رواية الدار التي لا ترحم الفصل الرابع 4 كامل | بقلم الاء محمد
تاني يوم كانوا كلهم قاعدين مع بعض ومروان كان شايل ليان كانت علياء بصلهم وهي بتضحك
علياء لنفسها /يا الله قد ايه مروان جميل وحنين ليه بس يوسف ما طلعش زيه كده ليه ليان ابوها يبقى يوسف مش مروان..
مروان قطع سرحانها / جماعه انا حاسس ان البنت مش طبيعيه زي ما تكون تعبانه .
اماني قامت اخدت ليان من مروان بس فجاه اتكلمت بفزع ...
اماني / يلهوي البنت سخنه جدا ..
علياء بخوف / بنتي لازم ناخدها للدكتور فورا
مروان / اهدوا يا جماعه اهدوا انا هاخدها للدكتور ..
علياء / استنى استنى انا هلبس واجي معاك بسرعه
علياء لبست هدومها في خلال خمس دقائق ونزلت مع مروان للدكتور وهي مرعوبه كانت خايفه بنتها يحصلها اي حاجه ..
علياء / بسرعه والنبي يا مروان البنت هتموت مني
مروان / اهدي بس يعني اكيد شويه برد اهدي ٣ دقايق بالضبط وهنوصل للدكتور .
الدكتور طمنهم عليها
الدكتور / يا جماعه متقلقوش البنت بس جالها برد عادي زي اللي بيجي لكل الاطفال انا اديتها خافض حراره وتقدروا تاخدوها بعد ساعه بالكتير ..
الدكتور خرج من الاوضه وعلياء فضلت بصه لبنتها وهي بتعيط ..
مروان قرب منها / مالك بس يا علياء ما الدكتور قال ان البنت كويسه وزي الفل ..
علياء بعياط / بس تعبت ازاي والله يا مروان انا مخليه بالي منها جدا ودايما بلبسها تقيل وبرضعها في المواعيد الصح وبعمل كل حاجه ازاي بس تتعب ازاي .
مروان / علياء انتي بتهزري كل الاطفال اصلا اليومين دول بيتعبوا ده في اطفال بتنزل عيانه اصلا
انتي بنتك الحمد لله نزلت بصحه كويسه ولو على البرد هي كده كده هتاخده هتاخده هو في طفل بيكبر من غير ما يتعب ويشحطط اهله معاه في المستشفيات في انصاص الليالي .
علياء بحرج / انا اسفه ان انا تعبتك يا مروان
مروان / يا بنتي انا بهزر اوعي تقولي كده تاني هو انتي فاكره انها بنتك لوحدك يعني
فات ست سنين ليان كبرت .. كانت الطفله جميله جدا ومرحه ..
مروان / السلام عليكم يا جماعه .
علياء / لسه فاكر احنا قاعدين قدامك من ساعه ما دخلت وانت مشغول مع الهانم ..
مروان ضحك وقعد على السفره عشان ياكل معاهم كان جو اسري لطيف ليان كانت متعلقه بمروان جدا ..
ليان / بابي انا بكره مش عايزه اروح المدرسه ...
مروان بهدوء / ليه يا حبيبتي ..
ليان / عشان انت قاعد بكره اجازه من الشغل وانا عايزه اقعد معاك ..
مروان / بس ما ينفعش تغيبي برضه عن مدرستك ايه رايك لو بعد المدرسه جيتلك اخدتك وماما تبقى معانا ونروح ناكل بيتزا ..
ليان سقفت / الله انا موافقه
بعد شويه علياء خبطت على اوضه مروان ودخلت .
علياء بهدوء / ها نامت
مروان / ايوه نامت بس غلبتني خلتني احكيلها بتاع 10 حواديت .
علياء ابتسمت / شكرا يا مروان انا عارفه انك بتبذل مجهود كبير اوي معاها كفايه انها بتصمم كل يوم تنام جنبك وبتتاخر في النوم عشانها
وانت اصلا بتصحى بدري بس صدقني انا حاولت كتير افهمها ان انت مش باباها بس هي مش مقتنعه ..
ما كنت هحبها زي ما حبيت ليان
علياء / انا مش قصدي والله انا قصدي انها متعلقه بيك بزياده وده ممكن يكون مضايقك ...
مروان / يا ستي هو انا اشتكيت لك بالعكس بقى انا بحبها اوي وفرحان بيها جدا .
علياء / ماشي يا سيدي ربنا يخليكم لبعض انا هاخدها بقى عشان انت تنام براحتك ..
مروان / لا معلش سيبيها تنام جنبي الليله ..
علياء وافقت قدام اصرار مروان ودخلت اوضتها لقيت اماني مستنياها ..
اماني / امال فين ليان ..
علياء / مروان صمم انها تنام جنبه خير يا مرات عمي في حاجه ..
اماني / ايوه هو انت بقى مش ناويه تبطلي استهبال
مروان انتي طول عمرك شايفاه مستقيم ومحترم و ملوش في اي لعبه.... وبنتك بتعشقه مش ناويه بقى تلمي نفسك وتوافقي على اللي قلتلك عليه .
علياء / يا مرات عمي ما ينفعش حرام عليا انا مطلقه ومروان ما اتجوزش قبل كده ايه ذنبه يعني ياخد واحده مطلقه ببنتها كمان ...
اماني / يا ستي سيبيها عليا دي اذا كنت انا امه بقولك موافقه ..
علياء / معلش انا ما احبش ان انتي تضغطي عليه عشان حاجه زي كده مروان لو عايزني هو هيطلبني بس انا عمري ما حسيت اصلا انه بيشوفني بالطريقه دي انا طول عمري بحس انه بيشوفني زي اخته بالظبط .
.
.
اماني / ما عشان مبتشوفيش يا غبيه عموما ماشي بكره الصبح مروان هيطلبك وعارفه لو رفضتي او قلتي لا انتي حره هسيب عليكي بنتك
اماني خرجت من الاوضه وعلياء فضلت قاعده بتفكر ..
علياء ابتسمت / طب يا ترى لو طلبني فعلا هوافق يارب يطلبني بجد انا بحبه اوي
اما عند سمية كانت قاعده في بيتها و جوزها معاها .. ياسر جاله تليفون و رد ..
ياسر بعصبية / ايه .. انت بتقول اي حصل ازاي ..
ياسر قفل التليفون و سمية بصتله بتساؤل .
ياسر / صاحب المشروع اللي حاطين فيه كل الفلوس .. اخدها و هرب برا البلد .
سمية / ايه .. ازاي ده حصل ياسر انت لازم تتصرف .. انا مش هقبل ان الفلوس تضيع مننا لا مش بعد كل اللي عملته ..
فجأة تليفون سميه رن و سمعت الخبر اللي كان كفاية يدمر حياتها.. قعدت علي الارض و فضلت تضحك بهيستيرية ..
سميه / شهاب مات .. مات و هو سايق مع اصحابه الموتوسيكل .. يعني انا خسرت ابني و فلوسي في يوم واحد ..
ياسر هو كمان اتصدم و فضل متنح .
سميه فضلت تضحك و تصوت في نفس الوقت ... لحد ما الجيران سمعوا و دخلوا يهدوها ..
تاني يوم علياء اتفاجئت ان مروان فعلا طلبها ..
مروان بحرج / علياء انتي لو مش موافقه طبعا ده حقك وصدقيني مفيش اي حاجه هتتغير و ...
علياء قاطعته / مروان انا موافقه ..
مروان / ممكن اعرف ليه قصدي يعني هل السبب ليان عشان انت عايزه ليها اب ولا في حاجه تانيه ..
علياء / لا مش عشان ليان عشان انا بحبك
مروان عينه لمعت واتبسط جدا قرب منها ومسك ايدها ..
مروان / بجد من امتى ..
علياء / من ست سنين لما كنت لسه ام مستجده ومش عارفه اعمل ايه مع ليان اخدتها مني وعرفت تتعامل معاها
من ساعتها نظرتي ليك كده اتغيرت مبقتش شايفاك ابن عمي وبس
بقيت شايفاك حاجه اكبر من كده بكتير ومع السنين دي كلها اكتشفت اني كنت بحبك من زمان بس اعجابي بيوسف كان مؤقت
اعجاب بنت طايشه مراهقه ما تعرفش يعني ايه حب بجد وعرفت من عمي انك كنت بتحبني من زمان بس انا اللي كنت غبيه ..
مروان اتنهد / سيبك من اللي فات اللي حصل حصل المهم ان احنا لازم نتجوز بكره انا مش هضيع يوم تاني من عمري وانتي مش جنبي فيه .
علياء بحرج / بكره ازاي بس انا مش جاهزه خالص .
مروان / مش مهم تبقي جاهزه هنكتب الكتاب بكره وابقي اجهزي على مهلك ..
علياء / ايوه يا بس مروان كده مش هينفع ..
مروان / مش هينفع غير كده ومش عايز اعتراض كفايه بقى اللي ضاع من عمرنا
علياء ابتسمت فعلا تاني يوم كتبوا الكتاب وسط فرحه من كل اهلهم واصحابهم و سندس اللي كانت مبسوطة فعلا بصحبتها ..
واخر اليوم كان الكل قاعدين ..
مروان / الشقه هتكون جاهزه على الاسبوع الجاي بالكتير اعملي حسابك بقى انك تجهزي كل حاجتك عشان ننقلها على هناك ..
فجاه الباب خبط ..
حسام / خير مين اللي جايلنا في الوقت ده
قام واتفاجئ لما لقى حنين معاها بنت صغيره..
حسام / ايوه انتي مين ...
حنين دخلت / انا ابقى مرات يوسف و دي بنتنا نور ..
اماني / يوسف مين احنا معندناش حد بالاسم ده ..
حنين / انا عارفه انكم متبرين منه من زمان وانا كمان اساسا اتطلقت منه
بس للاسف مش هعرف اربي بنتنا لوحدي يوسف اخد من بنت عمه فلوس
كانت تكفينا نعيش طول عمرنا مش محتاجين اي حاجه بس للاسف هو كالعاده ضيع الفلوس دي على الشرب والبنات
وانا مش هقدر اربيها لوحدي عشان كده جيت اسيبهالكم هنا انتوا اللي هتقدروا تربوها وترعوها انا مش هقدر ..
حنين سابتلهم البنت ومشيت واماني دخلتها نيمتها جنب ليان كلهم بقوا قاعدين مصدومين ومش عارفين يعملوا ايه .
حسام / علياء يا بنتي انا مش هقدر ارمي حفيدتي ولا هقدر اتخلى عنها عشان كده بستاذنك البنت تعيش معانا هنا واحنا اللي هنربيها
وانتي كده كده كلها اسبوع وانتي ومروان ماشيين و هيعشوا في بيتكم لوحدكم ..
علياء / طب وليه يا عمي ما تترباش مع اختها على الاقل مفيش واحده فيهم تحس انها لوحدها ..
حسام / انتي متاكده ..
علياء ابتسمت / ايوه متاكده و اوعدك اني مش هفرق بينهم و هعامل نور زي ليان بالظبط .
الكل فرح جدا لما علياء عرضت انها تربي الاختين مع بعض وفعلا هي ومروان راحوا عاشوا في شقتهم كانوا مبسوطين جدا وحياتهم هاديه وبعد فتره ليان حملت وجابت اخت تالته للبنتين وسميتها يسر ..
اما سمية معرفتش تتجاوز وفاة ابنها و كانت طول الوقت بتخيله ف كل حته و بتتعامل علي انه موجود لحد ما تم وضعها في مستشفى الأمراض العقلية ..
تمت ..
قراءة رواية قلوب غير متساوية كاملة من الفصل الأول للاخير | بقلم اوشا مصطفي
واصل قراءة رواية الدار التي لا ترحم الفصل الرابع 4 كامل واكتشف ما سيحدث لاحقًا.
استمتع بقراءة رواية الدار التي لا ترحم كاملة
رواية الدار التي لا ترحم كاملة من الفصل الأول حتى الأخير بترتيب دقيق.
قراءة جميع روايات الاء محمد
جميع روايات الاء محمد متاحة للقراءة أون لاين بسهولة.
