمها يعني ولا هتعمل ايه ما هو برضه الوضع ده مش هينفع يستمر كده وما تقوليش مش عارف بتكلم على ايه انت فاهم ..

مروان ابتسم لان مامته طلعت حاسه بيه وبمشاعره ..

مروان / هكلمها يا ماما وهطلبها انا بحبها اوي وما اقدرش اعيش من غيرها بس مش عايزه اتكلم اليومين دول عشان ماثرش على تركيزها وامتحاناتها .

اماني ابتسمت / عين العقل يا حبيبي وبيني وبينك انا ما اتمنلكش واحده احسن من علياء متربيه على ايدي وعارفه كويس هي بتفكر ازاي وطبعها عامل ازاي وبصراحه البنت زي الفل .

مروان / يعني يا ماما انت موافقه وهتساعديني وتكلمي بابا ..

اماني طبطبت عليه / اكيد يا حبيبي بس زي ما انت قلت نستنى لما تخلص امتحاناتها وبعدين نبقى نشوف

فات شهر وعلياء فعلا خلصت امتحانات .. و عمها عملها حفله كبيره اوي وعزم فيها كل عيلتهم كان فخور بيها وفرحان جدا واخر اليوم كانوا كلهم قاعدين بياكلوا ...

علياء / شكرا جدا يا عمو على اليوم الجميل ده انا فعلا اتبسطت لو بابا كان موجود مكنش هيعمل معايا زي ما حضرتك عملت .

حسام / بس يا بت يا عبيطه انا ما عملتش حاجه غير اللي ابوكي كان هيعملها .. المهم بقى لازم تفكري وتشوفي هتنزلي في الشركه من امتى .

علياء ابتسمت ولسه هترد بس فجاه يوسف اتكلم ..

يوسف / ثواني يا جماعه انا عايزه اقولكم على حاجه مهمه اوي ..

الكل بصله باستفهام

يوسف / بابا انا عايز اطلب منك ايد علياء ..

.........................

يتبع ...

علياء / يا بنتي كلي بقى ما تتعبينيش حرام عليكي

لين بعند / لا انا مش هاكل غير لما بابا يجي .

اماني / حبيبتي بابا هيتاخر النهارده في الشغل وهو اللي اتكلم وقالنا ناكل من غيره ..

ليان / لا انا مش اكل من غير بابا ازاي يعني احنا ناكل وهو لا ..

الكل بصوا لبعضهم وضحكوا ..

حسام / علياء البنت دي طالعالك عنيده ودماغها ناشفه

علياء / حرام عليك يا عمي انا كنت كده ده انا كنت بسمع الكلام وما بعملش نص اللي هي بتعمله ولا ايه يا مرات عمي ..

اماني ضحكت /  انتي كنتي اهدي منها شويه بس برضه ليان تعمل اللي هي عايزاه .

فجاه باب الشقه اتفتح ودخل منه مروان وليان جريت عليه ..

ليان حضنته/ بابي انت اتاخرت كده ليه شفت كانوا عايزين ياكلوا من غيرك وانا مرضيتش اكل وقلتلهم اني لازم استناك

مروان ضحك / يلهوي ربنا يخليكي ليا يارب انا مليش غيرك اصلا في البيت ده .

ليان / طب انت يا بابي جبتلي الشيكولاته اللي قلتلك عليها ..

مروان / يا سلام جبتهالك بس انا بقى عايز بوسه الاول .

ليان باسته مروان ابتسم وداها الشوكولاته واخدها وراحوا على السفره ...

................................

الحاضر ...

الكل اتصدم واولهم مروان

حسام باستغراب / وده من امتى ده يا يوسف ..

يوسف بصراحه / يا بابا هو من زمان وانا بحب علياء بنت عمي وكنت برخم عليها عشان كنت غيران وفي نفس الوقت ما كنتش اقدر اتكلم عشان عارف انها عايزه تخلص كليتها الاول ..

اماني بصيت لمروان ابنها بشفقه اللي كان باين على وشه الصدمه والزعل .

اماني / بس يا يوسف انت لسه يا دوبك مخلص الكليه اهو ومش عندك اي شغل هتصرف على بيتك ازاي ..

يوسف / يا ماما لو على الشغل ممكن بابا يشوف لي اي شغلانه في الشركه حتى لو صغيره مش مهم المهم ان علياء تبقى مراتي وعلى اسمي .

علياء من جواها كانت فرحانه جدا بالكلام ده بس مبينتش ولا قالت اي حاجه خالص ..

حسام / علياء يا حبيبتي انتي سمعت الكلام اللي قاله يوسف فكري في الموضوع وردي علينا الاسبوع الجاي زي النهارده ولازم تعرفي ان ايا كان رايك ايه انا هدعمك وهقف معاكي

علياء دخلت اوضتها وكانت مبسوطه وفرحانه جدا وكلمت صاحبتها وحكيتلها .

سندس / علياء صدقيني يوسف مش هو الراجل اللي يستهلك اسمعي كلامي وارفضي ده كل يوم والتاني مع بنت ده غير اما اخلص كلياته بالعافيه وكمان ما يعرفش يعني ايه مسؤوليه .

علياء / انا مش فاهمه انتي مصممه تضايقيني ليه بقولك انا بحبه وبموت فيه .

سندس / بس الحب مش كل حاجه  ..

علياء بحيرة / انا هقفل بقى عشان محتاجه اقعد مع نفسي شويه ..

علياء فضلت تفكر كان قلبها وعقلها بيتخانقوا لانها بتحب يوسف بس في نفس الوقت هي عارفه انه مستهتر ومش قد اي مسؤوليه و كلام صحبتها صح  لحد ما فات الاسبوع وعلياء كانت لسه حيرانه

واخر اليوم اتجمعوا كلهم عشان يعرفوا قرارها كانوا قاعدين باصين ليها باهتمام ..

علياء لسه هترد حسام قاطعها

حسام / علياء تعالي معايا على المكتب بتاعي الاول محتاج اتكلم معاكي قبل ما تقولي قرارك

علياء استغربت بس قامت مع عمها من غير ما تتكلم دخلوا اوضه المكتب .

حسام / بصي يا بنتي في واحد تاني بيحبك وعايزك وكلمني فانا حسيت اني لازم اعرفك قبل ما تقولي قرارك ..

علياء / مين ده يا عمي .. شهاب ابن عمتي سميه ؟

حسام / لا ده واحد تاني وبعدين مش مهم هو مين المهم انت عندك استعداد تقعدي وتتكلمي معاه

......

علياء/ بصراحه لا عمي انا كنت اسعد واحده في الدنيا لما يوسف قال انه عايزني لاني كمان يعني معجبه بيه من زمان ..

حسام / خلاص طالما انتي اخذتي قرارك يبقى الموضوع انتهي الف الف مبروك يا حبيبتي ..

علياء خرجت مع عمها من المكتب وهي مبسوطه جدا واعلنت انها موافقه علي يوسف .. اللي فرح جدا ان خطته هو وحنين بدات تتنفذ

........

اما مروان دخل اوضته وهو مهموم وحزين قعد على سريره ودموعه نزلت .. مش قادر ينسى ان علياء اللي كان بيحبها وناوي يتجوزها راحت منه

و في ظرف ايام هتبقى مرات اخوه ومش من حقه حتى يبصلها

تاني يوم علياء نزلت مع يوسف عشان يجيبوا الشبكه ..

علياء بفرحه / يوسف هو انت امتى اول مره حسيت انك بتحبني اصلك عمرك ما بينت ده ابدا ..

يوسف / عادي كنت بحبك من زمان بس مكنتش بتكلم يعني..... انتي عارفه انا مليش في جو المشاعر والكلام ده يا علياء .

علياء / ايوه عارفه .. عارف يا يوسف انا كمان بحبك من زمان اوي من و احنا صغيرين ..

يوسف / عارف عارف انا اصلا اتحب ..

علياء ضحكت وفضلت طول الوقت تتكلم وتهزر مع يوسف كانت مبسوطه اوي انها اختارت الراجل اللي بتحبه ..

...........

اخر اليوم يوسف ركب عربيته وراح لحد بيت كبير خبط على الباب وفتحتله حنين ..

حنين / ها يا يوسف طمني

يوسف بغرور / اطمنك ايه يا بنتي وهو انتي مكنتيش واثقه ولا ايه عيب عليكي ..

حنين / لا طبعا يا حبيبي انا واثقه فيك بس في نفس الوقت كنت خايفه ان هي ترفضك ولا حاجه ..

يوسف ضحك بصوت عالي / لا بتهيالك دي مغفله اساسا فاكراني بحبها وانا عمري ما كنت بطيقها و لولا بس فلوسها هي اللي مصبراني عليها

حنين / مش مهم معلش استحمل شويه لحد ما نقدر ننفذ خطتنا ....و اهي اول خطوه بتتنفذ وهي انك هتتجوزها بس انا بقى ليا طلب .

يوسف / يا حبيبتي انتي تطلبي اللي انتي عايزاه قولي عايزه ايه ..

حنين / انا عايزاك تكتب عليا وتتجوزني انا الاول عشان ابقى انا مراتك الاولى مش هي

انا مش هقبل ابدا ان اكون زوجه تانيه ليك

يوسف / وهي هتفرق يعني يا حنين المهم ان انتي تكوني مراتي ومعايا ..

حنين / لا معلش هي هتفرق بالنسبه لي انا عايزاك تكتب عليا انا الاول ..

يوسف وافق  .. كان قاعد في عربيته ماسك تليفونه وبيطلب رقم ابوه

يوسف / بابا بقولك ايه انا مسافر يومين كده مع اصحابي ..

.......

حسام / ليه يا يوسف هو مش احنا اتفقنا ان انت هتيجي في الشركه وتشتغل زيك زي اي حد .

.........

يوسف / ايوه طبعا عارف بس الشباب طالعين يومين كده اسكندريه وانا عايز اطلع معاهم وبعدين دي اخر مره هعرف اطلع معاهم براحتي بعد كده هبقى مشغول بالشغل والجواز

حسام وافق ويوسف اخد حنين وفعلا كتبوا الكتاب .. كان يوسف فرحان بيها جدا وبيحبها .. قعدوا في في كافيه كبير يتكلموا بيهزروا ..

حنين / بقولك ايه هو انت كلمت الهانم اللي عندكم دي ..

يوسف / يا بنتي كبري دماغك منها بقى وافتكري اي حاجه عدله هو انا ناقص السهوكه بتاعتها دي ...

حنين / معلش كلمها وطمنها عليك .. حسسها انك مهتم بيها احسن تشك ولا حاجة..

يوسف اخد التليفون وكلمها فعلا وبعد شويه رجع قعد مع حنين تاني

...............

اما عند علياء كانت قاعده في اوضتها وسندس صاحبتها قاعده معاها ..

علياء / سندس هو انتي مش ناويه تفكي التكشيره دي بقى انا مش عارفه انتي ليه مش فرحانه ليا زي اي صاحبه ما بتفرح لصاحبتها ..

سندس ابتسمت بسخريه / قصدك تقولي اني غيرانه منك مش كده لا يا علياء انا مش غيرانه ولا عمري هغير منك عارفه ليه لان الجوازه اللي هتتجوزيها تخليني ازعل عليكي مش اغير خالص ..

علياء بعصبيه / هو في ايه بقى على فكره يوسف مش وحش اوي كده هو بس ممكن يكون طايش شويه .

سندس / بذمتك انتي شايفه ان يوسف مجرد واحد طايش طب انتي عارفه هو فين دلوقتي ولا ضامنه يكون مع مين ..

علياء / اه طبعا يوسف مع اصحابه في اسكندريه وبعدين مستحيل يكون بيكدب ده كلمني وطمني عليه بنفسه

سندس / لا كتر خيره يا علياء عشان خاطري فكري في الموضوع تاني والله يوسف مش هو الشخص اللي يناسبك ..

علياء / انا فكرت وقررت وانا بحب يوسف وهو بيحبني لو سمحتي يا سندس لو مش هتكوني معايا وتفرحي لي يبقى بلاش تكوني موجوده احسن ..

سندس بصيتلها بغضب واخذت شنطتها ومشيت .

اما عند سميه كانت قاعده في بيتها هتتكلم وجوزها كان قاعد جنبها ..

سميه / انا مش عارفه ازاي يحصل كده يعني ابن حسام هو اللي هيتجوز البنت ويكوشوا على كل حاجه .

ياسر / انا ياما قلتلك لازم تتصرفي وتوقفي الموضوع ده عند حده مش تسكتي وخلاص ..

..........

سميه / يعني كنت هعمل ايه ما انا اتكلمت مع الهانم وهي اللي رفضت اسمع انا لازم افركش الجوازه دي باي شكل مش هسمح ابدا انها تتجوزه ..

ياسر / خلاص يا اختي خلصت اصلها ...

ياسر سابها نزل وسميه فضلت قاعده في مكانها بتغلي من جواها بعدين اخدت شنطتها ونزلت راحت على الشركه كان حسام موجود هناك .

سميه / بقولك ايه يا حسام ..... النظام ده مش نافعني انا حاسه ان في لعب بيحصل من ورايا ..

حسام / لعب ايه ما انتي بتشوفي كل ورقه بنفسك .

سميه / مفيش الكلام ده انا ما بشوفش حاجه وهرفع بقى قضيه عشان اعرف كل الفلوس بتاعه السنين اللي فاتت دي كلها راحت فين والضرايب كمان بتدفع في ميعادها ولا لا..

حسام / انتي اتجننتي ولا ايه عايزه تقلبي عليا الضرايب انتي عايزه ايه بالظبط يا سميه ..

سميه / 5 مليون جنيه يا اما اقلب الدنيا دي كلها عليكم

حسام /  انتي اكيد جرالك حاجة 5 مليون جنيه ايه اللي عايزاهم حرام عليكي ده مال يتيمه .

سميه / ما خلاص يا اخويا ما بقتش يتيمه كبرت اهي وهتتجوز ابنك وهتاخدوا كل حاجه بس انا بقى مش هسمحلكم .

.

.

.

.

و يا تديني الفلوس يا هرفع قضيه وحلني بقى عقبال ما الهانم تعرف تاخد نصيبها اصلا .