رواية ساقي الود الفصل الخامس 5 كامل | بقلم هاله ال هاشم

تم تحديث الفصل بتاريخ 23 فبراير 2026



" قُلْ للمَليحَةِ في الخِمارِ الأسودِ

‏ماذا فَعَلتِ بِزاهِدٍ مُتَعبِّدِ

‏قَد كان شَمَّرَ للصلاةِ إزارَهُ

‏حَتى قَعَدتِ لَه بِبابِ المَسجدِ

‏رُدِّي عَلَيهِ صَلاتَهُ وصيامَهُ

‏لا تَقتُليهِ بِحَقِّ دِينِ مُحَمَّدِ

مسكين الدارمي

___ قبل مدة زمنية ___

ود ::

اباوع عليها فرحانه ، عفست غراضي عفس ما خلت نفنوف ما گدرته و لا حذاء ما لبسته و لا مكياج ما لغمطت وجهها بي ، ايدي على خدي مبتسمة و مرتاحة لوجودها ، لحدما حسيت على نفسي و على مشاعري الي أنجرفت ويا هذهِ الطفلة ، اجذب لو اكول ما حبيتها و تعلقت بيها و اجذب لو اكول عندي نية حقيقية بإذيتها ، بس اني مجبورة مثل المشى بطريق ما منه رجعه.

بهاي الفترة بنين جانت يوميا تجيني ، اغسل الها اغديها و ادرسها و الباقي من الوقت نلعب سوه ، نبدل و نمكيج و نسوي حلويات و ناكل الا ان تتعب و تنام و يجي بالليل ياخذها مرات يجيب سميره وياه .

نشئت ما بيني و بين سميره صداقة حلوة ، و هي سوالفها حلوه و كدرت الاحظ اهتمامها بعزيز و اخباره بالاونه الاخيرة و عرفتها معجبه بي لكن الي صدمني عرفت عزيز مرقمها من ورا ظهري و متعرف عليها بيومها طيحت حظه و هددته يبتعد عنها و ضل يتساخف و يلاهدني ويتهمني بالغيرة منها ، ما لكيت طريقة الا انصحها بصورة غير مباشرة و اوضحلها واحد مثل عزيز ما يفيدها بس ما عجبها كلامي .

صافنة ، افكر و قاطع تفكيري سؤالها

بنين :: انه كلش احبنج ست انتي ليش ما صيرين امي

الصراحة ما تفاجئت من سؤالها ، جاوبتها

-هممم الامهات و الابناء لازم يعيشون سوه

بنين :: چا تعالي كعدي يمنا و الله حوشنا شكده ، تعالي صيري امي حبوبة

- ما يصير اعيش وياكم يا عمري ، اهلي ما يرضون

بنين :: انه اكل لعمو عزيز ، هو يحبني و هسه يرضى

- ياعمري ، هذا الكلام ما يصير بابا اذا يسمعه يزعل منج

بنين :: ابوي يحبني ما يزعل مني و يحبج انتي همين

اتسعت عيوني متفاجئه و رحت اسألها بغبطة :

- شلون يعني يحبني ؟

بنين :: چا مو هو كل نوبه ينشدني عنج ، چثير يحبچ والله

- هممم احجيلي ، شيكلج ابوج عني ؟

باوعتلي مضيقْة عيونها مثل الجاي يفكر بالكلام ، همست و هي تلعب بچفوف ايديه

بنين :: ينشد على عافيتج و علومج بس مرات من اظلن اسولف بيچ يحكر بيه و يزاعلني.

بعبوس تساءلت :

-يحكر بيچ ، ليش ؟

بنين :: يگول لا توصفين البنات جدامي

- صفنت شويه بكلامها و مثل الاجته كفخة ادراك ، و تخيلت شلون توصفني گدامه لا و احتمال مطلعتلي لقب حالي حال سمرة ام ط*** و حليمه ام براطم و سمية ام الكمل

ضربت خدي ، عزه العزاني هسه شلون اعرف شكالتله فكرت اسألها وخفت افتح على روحي باب

غلست و قشمرت نفسي و اعتبرته كلام عابر من طفلة ما تفتهم شي و هم اخذت عهد على نفسي اكون حذرة كدامها بكل تصرفاتي .

لكن تمسكت بأمل جمله ( ابوي يحبج و يسألني عنج ) وبمرور الوقت و الصدف الي اني اصنعها حتى التقي بي و اسولف وياه برهنت كلام بنين و اكتشفت هالشي من لمعة عيونه من يعاين الي و نبرة صوته من يحاجيني مو نفس الشخص الحدي الي التقيته اول مرة و لا صاحب الجمل المختصرة ، صار يخلق اي فرصة للحديث و بمرة من المرات جابلي نبته اسمها دم العاشق ، هو يعشقها و اني اكرهها لان لونها القاني يصحي بيه جروح جنت ناسيتها .

بيومها كالي هذهِ عربون امتنان و شكر لان مهتمة ببنين و لان مستواها النفسي و الدراسي تحسن بنسبة ملحوظة بس جان خايف من تعلقها بيه ، خاف لا اروح بيوم بحال سبيلي و بنته تنهار .

عرفت عنه معلومات جنت اعرفها مسبقاً، مثلاً دراسته المتأخرة ببغداد ، حبه ومساعدته للناس و تضحيته العظيمة لتبني بنت اخوه .

غَيث اخوه التوأم و الجان أَكبر منه بدقائق بس ، توفى مع زوجته بحادث سير على احد طرق المحافظة الخارجية تاركين خلفهم طفله ما يتجاوز عمرها سَنة ( بنين )

منها عرفت سبب عزوفه عن الزواج خوفاً على بنين ، لاسيما و عدها مرض عصبي يخليها طفلة صعبة المراس و مو اي مرة تتحملها و بالرغم من محاولات البدوية الحثيثة حتى تزوجه احلام بنت عمه و اخت ( اماني ) ام بنين المرحومة الا انه رفض رفض قاطع مبرراً بأنه احلام مو الام المثالية لبنين.

و بيوم من الايام دخلت للمشتل مالته على اساس اشتري زرعاية و النية جنت رايده اصنع لقاء بيناتنا عسى و لعل يعترف بمشاعره الي من فتره ديلمحلي بيها .

جان كاعد يبدل السنادين و يديرلهن تراب جديد مجان منتبه اليه سمعته ينشد قصيدة لباسم الكربلائي :

(( نذرت الحب لابو اليمه حياتي

شفت حبه اليحقق امنياتي

وأكول بحب الحسين

قليلة دمعة العين

شفت حبه اليحقق امنياتي ))

نبرة صوته و الطريقة الي يدندن بيها خلّت جلدي يقشعر بلا شعور مني صحت : الله ...

هو التفت و تفاجئ .. رأساً وكف و نفض ايده ، ابتسم محرج و صاح :

غياث :: ولا حَسيت بيج من دخلّتي .

ابتسمت و كتله :

-مثل الافاعي من تزحف لمكان بسكوت.

فتح عينه و دحض كلامي ممازح

غياث :: اذا انتي افعى ، چا ربحة شنهي ؟

ضحكت ضامه شفايفي جوه اصابع ايديه

غياث :: ياويل گلبه ..

ثولتها و تساءلت :

-منو ؟

غياث :: واحد تايب من زمان وينه و وين العشگ

رجعت استغبيت و همست :

- احسّني ما افهم كلامك مرات

اقترب و نظراته ترمقني بمكر

غياث :: اهيسج تفهمين .. بس ما حابه تعترفين .

احسّ صخنت مادري شبيه و قررت أغير الموضوع ،

- حبيت القصيدة الچنت تنشدها قبل شوية

غياث :: اوو من اروع ما كتب سيد سعيد الصافي الرميثي

ابتسمت و همست :

- لا ان شاء الله ماكو توهان .

غياث :: تهت بعد و ماعاد اندل دربي !

بلعت ريكي و اشحت بعيوني عنه احاول اتهرب من اعترافه بس الواضح لا مفر .

تمشيت بخفه وضليت اتفرج عالزرعات و اسأل عن اسمائهن و هو يمشي بخطوات رزنه وراي ، جان يجاوبني و عيونه تتجول بكل سنتيم بوجهي ، عنده عيون تحجي و تبحر بأعماق روحك نظرته مو شهوانية بس عميقة و دافيه .

اكو ناس تسولف وياك و عيونهم بغير مكان و اكو يسولف و عيونه تحتضنك .

وكع نظري على زرعاية مدنفشه و كلش حلوه ، همست :

-حلوة هذهِ

غياث :: هاي يسمونها دمعة الطفل

- صدك .. كلش حبيتها

-وانه هم احبنها ، تذكرني بـ بنونه .

ابتسمت ..

- الله يبعد عنها الدموع ، بنونه حساسة كلش ديربالك عليها .

غياث :: روحي من الدنيا ، انه ناذر عمري لأجلها و كون الله يطول بعمري و اشوفنها عروس .

ابتسمت و اعقبت عفوياً

-مو لمن ابوها يتزوج بالاول ؟

- جتني لحظة ادراك بالجفصة الچُفصتها و بكلبي اسب بروحي ، قاطعني بلهفة

غياث :: ود أريدن اعترفلج بشي؟

- احسّ خدودي صخنت ، و تسارعت دگات گلبي ، حفلة مشاعر جوه صدري لا الها اسم و لا الها تفسير .

حطيت عيني بعيونه و أمطرني بسيل من الاعترافات

غَياث :: يا نظرتج غلفت روحي و دوهنت گلبي الرچيچ

-ارتجفن اوصالي ، و أَحسّ كل شي خَبيث أنسّل مني و وكفت گدامه ، مثل الحقيقة خالية من اي اكاذيب .

استرسل بنبره هادئة

غياث :: تصدگين حَبيتج و أريد أحبچ اكثر بعد

ارتبكت و اتطشّرت و تدهورت اوضاعي ، مرة ادنك مرة اكح مرة اندعي احد يفوت و يقطع الحديث و من شفت روحي غرگت ما لگيت حل غير اني اتهرب ، همست :

- غَياث آااني ...

غَياث :: انه ما اريدن جواب هسه ، و أعرف يمكن غلط مني حرجتج بلحظة ماهي مناسبة بس انه هيچ اجابل المعارك مجابل و ادخل بنصها

- تعتبرني معركة من معاركك ؟

غياث :: گلبي يكلي انتِ اصعبهن أنتِ بس راح اظفر بيج

مر الوقت و اني كاعده بس بجسمي يمهم ، فكري مشغول يم ذاك الماخذ كل تفكيري ، صاحوا علينا نلبس شي على راسنه لان العريس يريد يحنيها بنفسه ، حطيت شال اسود بأهمال على راسي ، لحظات و دخلوا العريس وامه و خواته و كم وحدة من حبايبهم وراهم دخلت سمره ، حنوها وسط الهلاهل و الهوسات ، هارون فرحته ما ينطيها لاحد جان متأنق بدشداشة بيضة على اخر حبة و عباة و غترة وعكال ، محرج من عدنا بس يبوك النظرات مباوك الها ، اعرف بينهم قصة حب قوية و الحمدلله تكللت بالزواج ، حسيت لازم اخذلهم صورة سوية و تضل ذكرى حلوة عندي في حال خسرت هاي الناس بسبب الحقيقة ، شلت عيني صدفه و لمحته بالباب ما دخل بس واكف بعيد و يباوع الي بنظرات معاتبه .

اعرف حضوره ويا هارون لان يعتبر زينب اخته و هو الي رباها.

رفعلي حاجبه بتساؤل بمعنى شكو ؟

تهربت بعيوني رأساً بس أَحسه بعده يباوعلي ، توترت و أَشرت لسعادة و كفاية حتى نروح ، اجتني كفاية كالت ننتظر بينما تتصل على فخري حتى يجي ياخذنا .

هزيت راسي و طلعت من الصاله ما اريد اضل وياه بنفس المكان ، حسيت بشيء حار نزل على حلكي مديت ايدي تلمسته و عاينت هذا دم ، الظاهر ضغطي صعد ركضت اغسل وجهي جوه المغسلة ، شلت راسي للمراية لكيته وراي

تجاهلته و كأني ما اشوفه ، صاح بصوت قلق :

غياث :: بيج شي ؟ شتهيسين ؟

زفرت انفاسي و جاوبت بقلة صبر

- ما بيه و معليك و روح من وجهي

غياث :: انتِ بديرة تحكمها العادات و التقاليد ، ابو المثل يكول اچل ما يعجبك و البس ما يعجب الناس .

التفتت اله و عيوني ترمقه بنظرات لاهبة

- ما سامعه بهذا المثل بس سامعه بغير مثل

غياث :: اطربينا خن نسمع

- يكولون كل لشه تتعلك من كراعها !

ابتسم و ضم ابتسامته و حجه بخفوت :

غياث :: خيعونهم كون يعلگونج من شعفتج

- فكيت عيوني بكل وسعها ، فرقت شفايفي ردت اردحله بس قاطعنا صوت رنَّة تلفونه ، ردّ عالمكالمة و عيونه مثبتها عليه لحظات و تبدل حاله فدمرة الحواجب انعكدن و الوجه انعفس يحجي بأنفعال :

غياث :: زلام الدعلج .. عفيه بالسباع سلبتوهم ، يعني انهزموا ؟ سهلة وين يرحون اي هارون وياي ..

- حتى ما التفت عليه .. مشى بسرعة و اتوقع اخذ هارون وياه ، بقيت واكفه افكر بكلمة : سلبتوهم شنو يعني ؟ و منو هذا الدعلج ؟

فزيت على خطوات كفاية ، اجت تباوعلي بعتب

وكفت يمي تشاورني :

كفاية :: شعندج وياه ؟

هزيت راسي :

-ماعندي

كفاية :: لو ادري برفيجتج عدها علاقه بيهم احش ريولي و لا افوت لهالمچان .

-لا تسوينها قصه ، و صاحبتي مالها دخل بي و ماعندي شي وياه

كفاية :: ود ، هودي و استچني ابوج يذبحج و حك من رفع السماء لو يحطج و يزوجج لواحد من ولد عمج .

كفاية :: نرجع .. نرجع بس متانين خنجر تايجينا

- ليش فخري وينه ، عرس هو اللاخ ؟

ضحكت و جاوبت

كفاية :: لا بس عنده شغل ويا الحجي ..

- ماشي ننتظر ، شورانا

لحظات و اجن نسوان ثنين ساندات سعدية فوتنها لغرفتها ، عيونها ترمقني بنظرات عتب ، بعدما دخلوها ، طلعن و وحدة منهن صاحتني

-الحجية تريدج بحجرتها ..

دنكت راسي و مشيت متهربه من نظرات كفاية ..

فتت و سديت الباب ورايه لكيتها كاعده و سانده ظهرها على مخاد ثنين ، اشرتلي اجي اكعد يمها ، كعدت و افرك ايد بأيد ما مستعدة للمواجهة

سعدية :: شيلي راسج ، المثلج ما تستحي

باوعتلها بصدمة و بلحظة تجمعت الدموع بعيني

سعدية :: أمنا بيج و حطيناج بنصنا كل هالمدة ، اثاريج حَية ركطة كلچ دغش و عندج الف ملعوب براسج

- انجبرت ادخلكم بلعبتي بس الغرض مو أَذيتكم يشهد الله ما جانت نيتي اذيتكم اني عدوي واحد و وشسوي اذا جان عدوي بنصكم ؟

سعدية :: عدو ، على غياث المعدّل تكليلي عدو ، لا يالغبره ولچ حتى اليهودي ما يعاديه

- مغشوشين بي انتم ، هذا قاتل و قت.....

انتفضت من مكاني و وكفت گدامها اتراجف ، صحت :

-لا تجننوني ، اني بعيني شفته قابل اتبلى عليه

سعدية :: ما جننّاج انت الجنانوة كلها متربعة براسج المجلمد يالمطروگه ، و لا وين اكو مرة متعلمة و سنعة تكول على غياث چاتل

هزيت راسي و عيوني تصب ، حجيت بقسوة وياها :

-انتي الموفاهمة حاجة ، جاي اكلج بعيني شفته و بأذني سمعتهم شلون يتآمرون و سووها قضية قتل غير متعمد لان يدرون بخالي سلام يوديهم ورا الشمس ، استغلوا مرضي و صدمتي و نفذوا خططهم .

تجمع الدمع بعيونها و هزت راسها بأسف ، دنگت تلعب بسبحتها حتى تسيطر على رجفه ايديها ، همست :

سعدية :: مت عيني عليك يالمظلوم طحت نفس طيحة ابوك ، شالت راسها و بعيونها كومة اسرار حجت بتعب :

مو كل الحجي لزوم تعرفينه ، اكو شغلات يا بنيتي ازينلها تنضم ، اسمعي مني و لا تأذين رويحتج و تأذين زلمة ماله كل صوج تالي الندم مايفيد و لا يرجع الراح.

غياث مانه چاتل ، و السالفه البراسج موش صحيحة ، جنتي ياهلة ما تعلمين بالصار .

هزيت راسي برفض

- انه لازم اطلع منا ، لان راح تخبليني بكلامج دا اكلج شفته و سمعت حسه ، و شفت كل المؤآمرة ، تحبين غياث حقج ، وليدج و ربى بحضنج بس كلمة الحق باجر عكبه تتحاسبين عليها كدام ربج

عفتها و مشيت بلا ما اخليها تحجي كلمة زايده ، طلعت لكيت كفاية تنتظرني و عيونها معلّكه عالباب بقلق :

كفاية :: شرادت منج سعدية ، شكالتلج ؟

كفاية :: لا تسمعين منهم شي يا وده ، انه لو ادري بهذا المجرم اله علاقه بيهم فلا اجيبنج لهنا .

لزمتها من اكتافها و حجيت بثقة :

- و دريتي هسه و ممنوع تحجين شي للحجي و باجر نجي بزفتهم و اذا و صلت حجايه لابويه لهنا و انتهت وياج كفاية

هزت راسها بأسف و همست :

كفاية :: ولچ شناوية ، وين تردين توصلين ودة ؟

-ميخصج ..

لحظات و وصل خنجر احد زلام ابويه ، تسالمت ويه زينب و وعدتها اجي بزفتها ، لبسنا عبينا و طلعنا جان ولد شاب صغير مرتب لابس كجول عبالك من شباب بغداد

صعدنا وياه و انطلق يودينا للبيت لكن لاحظنا بسرعة هذا مو طريقنا ، انعطف بغير طريق عاينت اله كفاية و هو عاين الها و كأنهم يسولفون بالنظرات اومأت براسها بلا ما تنطق ، صاحت خالتي من يمها :

سعاد :: ابني وين مودينا ، ترى طريقنا مو منا

باوعلنه بنظرة خاطفة بالمراية الامامية و ما رد علينا ، عقجت حواجبي مزعوجة ، صحت :

-يولد ، مو دا نحاجيك ؟ .. صحت لكفاية : ما تحجون وين مودينا ،

فرت راسها كفاية علينا و همست :

كفاية :: البيت مشغول ، ابوج عنده ضيوف و ما يريدهم يشوفونج

صرخت بمرارة

- لشوكت سليمان يبقى مستعر مني ، لو كاتلني غياث بذيج الليلة و لا عايشه عمري كله بشعور الرفض من يمه .

هزت راسها بأسف و ما ردت عليه و هذا اكثر شي يقتلني هنا ، الوحيدة الي تحجي اني و هم صامتين حتى من احاول استفزهم ما يحجون و اموت اني بقهرتي ..

وصلنه لمنطقة ثانية تبعد عن منطقتنا و منطقة اهل غَياث ، و احسها اهدء و بيوتها متفاوته بين الكبيرة و الصغيرة ، نزلنه و ضربت بخشومنا ريحة الزرع و الماي و الجو العذب بس احسّ رجليه صارن خيوط من گد التعب ، دخلنا للبيت طارمة كبيرة و بيها مدخلين دخلنا من المطبخ المطل عالهول الداخلي جان مؤثث بأثاث بسيط بس ما مبين مسكون ، و لا منظف صناديك فارغة و مشمرة غرف مقفولة بقفل چبير

اني و سعادة نعاين بعيون مفتوحة مستغربين بس كفاية حسيتها متعودة ، شمرت رداناتها و بلشت تلم الصناديك و الزعابيل ، خنجر مدري شتهامس وياها و عافنه و راح و بقينا لوحدنا ، شمرت روحي عالقنفة الي ريحتها جانت غريبة ، الوضعية كلها مدري شلونها بينت على وجوهنا الضوجة .

كفاية :: بس يرحون خطارنا نرجع .

كعدنا ثلاثتنا وحده صافنه بوجه اللخ ، فتحت الموضوع عمتي بلا مقدمات

كفاية :: شنهي قصتج ، شناوية تسووين ؟

حجيت بلا ما اباوع الها

-ماعندي شي ، اخوج هو المچلب بيه ميخليني ارجع لبغداد

كفاية :: هساع عرفت سليمان حگه من چلب بيج ما يخليج ترجعين ، اظن جايه تدورين الثار من چتال امج يوده ؟

سعاد :: ميحتاج تدور كتالها ، الي قتل اختي معروف و حر طليق كل هالسنين

صاحت كفاية و عيونها ترسل شرارات لاهبة بأتجاه سعاد :

-بسج عاد بسج لا تدرعمين بحجي ماصخ ، خربتي عگل البت ، سالفه و راحت من سنين و الجاني اخذ جزاءه ، شعدتچن تنبشن بدفاتر عتيجة

كمت وكفت و صرخت بعلو صوتي :

-شلون بالله الجاني اخذ جزاءه ، بالسنتين الخلصهم استجمام بالاصلاحية ؟

هزيت ايدها سعاد و ابتسمت بخبث

كفاية :: استجمام ، خافي ربج، ولج خالج المرحوم كضى بي التوبه جان ياهل لا رحمه و لا رحم عظمه الرچيج ، انطت نظرة غريبة لسعاد و استرسلت :

-الظاهر سعادة خاتون ما سولفتلج كل السالفة

سعادة :: و يطبه حريشي و عساه بالموت لعد اختي شابة و اندفنت بسببهم ، و مكفاكم موتتها زورتو الادلة و شهدتوا زور كدام بنيتها

كفاية :: و لَمن تعرفون كل السالفه شمالكم سكتوا على حكها عشيرة طول بعرض و اخوها بعثي لو فليسات الشيخ يعقوب لجمت حلوككم.

سعادة :: تخسين مو احنا الي نسكت عن ثارنا بس بنيتها جانت مريضه و حجت بعد فوات الاوان

- عيوني تتنقل بيناتهن و هن يتراشقن الكلام و الاتهامات و كل وحدة تحاول تتنصل او تثبت نفسها هي و اهلها الصح ، تناسن وجودي، المي و وجع گلبي ، تناسن حقيقة اني ما خسرت أُم بس لا اني خسرت أم و اب و اهل و طفولة ، خسرت نفسي و برائتي و سلامي و اماني النفسي و عشت كل هاي السنين كائن طفيلي بمكان مو مكانه و لا اهل يتسمون اهل .

اصواتهن صارت تجيني على شكل ضوضاء مدوية فتكت براسي فتك ، فجأة لگيتني اصرخ بعلو صوتي :

-كاااافي، اسكتن

ثنينهن اندارن عليه متفاجأت ..

- ارحمني و اسكتن ، انتي سعادة لا تحجين و تبررين و ارجوج كفاية لا تحاولين تدافعين او تلمعين حقيقة مشوهه ، و لو تحجين منا للصبح ما راح اغير رأيي و لا اتوقف عن الشي المفكرة اسويه ..

كفاية :: شتسوين تچتلين غياث ؟ هه قابل لا تشيلين ايدج تنخب جسمج التفاگه مالته.

- و منو كالج اريد اكتله ؟

عقجت حواجبها و بأستفهام صاحت :

كفاية :: چا شنهي قضيتج ، شتردين من الزلمة

- اريد بنته و اخرب حياته و افضح امه .

ابتسمتلي سعادة برضا اما كفاية حسيت لسانها انشل تباوع مصدومة ، ما گدرت تنطق بحرف واحد.

لحظات و اجه خَنجر مدري شنو وشوش بأذان كفاية و صاحت علينا يلا امشنا نرد لبيتنا

رجعنا و الطريق كله ساكتين الى ان نزلنا گبال قصر سليمان و هالمرة الحراسة مشددة و مكثفة كل زلمة بطول الباب ، دخلت و حسيت روحي داخله لسجن ما شفت ابويه كفاية كالت تعبان ماخذ ابرة سكر و نايم .

حتى فخري ماكو ، رزلت روحي هسه هم بيش كيلو و اسأل عليهم ..

استسلمت للفراش لان جنت حيل تعبانه و باجر عرس زينب و حلفتني اجي رغم هي مجرد زفة يفرونهم الديرة بالسيارات و يودوهم لبيتهم .

بعدني أَغفي و اجاني مسج من رقم غَريب ، گلبي حسّ هذا عزيز ، فتحته و طلع توقعي صحيح

عزيز :: هلو اني عزيز و هذا رقمي الجديد

دكيت عليه بلا تردد و اجاني صوته المستفز :

عزيز :: يا هَيل

- اسده لو شلون ؟

عزيز :: انجبي و كوليلي شلونج مشتاقلج بگد رحمة الله

-زينه على فراكك

عزيز :: لچ غبيه ، آني نعمة اكو وحدة تدفر النعمة بيديها

-حشا نعمة الله هههه

عزيز :: مشتاق لضحكتج لچ زقجة ، اريد اجي اشوفج بس افرغ .

-اي تعال بلكت سليمان يحط چيلة براسك و يخلصني منك

عزيز :: صايرة تحجين مثلهم ام لسين ، اعوفج بعد شهر تكومين تسولفين مثل سمره

صفنت شوية و حَسيت بقهره :

- عوف سمره بحالها عزيز ، لا تعلقها بيك

عزيز :: هي مجاي تعوفني و لا تنسين هي الي تحارشت اول

-سمره انسانه شفافه و واضحة و الظاهر انعجبت بيك و انت جاي تكذب عليها و تمارس عليها دور المعجب اتركها بسبيل حالها ، اخوها اذا حسّ عليك يكتلك و يكتلها بعدين ابن عمها كاتل روحه عليها .

عزيز :: ما تحبه و تحبني

- بس انت ما تحبها

عزيز :: اني احبج انتِ و بس انتي گمر حياتي و كل ذني نجوم ضايعة ..

- و انت تدري اني اموت و لا ابادلك الحب

عزيز :: شلون عايشه بهذا الحقد ؟

- منو كالك عايشه ، اني ميته من زمان و دفنتي مرهونه بثار امي

عزيز :: اعوضج ، و حق الله اعوضج و انسيج كل الضيم الي شفتي بس كولي سامحتك

- روح عزيز ، الي تطلبه صعب ، اريد اروح تعبانه

عزيز :: روحي بس انت وعدتيني لو الي لو ما تتسمين لغيري .. هي طلقة تايهة مو صعب انهيج .

- تصبح على خير عزيز

سديته و سويت الجهاز وضع طيران ، جبان يهددني مايدري المبلل ما يخاف من المطر

ثاني يوم كعدت فايت وكت على لمسات سعاد و هي تندهني ،، فتحت عيوني بصعوبه بعد بيه نعاس بس لازم اكعد ، لاحظت علامات الاستفهام على ملامحها ، هزيت راسي بمعنى شكو ؟

سعاد :: ماكو ، بس داحس اكو شي غريب بالبيت ، ابوج ماكو و لا فخري ؟

- اي و شنو يعني ، ليش محسستني النهار كله كاعدين سوه وياه و دگ مسامر، هو هذا ابوية من يومه مثل الشبح ما ينشاف الا بالكوابيس

سعاد:: حسج يمعودة ، والله حقه ابوج يحجي على تربيتنا و الا اكو بنية متربية تكول على ابوها شبح و كابوس

باوعتلها و بداخلي الف سؤال ، اتمنى اعرف جوابه

سعاد :: ليش تباوعين هيج ؟ گولي شعندج .

- اسألج سؤال و احلفج بروح خالي سلام تجاوبيني

جاوبتني بفضول :

سعاد:: اسألي ، شكو شعندج ؟

- امي خانت ابويه ؟

نشغت و لطمت على صدرها ، صاحت :

- لا انتِ اكيد تسودنتي ، جاي تسمعين شتحجين ؟

-بس على كيفج ، بس راسي حيطك بعدما سمعت الي گاله غياث

سعاد :: ليش شكال صخمان انوب ؟

- بيوم الي اجه ابويه ياخذني ، صارت مشادة كلامية و غياث كال امج خاينه و ابوج غدار ، اريد اعرف ليش حجه هيج ؟

باوعتلي بأرتباك و همست بتلعثم :

سعاد :: معلوم قابل شيريد يكلج شي اكيد يحجي هيج حتى يبرر فعلته الناقص .

باوعيلي و سمعيني عدل ، امج اشرف من الشرف نفسه واي كلام او تهمه تسمعينها فكولي هاي حجج حقيرة حتى يبررون فعلتهم .

اباوعلها تحجي بأنفعال و دمها محروك ، نهيت الموضوع :

- خلص .. خلص لا تعصبين ، يله كومي هم ياله نتحضر حتى نروح .

سعاد :: تمام ، و خلي ابالج اني هاليومين لازم ارجع

التفتت عليها و صحت :

-وين راجعه ، توچ جيتي بعدين وين عايفتني لوحدي هنا

سعاد:: الاحد تداومين و ابوج مختفي و كفاية ما اطيقني المن باقية ؟

-كعدت على سريري و حَسيت خرب واهسي ، دنكت و عيوني بالكاع محتارة و ضايعة ، اجت گعدت بسدي و مسحت على ظهري تهون عليه

سعاد :: لا تضوجين و لا تخافين انتِ گدها ، و احجيلج الصراحة جان گلبي كارصني عليج و خايفة بأي لحظة تنكشفين و ما يرحموج بس هسه و دام ابوج خلاج عنده أمنت ، بعد انتِ و شطارتج شلون تدبرين امورج

صفنت ثواني بالفراغ اتذكر كلام غياث البارحة ، همست :

-يحبني

سعاد :: هااه ؟

باوعت الها و صحت :

- غَياث ، يحبني هو كالياها بنفسه البارحة

سعاد :: هممم ، والله شاطرة بكم شهر وكعتي بشباكج

ود :: الحَية من تلدغ بعد !

ضحكت بصوت عالي و صاحت بفخر :

سعاد :: معلوم ، تربيتي ، سكتت شوية نوب باوعتلي بعيون تلمع من حقدها و استرسلت :

هسه راويهم الامهات شتجيب ، بعد شتسوين بي سوي بنته امه اخته عيشيهم العشتيه هاي فرصتج بعد

بلعت ريكي و مدري ليش تذكرت وجه بنته و وجه سمره و گلبي گرصني عليهم ، هزيت راسي بأبتسامة مزيفة حتى اجاريها بالكلام .

نزلت جوه ، جان البيت هاديء من هدوئه تحسه موحش ، و لأول مرة اركز زين بتفاصيله ، بناء التسعينات بجدران مصبوغة مؤخراً و اثاث مبالغ بي و الوانه تخنگ .

بيتي التركته من سنين طويلة ، اخر ذكرى الي بي من توفى جدي عقب وفاة ماما بأشهر و ابويه هملني اهمال كلي و دفعني بأيده للنار تحت ذرائع ضعيفة ( الطب ببغداد احسن منا ) .

تنهدت و تمنيت بوكتها لو املك صوت اخر غير صوتي الي فقدته و اگله اني مو بعازة النطق بگد ما معتازة حضنك ، ابويه ، سندي الوحيد بعد ماما ليش انطيتني الهم وليش بأيدك دفعتلهم ثمن انتهاك و سلب برائتي

قاطع شرودي دخول كفايه ، توها جايه من السوك وجهها صاير احمر طماطة و تحاول تلتقط انفاسها صاحتلي و ابتسمت :

كفاية :: صح النوم خاتون ، الناس اتغدت و انت و خالتج نايمات

جتفت ايديه و هتفت :

-وينها الناس و وينه الغده ، البيت يصوصي و انتِ هاي دخلتج من السوك .

باوعتلي بنصف عين و كالت

كفاية :: يمه .. يمه مو لسان ، چن برنو ، روحي للمطبخ و شوفي الغده مرچبته من الصبح و الخبز حار و روحتي للسوك خاطر اجيبن صوغة لسعادة خاف تمشي لهلها .

مشيت بأتجاهها بفضول طفلة ، مدتلي ايدها بعلاكه ، اخذتها و كعدت اشوف شبيها ، طلعت نفنوف مال بيت كلش حلو و حفايات خفيفة للبيت و شغلات مال شعر و فستان مال مناسبة كيبور مبطن اسود مقفل ساك عدل بأكتاف مرفوعة أَنيق بشكل .

عيوني لمعن بفرح ، باوعتلها و صحت :

-اشكرج كلش هواية و بصراحة صدمتيني بذوقج يجنن .

جرتلها كلاص مي چفته وحدة و كالت :

كفاية :: شعبالج خية ، جايه من وره الهوش ، ترى صح مكملت علامي بس اعرفن اقره و اكتب و اتنوع للنت شبي مابي .

ابتسمت الها .. ودنكت الم الغراض و ارجعهم بالكيس .

ضحكت و هتفت :

كفاية :: عوينة ابوي ، مو ضحكة فلك ، اي دضحكي ولچ يمه لا تخلين الغل ياكل شبابج و جمالج

تلاشت ابتسامتي بسرعة كمت من يمها و سويت روحي مشغوله بالغراض ، شافتني هي هم كامت ، لزمتني و همست :

كفاية :: عذريني ، ما كصدي اذكرج انه بس ..

قاطعتها : راح اروح اتغده و انتٍ حضري نفسج نروح للعرس

كفاية :: انه رجلي ما تخطي لهذاك الصوب

- لشوكت اضل اصيح زينب مالها علاقة بيهم و هارون خلك صاحبه .

كفاية :: چا هي كوه ما اريدن اروح ، اخذي خالتج و روحي و خنيجر يوصلكم

- مثل الجتني لحظة ادراك و حَسيت اكو شي مو طبيعي تسائلت :

-ابويه وين ؟ فخري وين ؟ صاير شي ما اعرفه

جرت حسرة بقلة صبر ، اندارت و حجت بسرعة

كفاية :: ماكو شي بس فخري مريض بالمستشفى و ابوج راحله مبچر

-حسيتها تجذب عليه و حسيتها ضامه شي وحتى بقائها بالبيت وراه قصه ، يله ما استعجل لابد كلشي ينكشف بيوم مثل ما انكشفت لعبتي

تغديت و تجهزنا، لبست الفستان الجابته الي كفاية ، ماخليت بوجهي غير الكحل الاسود و الروج الاحمر القاني و سعادة ضفرتلي شعري ضفيرة هندية و ذَبيت على راسي شال اسود بأهمال .

اجانه خنجر اخذنا و ودانا لبيت زينب بأعتبار احنه من حبايب العروس ، دخلت لكيناها جاهزة ، طالعة تخبل بفستان عرس و حجاب مثل الملاك .

لمعت عيوني بسعادة متحملت اخذتها بحضني بلا ما ابوسها و أَخرب مكياجها .

اما سعدية كانت متكترة و على وجهها علامات حزن مخلوط بفرح ، من ناحية سعيدة لان حفيدتها طاحت بخوش رجال و راح تأمن عليها و من ناحية شايله هَم من لوعة فراقها .

اعترف انقهرت على سعدية و تمنيت لو اروح اباركلها و اخفف عنها لكن احنا ثنينه متخذات موقف من بعض

مشى الوقت بسرعة و أَجت سيارات الزفة سدت الشارع الي أَعرفه هارون وحيد امه ابوه جان يشتغل بكاع الشيخ يعقوب و تمرض و مات عافه هو الجبير و عنده اختين صغار بس غَياث و اهله معتبرينه أَخوهم و عضيدهم و الشيخ كلش يعزه على معزه ابوه المرحوم .

محسيت الا و زينب ترصّ ايدي حيل و تهمس بأذني

زينب :: خايفة

ابتسمت و شاورتها :

- خل يولن ، ولچ غير كتلتي روحج عليه

كرصتني و همست :

زينب :: امداج امده فرگج حسبالي تهونين عليه

-هو بس واحد بس اليعرف يهون عليج و يطبطب على جروحج و هسه راح يفوت يكبعج و ياخذج

لحظات و دخلن ام العريس و خواته الصغار و وياهم سَمرة و بدن الهوسات و الهلاهل و سمرة تغمزلي بمكر و تهوس :

سمره :: خويه و شلون يموت بالطلقة الصغيرونه

ضحكت و دنكت راسي خجلانه و محسينا الى على دخلة غياث فات لوحده ، متأنق ابن اللذين على آخر حبة مدري منين يجيب هاي الدشاديش المفصله عليه تفصال و اللون النيلي ضارب على لون بشرته و منسق الشماغ بلون اوف وايت و جناد حني و هالمرة شايل سلاح .

اجه وكف بسد زينب باوعتله هي وطفرت من عينها دَمعه .. نصى و همس يم راسها :

غياث :: افااا .. تبچين و انه اخوج لا تخليني هسه ازحلك هارون و ارده لهله

شالت راسها بسرعة و همست :

زينب :: چا هم منهو اهله غير انتم و انه احمد ربي عبني عشت و راح اضل عايشه بسدكم ياخويه .

ابتسم بحنية و كاللها :

غياث :: بالمبارك خويه

شال راسه و عينه صدت بعيني الجاي تراقبه و لو عيونه الها لسان جان حجت لوم و عتب و خذلان ، اشحت بنظري بعيد عنه و لگيت سعادة ترمقني بنظرات تحذيرية

هزيتلها راسي بمعنى : شكو ؟

هزت ايدها بسخريه و دارت وجهها

لحظات و دخلوا الزفة هارون و تعالت اصوات الهوسات و الاهازيج :

-هاي الرادها و هاي التمناها بنت الشيخ لابن الشيخ جبناها

- اخونا خوش اخو يستاهل الهوسه

و مدري ليش وسط هذا الزحام كله عيوني تدور عليه سلمها لهارون مثل الابو و اختفى و مدري ليش أحس انزعجت من اهتمامي بي و ضاك خلكي .

صعدوا العروس لسيارة العرسان ، جان كاعد يسوقها اواب ابن عم غياث و النسوان تتسابق على السيارات ، لثواني تساءلت بكلبي اني شجاي اسوي ؟

معقوله اريد اصعد وياهم و اروح برجلي لبيتهم و اشوف البدوية بعد كل هاي السنين ؟

لهسه شكلها و كلماتها ترنّ بأذني و آني طفلة ، يا ترى راح تعرفني لو شافتني لو نستني و نست وعدها اليه .

مَحسيت الا على سَمره و هي تندسني :

سمره :: راح تضلّين موجفه مثل الناطور ، امشينا الزفه راح تمشي

مثل الي اجتني لحظة ادراك .. همست بتلعثم :

-هااه ، لااا شنو

تباوعلي سميره بأستغراب مدت جف ايدها و تلمست گصتي و صاحت :

سمره :: لا ما مصخنه ، لچن شبيج تهذين ، امشينا خية الصفنه مو الج

قلصت عيوني عليها و رديت :

-لعد المن الج !

سميره :: انه الچ يا بريبيجه هاي عليه تكولين زمال

ضحكت بصوت و صحت :

- اني كلت زمال شوكت ؟

كرصتني و هي تتلفت :

سمره :: حسج كصري يمدهوره ، و امشينا ترى خالتج صعدت جدامنا و اخوي خلگه صغير هسه يعوفنا و يروح .

جرتني من ايدي و اني مصدومة بخالتي و صلافتها شلون تسرسحت كدامي و صعدت ويا غياث ولا چنها الظاهر متحمسه لشوفه البدويه اكثر مني .

و بلحظة غمرني الندم و الرَهبة من لقائها جَريت ايدي من سمره و صحت :

-لا اني تعذروني ، اريد ارجع لبيتنا

سميره :: يا فلك كون ، وين راجعة و لج غير زنيبة تزعل منج و علي ، البنية مالها احد غيرنا انه وياج و لزوم وجودنا وياها بهيج ليلة .

عين عليها و عين على ذاك الكاعد يناطر بالسيارة و يرمقني بنظرات توعد.

المكان بدأ يفرغ و صارت تمشي السيارات مالكيت حل غير اني امشي وياها لسيارة غياث .

صعدنا و مشت السيارة سمره صاعده يمه ، شكلت الاواكس على جهازها و بلشت تطلع اغاني مال اعراس خزرها هو و همس :

غياث :: استچني سمره ، منا شارع

سميرة :: ياا وانه شمسويه بايكه سايكه ، جاي اهز هي صفكه يا خوية ، اندارت الي و لخالتي و صاحت :

- ما تصفكن شمالچن ماخذيجن للاعدام ؟

اني و خالتي وحدة تعاين للخ مخلوسات و بنفس الوقت كاتلنا الفضول لشوفة البدوية بعد كل هاي السنين .

قاطع صفنتي صوت الرمي ، كلها طلعت سلاحها و صارت ترمي بالجو ، صَميت اذاني بحركة لا ارادية ، حضنتني خالتي و همست :

سعاد :: اسم الله ماما .

شلت عيني و صدت بعينه بمراية السيارة رجعت دنكت .

سمره :: شمالك يخوي ما رميت ، اعلّكها ويه الشباب ؟

- باوعلي و همس بخفوت :

- يخافون ..

ضحكت سمرة و هتفت بلهجة ماكرة

سمره :: يوم الالك خويه و ازفك للي ببالي .

همس بنبره غليضة :

غياث :: آمين

راحت تهوس و تصفگ

:: و الله لعوف المومنه و بعرسك اصير مسودنه

- بگلبي اتوعد لسمرة الناصبة عليه، خوش سوتني ميز.

وصلنا اخيراً و كلما اتقرب خطوة للمكان ، صدري ينقبض اكثر ، خوف على ارتباك على ترقب هواي مشاعر خالجتني .

المنطقة حلوة نسبياً مقارنة بغير مناطق ، الشارع المؤدي الهم حلو تصطف على جانبيه اشجار النخيل هذا غير المساحات الخضرة اليرعى بيها الحلال .

طبكت السيارات امام بيتهم و هاي اول مرة اشوفه

مساحته واسعه و محاوطه بستان چبير متنوع الاشجار ، كفختنه ريحة زرع توه ساكينه و ريحة الجوري و الرازقي تفحفح من كل مكان .

طالع من بيتهم مشتملين صغار ، نزلوا العرسان و أشتغل الرمي ، اني و خالتي خرطنا العافية ، مشينه ويا الناس و هو مشى ورانا و مدري ليش احس عيونه تتبعني .

الناس الكبار المعكله كاعدة بمضيف الشيخ و الشباب مجهزين الهم مقاعد برا و ريحة الاكل الجايه من الطباخين ضربت بخشمي خلّتني اجوع

دخلت العروس جوه و تبعتها النسوان و بضمنهم اني و خالتي الي شاورتني بفضول

سعاد :: هارون مو ابنهم شنو راح يعيش ببيتهم .

همست و حاطه اصابيعي على حلكي حتى يوصلها الصوت بوضوح :

-بس الحفلة يمهم ، شفتي المشتمل الصغير الي بصف البستان ؟

سعاد :: اي ؟

- اي هناك يعيشون ، هارون رابي يمهم من جانوا امه و ابوه يشتغلون هنا و زينب هم بأعتبار سعدية مربية غياث .

سعاد :: يوو دخت ، شنو ذول صايرن عوائل

- ناس الله مفضل عليها و تحب تساعد و هارون وضعه المادي على كده و ماعنده مكان يتزوج بي شكو بيها اذا ساعدوه ؟

لوت شفايفها و هزت ايديها ما راضية ، انتبهت

لروحي هاي شدا اسولف ، شو صرت ادافعلهم .

اباوع لزينب مكعدينها بالكوشة فرحانه و خدودها محمرة بحماس و البنات داير مدايرها يغنن و يركصن على حس الملاية العالكة الاجواء علك .

لهناك و شفتها ، دخلت بهيئتها الفخمة بطولها الفارع و بنيتها الضخمه متألقة بهاشمي اسود مطرز بفصوص من الگلبدون و الخرز متباهية بمجوهراتها الثمينة .

تسلم و ترحب بالنسوان بتعالي ، هي هي نفسها ذيج المرأة الي حصرتني بزاوية قبل 19 سنة و هددتني بقطع لساني لو حجيت الشفته لأحد .

اصابتني رَجفه ، و دبّ بجسمي الرعب و كأنه حجمي بدأ يتضائل و رجعت بالعمر لحد عمر الخمس سنوات ، صگت اسناني و ارتعشن اطرافي ، و قبل لا تتقرب بأتجاهي درت وجهي و جانت النية اتفادى لقائها ، لكن هو صوتها الي ميروح من ذاكرتي استوقفني :

البدوية :: نورتي .. معلمتنه عيني .

و آني خليتهم و أجيت 🖤

و بعد ما عرفنا على جميع الابطال

و شفنا شلون ودّ تسلّلت لحياة غَياث

و استحوذت على قلبه و عقل بنته و صداقة

اخته و اخرها تواجدها ببيته

الفصل السادس من هنا

شكرا لزيارتكم عالم روايات حكايتنا حكاية