مكملش حتى جاه كف طيحه في لرض ويزن يبكي ،.

يهدر ويعيط كي المهبول نقتلهاااااااااااااااااانقتلها نحرقها حيةونحرق لرض لي تمشي عليها ونحرق كلش فهمت نقتلهااااااااااااااااااااا قبل ما ديرها وراح خارج وفي راسه تتعاود كلمة تكون تزوجت غير حل الباب حتى لقاها جاية طبطب.

جابر علاش مراكش تريبوندي عليا قلبي تخطف على يزن قاتلي يما جابر راح يجيب ليزاناليز تاعه.

خلاها وراح ركب وقلع مهدرش معاها كلمة.

دخلت للدار وراحت الكوزينة سمعت عياط ريان ويماه راحت عندهم واشبيكم تعيطوا ،ريان واشبيك خلعتوني شكاين يزن كشما بيه.

حتى بدا يهدر ويعيط مكان والو غير خوك ضربني ضروك على جال مرته لي سمحت فيه وراحت وخلاته كي كان يحارب في خاوته عليها لي رماتله ولده وخلاتهم ضربني على جالها مزاله عاشقها وداير روحه نساها وكارها وهو الهدرة ميقدش يسمعها عليها.

ريان واش هاد الهدرة متنساش لي راك تهدر عليه خوك لكبير ومتنساش شكون نور ومهما صرا تبقا يمات يزن.

واه منسيتش ومننساش تاني بلي راه عايش يتيم وهيا حية خلاته وراها مريض كون كانت هنا كون راه ريح كون غير جا يزن يتيم صح ربي يخلف عليه من جيهة وخدوخرة تيتم والديه حيين يماه لي سمحت فيه وباباه لي ميقدرش ينساها وهامل وراها كون جا ولدي والله نتزوج 100 ونطلڨ 100 على جاله غير يريحلي وخطفه من يدها ويسلم عليه والدمعة في عينيه غادي يريح صاحبي ونلعبوا ماتش كيف كيف متخافش وداه وخرج.

وهيا ريحت شادة راسها وتبكي.

يما واش كاين حمبوك فهموني واش عنده يزن وصح جابر ضرب ريان يمااااااا تعيشي حكولي قلبي مانيش حاسة بيه واش بيكم.

يزن لقاو عنده مرض ولازم يتبرعله خوه ولا خته باش يقدر يريح منه.

ككفاش لا لا ايه حنا نتبرعولو كامل نديرو ليزاناليز بلاك نقدروا نتبرعولو ولا غفران يما غفران كبيرة عليه غير 4 اشهر ايه معليش بنتي تتبرعله ولا لي في كرشي رانا كامل هنا معاه واشبيكم نتوما متشاءمين ياخي كلش عندوا حل.

لازم خوه ولا خته يا طفلة خوه خوه فهمنيي مدابيا كون قدرنا حنا نتبرعولوا ،قالك خوه ولا خته فهمتي وجابر خبر الطبيب بلي معندوش خاوة قاله نقدروا نكالموه بالعلاج بين ما يزيد عنده أخ ولا اخت فهمتي ضروك علاش جابر هبل وهاج علينا قلناله تتزوج على جال ولدك محبش يسمعلنا بصح كي قاله ريان نحوسوا على نور بلاك وسكتت.

بلاااااك واشنوا يما.

بلاك تكون تزوجت وراهي بلحمل.

لا لا يما نور مديرهاش، زعما ديرها يما تكون تزوجت يااااااربي يا يما جابر غادي يدير موصيبة فيها ولا في روحه يااااااااااااااربي تسترنا ياااااااااربي وشدت كرشها وريحت.

واشبيك نوال خلاص ريحي بنتي وجابتلها الما تشرب لباس شوي عليك ووين راهي بنتك وين خليتيها.

خليتها عند عجوزتي بروحي ني راجعة ضروك غير كي تقلقت مقدرتش مقارع كي مرديتوش عليا هبلت جابني.

معليش متقلقيش روحك راكي بلحمل كون كشما يصرالك ولا لي في كرشك لباس عليك.

واش من لباس يا يما كفاش مانتقلقش واش نديروا ضروك غير قوليلي ، الوحيد لي راه ضايع في هاد الحرب يزن مسكين يااااكيتي على كبدي ياربي مفرحش واش يقده يتحمل يا يما مزاله صغير على هاد الهموم.

غير خرج من عندهم راح ديراكت يسوق مش عارف روحه وين رايح مهم حاب يبعد قد ميقدر على واش سمع وقد مبعد على الدار مزالت هاديك الهدرة تتعاود في راسه وهو يزير على الفولو مش قادر يتحمل وقع كلمة بلاك تزوجت على قلبه لااااااالا بنتي مديريهاش بيا علابالي نعرف القلب لي ربيته انا ميديرليش هاك علابالي مديريهاش ونتي تعرفيني نموت كون يفوت عليك خيال راجل غيري صح بعد كامل واش درتي فيا بصح متوصليش ديريها نعرفك وضرب الفولو نقتلك قبل ماديريها يديك القبر قبل ما يديك غيري ويحط يديه عليك ولا يشم ريحتك حتى صونا تلفونه غير ريبوندا عرفها من صوتها وين راكي ضروك.

اوكي راني جاي ريحي تماك وكوبا ودار رايح عندها، شوي ووصل لوحد الجاردا شافها مريحة وتشوف في ذراري يلعبوا وتتبسم راح عندها ديراكت سلام عليكم.

طلعت راسها فيه وتتبسم مدتله يدها وعليكم السلام اااااه نسيت انت متسلمش على النسا وجبدت يدها وريحت وهو ريح مقابلها يشوف بجيهة في الذراري وهيا تشوف فيه وتتأمل في تفاصيله كأنها اول مرة تشوفه لابس سيرفات نوار وكاسكات نوار جاي يهبل اول مرة تشوفه بلا كومبة غاست فيه شحال وهو مش حاط معاها عينيه غير في هادوك الذراري لي يلعبوا.

امممم باينة فيك تحب ذراري ايه تفكرت كفاش راه ولدك كفاش كان إسموا راني نسيت يزن ايه يزن ياعمري اسمه شباب.

حمبوك هدري شاكاين خليني نروح بركاي متتعسلي عليا راني وقيل مخرجك هنا جايبك نتفرج فيك ،وتعرفي مليح بلي نكره واحد يهدرلي على حياتي واش صرا بعد ما رحت انا كفاش وصلولك شكون خبرك بإسمي.

خلاص ضوك نقولك شبيك تتحول هاك بعد ما رحت وصلتني ورقة البيرو تاعي مكتوب فيها (ادا مراكيش حابة تلحقي بخوك اكتبي هنا اسم الضابط لي راكي تعالجي فيه ووين راه وكلش تعرفيه عليه وترميها برا ).

،انا كي قريتها منكذبش عليك قلت هادا انت ولا الشاف تاعك زعما راكم تاستوا فيا ادا.

راح نبيع عليك وادا راني قد كونفيونس باسكو غير نتوما لي تعرفوا بقصة خويا وبلي كان خدام تماك وكفاش مات مخفتش عادي هزيتها وديتها للشاف تاعك قتلوا سوف واش لقيت هو قالي متخافيش راكي تحت حمايتنا واي حاجة توصلك هاك ولا تشكي في كاش واحد ارواحي خبريني طمنت قلت سيبون باينة غير نتوما وراكم تأكدتوا بلي قد المسؤولية وعمري منبيع عليك حاجة حتى لنهار لي عيطتلك فيه بارح صباح بكري مع الفجر تكسرت التاقة تاع شمبرتي في إقامة تاعنا نضت مخلوعة طليت برا مكان والو كي شفت لقيتها حجرة ملايمة في ورقة ظرف كي حليتوا لقيت فيه فوطوا تاعك مكتوب فيها (جااابر؟

ادا معطيتيناش إسموا الكامل ووين راكم مخبيينوا مغاديش ترجعي ليوم لشمبرتك على رجليك ) هنا انا خفت بزاف عرفت بلي كاينة حاجة مستحيل نتوما توصل بيكم تعطوني إسموا أصلا علابالكم منعرفش إسموا ومعلاباليش وين راح كي خرج من السبيطار منكذبش عليك بعد ما حكيتلي على لي خانك من جماعتك مققدرت نأمن حتى في واحد مخرجتش كامل هاداك النهار من شمبرتي كنت حابة نعيطلك تم تم خفت يكونو متبعيين نيميرو تاعي ولا لقيت حتى جات عندي صحبتي ديت تلفونها وعيطلتك كي قتلك جابر وقتلي وي تماك من بالخوف تأكدت بلي صح واش كاين ، تهدر ويدها ترجف وتبكي والله متأمنش شحال كنت خايفة لأول مرة نحس روحي مرعوبة لي راني بعيدة على دارنا ووحدي تماك خفت بزاااااااااف والله وحطتها يدها على يده وزيرت عليها والله خفت جابر بزاف.

جبد يده من يدها ووقف شعل قاروا ومادلها بظهره و يهدر عادي كأنوا لي سمعه حاجة كان يعرفها.

متخافيش ماوالو كان علابالي يصرا هاك بروحي كنت داير حساب نرجعك هنا لداركم غير مهنيتش في راسي باش نلهالك.

ككفااااه كان علابالك راك تحرش بيا انت مراكش عابي بروحك انت زدت فيه بزاف صاي فهمنا متخافش ولاميران وناس تهابك ووووبصح فهم راهم يحوسوا عليك كانوا قريب يقتلوك حمد ربي لي ماعندهمش اسمك الكامل كون راهم لقاوك هنا ومزالهم حاسبينك تماك تتعالج انت ادا ماخممتش في روحك خمم في ولدك ومرتك ودارك واهلك واشبيك قلبك قاسي هاااااااااك.

كان يكمي وماشي مهتم بهدرتها حتى سمع كي قالت ولدك رما القارو وعفس عليه طفاه ورجع ريح في بلاصته ويشوف في ذراري يلعبوا تفكر يزن كي تقطع نفسه البارح ومرض حط يديه على راسه ومزيره.

واشبيك لونك مخطوف كشما عندك جابر احكيلي كشما يوجع فيك راها تحكمك كريز هاديك مارحتش للطبيب ياك وناضت عنده وبقات تحله في يديه لي مزيرهم جاااابر رخف يدك ضوك شوي وتفوتك تنفس وتحل في يديه حتى رجع نورمال بعدت ديراكت عليه تعرفه يكره كي تقربله محبتش تكرهه فيها ،مرحتش لطبيب ياك.

حمبوك خليني غير في همي نلها في مرض ولدي ولا مرضي.

علاش واشبيه ولدك احكيلي نقدر نعاونك متنساش انا طبيبة.

يهدر وهو يشوف الفراغ حكالها كامل واش قاله الطبيب.

صراحة صحيح كامل واش قالولك الحالة تاع ولدك الحل الوحيد فيها العملية والمتبرع الوحيد لي يطابق التطابق لي نحتاجوه هو الأخ بصح الحاجة الايجابية إنوا نقدروا نتحكموا في تطور المرض من خلال جلسات نعرف طبيب مليح هنا متخصص هاك منخلوهش يتطور ويأثر على الوظائف الحيوية للطفل معناها راح يكون عادي كما اي طفل تحكموا من وقت لآخر نوبات ادا مكانش يدير الجلسات بنظام لكن.

واشنوا اهدري.

كل ما أخرنا العملية كل ما يزيد إحتمال حدوث ردود فعل في عملية شوف جابر قصدي صح عندنا وقت لكن كون يديرها في اقرب وقت تكون أحسن ليه وناجحة كتر فهمتني.

مكاش حل مين راح نجيبلو أخ ضروك وشاف فيها يهدر مكسور انا ويماه مطلقين ومعندناش ولاد غيرو.

سكتت مصدومة شوي وهدرت ديراكت شحال عندكم مدة الطلاق.

عام علاش.

امممم ادا.

قلعنا فترة العدة بعد الطلاق سما باقي 7 اشهر كاين إحتمال تكون يماه تزوجت وراهي بلحمل هادا نقدروا.

ناض مخطوف وضرب كرسي برجله وعيط خلااااااااص بلعي عليا دين فمك.

كامل لي تما دارو يشوفوا فيه آخر مرة تعاودي واش قلتي ضرك مرة جاية نجبد روحك من عينيك فهمتي وراح ركب وقلع كي المهبول وهيا وكامل لي تما مخلوعين ويشوفو فيها حشمت بزاف ناضت وخرجت تجري.

ملي نضت ليوم وانا غير مع روح طالعتلها الحمى بزاف عييت نديرلها كمادات وشربتها دواء محبتش تهبط كامل وغير تبكي مافهمتش واش بيها اول مرة يصرالها هاك غير حاطتها في حجري هيا تبكي وانا نبكي حتى دخلت عليا جدة.

كفاش راهي روح ضروك.

يااااااشومي علاش راكي تبكي نتي.

معرفتش واشبيها جدة ملي جيت هادي اول مرة يصرالها هاك وقلتولي ماشي موالف تطلعلها حمى وطول.

ايه كامل الذراري يمرضوا علاش راكي تبكي نتي يااااحي على بنتي الجايحة اعطيني الطفلة روحي غسلي وجهك عمك راه جاي يشوف روح يلقاك تبكي.

نضت غسلت وجهي جا عمي قالنا ندوها سبيطار قاتلو جدة بعد الفطور ادا بقات هاكا ندوها ،ملاك وخالتي دارو لفطور وكلش وانا من عند روح متحركتش حتى خالتي قاتلي أبقاي معاها صح متحملنيش انا بصح صراحة تحب روح وهيا لي رباتها هيا وجدة قبل مانجي انا نسيت كامل بلي محمد ليوم يجي بلاك هادا علاش قلبي مقبوض غير فطرنا روح كانت ريحت شوي وكلتها ورقدت حتى صونا تلفوني لقيته محمد.

وي صافا.

نور صافا لباس عليكم.

ايه حمد لله.

وكفاش راهي روح.

اممم مليحة مليحة.

أيا بيا شوفي راني دخلت الجزائر راني غادي نروح ديراكت نسقسي على الطفل لي خطب ملاك ومنها نروح لقبرها في طريقي توحشتها بزاف علابالك من زهري يسكن هاد الطفل في نفس الولاية وين راه قبرها بعدها نجي للدار سما نوصل مع الليل متتقلقوش عليا ،.

بقيت ساكتة ونخمم جاتني لحظة إدراك بلي لي خطب ملاك نفس البلاصة لي كنت متزوجة فيها انا صح كي جيت عندهم هنا عرفت بلي تقرا في هاديك الولاية بصح نسيت بلي غادي تتزوج تماك.

نوووووور راكي معايا سمعتي واش قلت.

هااااا ايه ايه سمعتك سمعتك، ربي يرحمها.

أمين صح ماتت بصح روح عوضتني على غيابها حمد لله يارب على كلش.

حمد لله ياااارب ايه تهلا في روحك.

صحا بسلامة وكوبيت.

ريحت ونخمم في حياتي ومصائبي مقابل واش صاري لمحمد والإبتلاء لي راه فيه خصوصا بعد ما حكاولي شحال كان يحب كرته ويعشقها وكفاش صابر على فراقها تكسلت حذا روح ونخمم حتى داتني عيني رقدت.

كنت في بلاصة فارغة كما الغابة كنت نسمع في عياط صوت طفل صغير يعيط ماما مااامااااا وانا نحوس عليه مالقيتوش شحال وانا نحوس عليه ونتبع في الصوت حتى شفته مريح بعيد عليا يلعب كي شفته فرحت بزااف عرفته ايه هو ياااعمري ولدي يزن بقيت نعيط عليه حتى دار عندي غير شاااافني ناض جا يجري عندي ويضحك ويعيط مااااااامااااااا كنت بزاف فرحانة راح نعنقوا ونشم ريحته توحشته بزاااف ريحت على ركابيا وفاتحتلوا يديا وهو جاي يجري عندي ويضحك غير قرب يوصلي طااااااااح في بلاصة كما الحفرة كانت بناااااتنا غامقة وتقطع حسواااا عيطت بجهد يزززززززززن حتى فقت مخلوعة قلبي مخطوف ولقيت روحي غارقة فلعرق ونفسي تتقطع ونبكي وقفت وحاطة يدي على صدري يا يماااااااااا على ولدي يااااايما قلبي كان يضرب حده عييت نستغفر مقدرتش نتكالما دخلت ديراكت دوش وحليت على روحي ما بارد وريحت في لرض ونبكي باينة كشما صرا لولدي اول مرة نشوف منام هاك عليه يااااااااااربي يااااااااربي متفجعنيش في ولدي يااااربي نسمع في روح تبكي مقدرتش نوض نروحلها حتى سمعت ملاك جات داتها حسبتني راني ندوش لقيت شحال وانا هكاك بعدها استغفرت ونضت توضيت وخرجت علابالي جاااابر ميخليش حاجة تصرا لولدنا مستحيل حاجة تصراله صليت شحال ودعيتله حتى ريحت ونضت رحت لقيتهم كامل مريحين مع بعض خبرتهم بلي محمد وصل وراح يسقسي على العريس ملاك فرحت بزاف وحكمها ستراس تقارع يرجع بفارغ الصبر وخايفة بصح هدرة باباها كانت مطمنتها بسكو عجبوه بزاف ويقارعوا غير يقبل محمد ويردولهم خبر وبدات هيا وجدة يحكوا واش يديروا وكفاش يوجدوا الخطبة كانت فرحانة بزاف وكامل فرحنا لفرحتها كنت نشوف في عينيها لمعة عشق حب تبسمت وفرحت من قلبي أوموا وحدة فينا راهي فرحانة ومتهنية ياربي تكملها وتهنيها.

بقا نهار كامل برا يدور مرجعش للدار يخمم كفاش يدير ياربي مكاش حل منقدرش نتزوج غيرها علاش مكاش لي حاب يفهمني منقدرش نتوشي غيرها وغمض عينيه شحال يخمم بعدها جبد تلفونه وجبد.

تصاويرها ويشوف فيهم وحاط يده على قلبه ويضرب فيه خرجتلي رخيس وذليتني يا الطحان مازالها تأثر فيك مزالها تزعزع نفسك كي تتفكرها برك ولا تشوف تصويرتها و1000 مرا قدامك متحرك فيك والو مزالني عاقل على ريحتك وريحة شعرك مازالها ضحكتك تتعاود في وذني مزالني حافظ كل تفاصيل فيك نرسمك مغمض عينيا مزاااااااااااالك مزال حتى صونا تلفونه لقاهاد باباه ريبوندا عليه تمتم.

وي بابا مكان والو يزن مليح.

ايه مليح متخافش ارواح تتعشا معانا.

غير تعشاو بصحتكم ضوك نتعشا برا راني مع صاحبي.

جابر ارواح عندي هدرة معاك علابالي مكان لا صاحبك لا والو.

راني جاي الحاج وكوبا وراح للدار وعلاباله واش راح يقولوااااا.

غير دخل لقاهم يتعشاو ويضحكوا على يزن لي يخلطلهم في الطابلة.

بصحتكم.

سلمك ولدي ريح نحطلك.

فات ديراكت ريح وحطتله يزن في حجره.

غير ريح هو ناض ريان حمد الله شبعت بصحتكم وخرج ديراكت وضرب الباب.

شاف جابر في يماه وغمض عينيه تفكر كي ضربه الصباح جا نايض لاحقه.

ريح جابر عندي هدرة معاك.

يا الحاج خليه يتعشا ومن بعد هدروا.

لاا لا يما خليه يهدر شعنده.

راهي حكاتلي يماك واش صرا الصباح مزالني حي وعيني تشوف تهز يدك على خوك راجل لاحقك في الطول ااااااا وليت متحشمش صاي باغي دير علينا حضارات هنا في الدار باغي تمشينا حسابك داير رايك حسنا عونك قلنا مجروح قلنا غبنلتوا الدنيا غلطنا في حقوا نخلوه يريح نخلوه يبعد ينسا بصح انت زدت فيه بزاف درت فينا كراعك تروح مش سامع بينا لا الحي لا الميت.

يااااا الحاج هاد سمعني.

اسكتي عليا انتي مدخليش روحك هادا ترمريم تاعك لي وصلنا لهنا باغية ردڨي شمس بالغربال صاي وصلت للراس صاي مادام وصلت بيه يضرب ريان وانا حي ما بقات حياة هاداك ماشي خوك هاداك ولدك انت ربيته على يدك راه راجل غدوى تاني ضربه قدام مرته اااااا تعرف شاقالي ضروك قبل ما تجي قالي مغاضتنيش لي ضربني، خويا لكبير وليه حق عليا يكسرلي فمي منهدرش ومنزعفش خويا بصح ضربني على الصح ،علاش ضربته أيا فهمني فاش غلط مادامك مش حاب تتزوج وقلت منديرهاش أيا كفاه نخلوا الطفل يموت وحنا نتفرجوا راك عابي بروحك شوف فيا هز عينيك في عينيا ياك انت تمشي وتعرض ولرض متوسعكش هز راسك وقولي يا بابا راك غالط أيا جاوب صاي نقعدوا نحسبولك غير انت قاع ناس تعيش حسابك سما طلقتها انت لازم تقعد في دارهم تندب عليك حتى تموت هاك انت جنون العظمة لي فيك يكون مريح تحس روحك مليح كي تعرف بلي حياتها حابسة من وراك هادا جهل فهمت جهل نوض انفض الغبار على روحك الدنيا راهي ماشية ادا.

انت متزوجتش وحاب تكمل حياتك في طيات كتاب محروق هيا مراهيش مجبورة تتكحل بالرماد تاع هاد الكتاب باش تتهنا انت فهمت.

مهود راسه ويسمع فيه ومزير على يديه وعينيه حمرين.

ادا مراكش حاب تتزوج على جال ولدك سمحلي مغاديش نخلوا ولدنا يموت فهمت غادي نروح نحوسوا على يماه ونخبروها لا انت لا هيا تهموني قدام يزن واش صرا بيناتكم كلش بجيهة ويزن جيهة فهمت وضوك راهي عندك خمم مليح متخلينيش ندير حاجة نندموا عليها كامل.

ناض بزعاف حط يزن في حجر يماه وخرج ديراكت طلع لفوق ويماه تبكي يا الحاج علاش قتلوا هاك لي فيه يكفيه راك حاسب ولده رخيس عليه.

علاه راكي حاسبة جابر رخيس عليا بصح محتمة عليا نديرله هاك على جال لي في يدك راكي تشوفي هدرتي تاع ضروك لي قتهاله هيا لي غادي تعطيه الكوراج باش يقبل يتزوج حتى لوكان على جال يزن برك شوي ويسمعول في تكسار لفوق الدار زلزلها بالعياط كلش كسره كان عياطه مبحوح مكسور ويخوف ناضت يماه تجري.

ريحي كما راكي خليه خلبييييييه وحده.

حتى دخل ريان يجري عندهم بابا هادا جابر.

ايه هو خليه وحده ضوك يتكالما.

كفاه وحده بابا مراكش تسمع فيهم ودار ديراكت طلع يجري عنده قبل ما يوصل حتى لقاه جاي مهود فات عليه وعينيه حمرين ويده وجروحة دم يسيل فات ديراكت عند باباه قلتوا تزوج ياااااااااااك أيا صحا كما تحبوا غادي نتزوج على جال ولدي وجيبله أخ لي يسلكه بصح بطريقتي انا وعلى حسابي انا والطفلة لي غادي نتزوجها هيا.

يتبع ليلة سعيدة غااااالياتي احبكم في الله.