واقفة عند باب شمبرته في السبيطار وتشوف فيه راسه محزوم بضماد وكتفه تاني وصدره عريان معمر خيوطا وكل الآلات دايرين بيه فتحت الباب ودخلت عنده هزت الدوسي تاعه قراته وراحت عايناته وريحت قدامه وتتمعن في ملامحه الحادة في وجهه، تدل على القسوة والغضب، حتى وهو مش فايق ،وجسده لي مرمي على السرير مغطيه ،راجل ضخم طولو وشكلو فارضين هيبتوا وقوتوا، وصدرو لي معمر ضربات زرق وجروح .

انت بنادم ولا آلة والله انت متحسش متموتش في حياتي مفاتش عليا انسان كيفك كفاش تقدر تكون بكامل هاد القوة والجبروت ،بعد كامل واش صرالك نموت ونعرف حكايتك واشني هيا نموووت، وحطت يدها على صدره فوق مارة تاع حرقاممممممم و هاااااادي من واش تاني، والله العظيم مغلطوش كسماوك الرجل الذي لا يموت .

حتى طبطب عليها الباب قلعت يدها بالزربة من فوق صدره ودارت شافت فيه حتى شارلها بيده باش تخرج عنده .

ناضت خرجت وبلعت الباب .

.

وي حضارات تفضل دكتورة كفاش راه لاميران (la murène) .

.

حالتو مستقرة عموما في الوقت الحالي، رصاصة جرحتوا برك حمد لله لي جات في كتفه في بلاصة سطحية خيطناها ، هادي مأثرتش فيه كما الضربة لي داها في راسو موشراته الحيوية مزال ماشي مستقرة بشكل دائم ولي ضربوا تماك كان علابالو واش كان يدير بسكو جات في نفس البلاصة تاع المرة لفاتت وانا حذرتكم حضارات وحكيتلكم كلش بصح كي العادة ميموتش ويقدر يخرج منها كما الشعرة من العجين وفي الدقيقة الأخيرة ويرجع من الموت تبسملها وراح ريح ويشوف في لرض ويهدر .

هادا علاش سميتوه في السبيطار نتوما الرجل الذي لا يموت .

.

إيه، بسكو دخل شحال من مرة وفي حالة اي واحد في بلاصتو يموت فوق طابلة بصح هو جسمه يتحمل ويستجيب عندوا حاجة قوية تخليه يتمسك ويقاوم .

الانسان لي أصلا هو ميت مداخل هاكا يكون .

هادا راكي حاسباتو حي ،هادا راه جسد يواجه في الموت كل يوم باش يتلاقا مع حاجة لي تدفن جسده ويتهنا .

جسد.

بلا روح كائن وين ماكانت الموت يروحلها برجليه ميعرفش معني للخوف معندوش حاجة اسمها تعب ولا راحة نتي طبيبته شفتي كامل جراحه شفتي قوته بصح مزالك متعرفيش شكون هادا جيستوموا هادا واش حابة نعرف ،شكون هادا حضارات علاش هو الوحيد كي يدخل السبيطار دخلوه بلا متسجلو إسموا ولا متحطوا اي معلومة عليه .

بزاف من رجالكم حتى ضباط كبار يحطوا اسماءهم وعادي أصلا هاد السبيطار تابع ليكم وفيه حراسة كبيرة وكلش يمشي تحت يدكم فيه .

علاش هادا الوحيد لي يدخل بإسم لاميران ومتتحط حتى حاجة عليه وملي يدخل وهو تحت حراسة مشددة ومسلحة وفي شمبرة معزولة على باقي المرضى حتى يخرج .

منقدرش نخبرك اي حاجة عليه كتر ملي تعرفيه ومن الأحسن متعرفيش والأحسن منوا متسقسيش خدمتك هنا تجاوبي على الأسئلة حنا لي نسقسوا مفهوم ؟

.

ادا متأمنش فيا حضارات علاش خيرتوني انا لي نكون طبيبته وانا لي درتله شحال من أوبيراسيو وانا لي خيرت الطاقم الطبي تاعه وانا الوحيدة لي مسموح ليا ندخل عليه وغير انا لي عندي الملف الصحي تاعه .

.

ماشي حنا لي خيرناك .

هو لي خيرك تقدري تسقسيه وحدك كي يفيق، وخدمتك تعالجيه تتهلاي فيه حتى يريح وكي يخرج منا تنسايه وتنساي حتى شكل وجهه وممنوع تهدري عليه حتى كلمة غلطة صغيرة منك تكلفنا بزاف .

ودار رايح وخلاها تخمم في هدرتوا والخوف لي زرعه في قلبها منوا حتى جبدها من الدوامة لي كانت فيها كي قالها .

دكتورة .

.

انعم حضارات .

.

تعرفي شمعناها لاميران .

.

ننلاميران هيا أنقليس البحر ، حوتة سامة في البحر ،من اخطر الأنواع شكلها كما الثعبان تتميز وبالسرعة بحيلة والذكاء تتخبا بين الشقوق وتخرج غير في الليل تصطاد وعمرها ما ضاعت منها فريستها متغلطش مستحيل ومترجعش بلا متكمل الشي لي خرجت على جالو .

هادي هيا أنقليس البحر و هاداك لي راه داخل، هاداك أنقليس الصحرا ،الصحرا هيا البحر تاعه حافظ كل حجرة فيها ،الطير ميحطش فيها بلا علموااااااا ،

و الصحرا كاملة وغار جبيلات و البلاد تسحقه وواقفة بالرجال لي كيفه، نورمالمو ضوك علابالك مليح خطورة وأهمية واش راه بين يديك هادا علاش لازم تخدمي و تسكتي وملازمش واحد يسمع بيه، أيا تهلاي فيه مليح اي حاجة خبريني، سلام .

وخرج وهيا تشوف فيه .

.

ريحت مصدومة وتخمم اااااااه ياااربي بلاك حنا منحسوش ومنعيشوش واش راكم عايشين نتوما حنا نرقدوا في ليل هانيين براحة ونمشوا بلا خوف لاأنو علابالنا بلادنا آمنة ومحميين بصح معلابالناش بلي هاد الأمان و الراحة لي رانا فيها تخلصوا بلادنا بأرواح رجال وسبوعة باعوا رواحهم وشراو لبلاد ،ودارت تشوف فيه ربي يحفظكم وينصركم بلادنا جابت الرجال ربي يخليكم رمز واسم نعتزوا بيه ووجوه نتشرفو بيها ،بصح انت وبقات تشوف فيه صاااار أنقليس البحر قلتولي معليه مالا نوعدك بحاجة كي منجبدش شكون انت ونعرف حكايتك وواش لي خلاك تكون هاك منتسماش يسرى ،وفوقها انت خيرتني امممممم حبيت .

حبيييييييت 😊 أصبرلي برك ميسيو لاميران وراحت.

في الدار واقفة في الكوزينة كرشها قدامها في شهرها السادس دير في الفطور حتى دخلت عليها يماها .

.

نوال شحال من مرة قتلك خدمي مريحة ماشي قالك طبيب متوقفيش بزاف، تاني تزيديلي ضروك مخصنيش تعب، حتى سمعوا عياطها خرجوا للزوج يجروا عندها هزتها واشبيك كي الفزاعة يالطيف خلعتيني قلبي حبس ، لي يسمعك يقول تقطعلها ذراع ولا رجل واشبيكي تندبي على راسي .

واش كاين تاني .

نوال الله يهديك هاتي الطفلة خلعتيها هادي بنتك ولا بنت راجلك واشبيك تتوحمي عليها .

ارواحي عندي، صاي سكتي حبيبتي قولي لميمة واشبيك ،اسكتي وحكيلي تعيش بنتي الزينة .

.

.

تبكي وتهدر حلوتي حلللللوتي وين راهي حلوتك ،باينة داهالك يزن ياك كي العادة .

ااااااه يا هاداك الكناري لصفر يدير في الرجلة غير على خته ونحكمه ليوم نسلخهم للزوج باغيين يقتلوني غير بالخلعة .

هههه ههه نوال والله ويسمعك جابر تقوليله الكناري على ولده يقتلك راني قتلك يماخلينا نتي تاني هاداك حتى يجي قبل ،ويتفكر بلي عنده ولد، كون يجيني نشبع فيه ونبرد فيه قلبي بارد القلب ،اسكتي نتي ملبكا كي المحيرقة شاعلة سكرتيني شحال تزيدي فيه، ارواحي عندي خلاص وهزتها خلاص ماما خلي خويا ياكلها ضوك وكي نحكمه نخلفها منه ،شوفي ضوك نمد لبنتي زوج منها ،خلاص اسكتي علابالكي لي تبكي بزاف تولي شريرة ويضحكوا عليها الناس عطاتها حلوى سكتتها وحطتها حتى جا داخل عليهم وهازه فوق رقبته .

انتباه انتباه الى كافة الشعب تحية للقائد الأعلى للسيد المحترم البوقوص ملك الملوك زعيم الزعماء يزن عبد الجبار تحية .

حتى حطوا كامل يديهم على ريسانهم وهو طرطق بالضحك ،وهوما يشوفو فيه يضحك ويضحكوا معاه .

.

.

غير شافته غفران بدات تبكي .

.

.

.

آااااااخيرة الندااااابة علاش قلعتي واش تاني ياك عطيتك حلوى في بلاصتها .

ااااه غاضتك زعما كي مدرتله والو اصبري .

ارواح هنا تشو تعاود تحڨر ختك وتزعفها وبدات تقرص فيه بلعاني قدامها وهو يضحك ريان اعطيني الطفل خسرتله طبايعه والله، وهزاته حطاته فوق الطابلة .

يزن شوف فيا ماماتي واش قتلك على ختك متضربهاش تحبني نروح ،؟

قولي ماماتي تحبني نروح؟

.

هزلها راسه ب لا هاكاا نحبك أيا سلم على غفران ،وين راهي ختيتو وين راهي غفران وريني شارلها بيده عليها .

وسلم عليها .

.

هزاته تعنق وتسلم ياعمره ياااااقلبي على الزين لي يسمع الهدرة يااااا يما كبدي كبدي و الريحة الزينة عصفوري هادا نوال شوفي شوفي حطيه شوفي واش يدير .

.

وقفه فوق الطابلة ويهدر فيه .

.

.

↚

يزن وريهم شايدير دادا كي يصلي وريلهم شوف فيا يزن كفاش يدير دادا كي يصلي ، حتى حط يديه على راسه وهود تكسل فوق الطابلة بداو كامل يضحكوا عليه قرصته يماه خير ما علمته، وانت ارواح هنا تضحكلي على راجلي اااا تضحك على داداك يجي نخبره عليك وتقرص فيه في كرشه وهو يضحك حتى خطفه ريان ويدور بيه مطلعه لفوق باش ميوصلولهش ويضحكوا كامل، حتى دخل عليهم وقف عند الباب ويشوف فيهم كفاش كامل يضحكوا وفرحانين بيه ويحطه واحد يهزه واحد،

دخل عندهم واش كامل هاد الحس، تقول سوق ودار عنده باينة كما العادة الحاج ابراهيم مقلبها، وعمه المهبول علمه طبيعة جديدة من طبايعه .

ريان حنا بمهبول واحد ماتهنيناش باغي تزيدلنا دوبل تاعك حرام عليك .

.

غير شافه بدا يعيط دادا.

دااادااااا وراح عنده .

هزه ويسلم عليه السبع تاعي فرحة دارنا ونورها .

حتى نطفت نوال .

احم احم يا بابا ياااااااابابا رانا نشوفوا ضوك نتفجروا من الغيظ ونزعفوا .

.

فهمها بدا يضحك ودار عندها وين راهي الأميرة تاع جدها وين راهي البوبونة تاعي وهزها هيا بجيهة ويزن بجيهة ويسلم عليهم نتوما نور عينيا شوفي نتي في هاد العين والحاج الصغير في هاد العين .

ااااابابا كفاش بدلتنا ماشي كنت تقولي نتي يا نوال عينيا ونور النور تاعهم بدلتنا بي.

.

وسكتت كي فاقت بروحها واش قالت حتى شافتهم كامل يشوفوا فيها كأنو الوقت حبس عند هاد الكلمة واحد فيهم ما تحرك ماهدر كل دارو يشوفوا فيه حط غفران ويزن ودار راح دخل للصالة وبلع الباب علااااااش محبيتوش تنسوها، علاش مزال إسمها متمحاش من الدار، علاش مزالت كي الكوشمار على حياتنا غيمة فوق دارنا محبتش تروح ،وضرب الكرسي حمدي ربي لي جابر مراهش يجي كون سمعك جبدتي إسمها كون جبدلك قلبك من صدرك، أنسوا جدها خرجوا جدها من حياتنارياااااان هادي ختك لكبيرة ليراك تعيط عليها احشم على روحك ،ومتنساش لي راك تقول عليها كوشمار لي قدامك هو قطعة منها ودمها ولحمها، مهما درتوا باش تمحوها متقدروش .

يماااااااااا هادا ولدنا وحدنا ولدنا حنا صاي ،ماعندها حتى حق عليه صاي ماعندهاش، كون جا قطعة منها كما قلتي كون مفرطتش فيه وراحت، بسبتها دمرت حياتنا كامل،ها راه جابر هج راح مزدناش شفنا وجهوا ،وبابا مكسور كل ميتفكرها طيح الدمعة من عينيه وميقدرش يوقف، ولا نتي لي كل مترقدي يزن في حجرك تبكي ولا نتي نوال كل ميعيطلك يزن ماماتي تفشلي، لالا اهدروا قولو راك غالط قولو ادا راني غالطريحت عنقت يزن وتبكي .

يما شوفي فيا يا الغالية، متستاهلش تبكي عليها ولا تتوحشيها، هيا نساتنا وسمحت فينا وفي جابر وولدها يما عمبالك رخيسة عليا، يما درتها ختي الصغيرة، بنتنا هاديك بعد كامل واش درنالها شفت كفاش رداتولنا، ادا.

نتوما نسيتوا انا مننساش ،وخيرلكم متزيدوش تجبدوا عليها، يزن راه يعرف ويرفد في راسه والله ويجي جابر ويسمع إسمها خرج من فم يزن غير يحرقنا كامل وناض سلملها على راسها وخرج .

جات عندها عنقتها وتسكت فيها يما خلاص تعيشي خلعتي يزن شوفي كفاش راه يشوف فيك نوال بلاك الأخ والأخت ينساو بلاك حتى جابر يقدر ينسا بصح الوالدين مينساوش أبنتي مينساوش كانت بنتي كانت تقولي يما كفاش حابيني ننساها وأنا نربي في ولدها فيه ريحتها كفاش ننساها وانا نشوف فيها في وجه ولدها يما تعيشي علاش راك تصعبي فيها على روحك وعلينا يما ريان عنده الحق واش دارت فينا عمرنا مننسوه عمرنا منسمحولها عليه وادا يزن راه يفكرك في يماه كي تشوفيه مالا تاني تفكري باباه يما وواش صراله بسبتها يما خسرنا جابر، شحال عندنا عام كامل يما ،جا فيها جابر 3 مرات زوج مرات في لعياد وبسيف باش جا و الثالثة كي مرض يزن .

يما كون ماشي التلفون ولاكام يزن ميعقلش بوه .

خلينا من بابا لي دخل السبيطار بعد ما راحت وراح جابر ، وريان لي تفسخت خطبتوا بسبتها تاني ،يما حياتنا كامل تقلبت كامل الفرحة لي عيشتهالنا في عامين معاها ،خلصناها غالية والله دمرتنا ودات فرحتنا معاها وراحت كون ماشي يزن لي راه مغطي على واش دارت كون صرا ما كتر يما جابر مزاله عايش غير بسبت يزن تخيلي كون دات يزن معاها جابر يموت والله ميقدر يعيش بلا بيها نوال خلاص خلاااااص هيا راحت ودات سرها معاها.

وين ماكانت ربي يسهلها ويهنيها .

.

قصدك دات فرحتنا معاها ودات قلب خويا معاها .

.

نوال قتلك شحال من مرة عمرك مترفدي في قلبك الغش جيهتها لي راح ربي معاه منذموها مندوا ذنوبها .

.

صحا يا يما يجي نهار وتفهمي نتي تاني كما فهمنا وإقتنعنا حنا تاني .

روحي ريحي ضروك نتي ولولاد عند بابا راكي علابالك كفاش يكون غير يزن لي يقدر يفرحه ريحوا حتى نجيبلكم فطور وعيططي لريان يجي ياكل تاني بعد الفطور رايحة لداري .

.

صحا .

اسمعي نوال كي يفطر ريان هدري معاه كما فهمتك ميحشمنيش مع الجماعة راني قتلهم غدوى يجي ولدي يشوف .

.

خلاص يما ياك هدرنا وقتلك خليها عليا ودارت تكمل في فطورها .

راحت دخلت عليه مريح ومرجع راسه على الحيط ويخمم حطتله يزن في حجره بدا يشد فيه من لحيته ويضحك وريحت مقابلاته شادة غفران .

انت سما تبغيني غير على لحيتي ولا كفاه يا وحد الخبيث وسلم عليه وحطه في لرض ناض يمشي بشوي ويطيح خطرات، وغفران لحقاته تمشي خطواتها متوازنين .

الحاج فاش راك تخمم قولي تقعد قاتل روحك بتخمام هاكا هدا علاش راهي تتطلعلك لاطونسيو وتمرض علاش واش لي راه مسڨم في حياتنا حتى منخممش آااا قوليلي شكون من ولادي لي راه مهني باش نتهنا ونريح انا ااااااااه يا الدنيا كي لعبت بيا وجبدت لرض من تحت رجليا كي كانوا صغار كنت فرحان بيهم قد الدنيا والناس حاسديني عليهم قالك الحاج ابراهيم عندوا 3 ذكورا عندوا علاش يتكل في كبرتوا فرحت بيهم قلت نربيهم رجال ونضمنلهم مستقبلهم ونفرح بيهم هادا ما كنت متمني تشفاي كي كنت نقولك نزوجوا ولادنا وكل واحد نديروله دار وتبقا هادي الدار فيها غير انا ونتي يولو يجو ولادنا في الاعياد و المناسبات ويجيبولنا ولادهم وتتعمر هاد الدار بالضحك والقصرة وحس لولاد يقولو دار جدنا دار اللمة و الفرحة بصح شوفي وين رانا ضروك داري راهي دار الفراق والقرحة ،وولادي واحد هارب من الدنيا ولاحق الموت كل ميصوني تلفوني نخاف نقول جابولي خبروا ،و الثاني في الحبس مرمي وحياتوا ضاعت ، والثالث من واش فات على خاوتوا كاره الزواج و الدار وتخماموا معرفتوا وين راه ، ولا هادا الملائكة لي قدامك،اااااااااااااااه يا الحاجة كون تعرفي هادا هو لي زاد حمله على كتافي وكاسرني ڨاع هم ولادي في كفة، وهمه هو في كفة وحده وثقييييييل وثقييييل جبال متحملوش، عايش يتيم ووالديه حيين مااااعندو أم يحطوا راسو على حجرها ويحكيلها حزانو ولي تنسيه هموموا بحنانتها ماعندو أب في كتافوا ووين ما يسحقوا ويقول آاابابا يلقاه حذاه ،راكي تشوفي فيا على كبري وشيبتي راني خايف والله خايف يجي نهار ويقولي وين راهي يما يا جدي وين راه بابا ،واش نقولو تماك نهدر ولا نحط راسي ونبكي همي وهمواتبكي وتهدر وعلاش يا الحاج تقول عليه يتيم بعيد الشر عليه واش خاصوا معانا علاش مانيش يماه مراكش باباه ونوال و رياااااان لي دايرو في عينيه في واش رانا مقصرين عليه و باباه مزالو حي ملبسو الغالي ومكسبوا الغالي وقاطع راسو على جالو وعلى مستقبلو كامل هادا قليل عليه .

إيه قليل قليييل هادا مزالو صغير ميعرفش وصح عندوا كلش بصح الصح معندوش غدوى كي يكبر شوي يولي في كل دورة يقول ماما واش تقوليلو كي يعرف بلي نتي جداه ماشي أمو ونوال عمتوا ماشي أمو وريان عمو ماشي باباه واش تقولي تماك، نهار يطيح ويمرض ويقول يما .

أنا نداااويه .

.

وكي يبكي ويقول يا يما .

.

أنا نسكتوا ونراضيه .

وكي يخاف ويتوجع وتغبنوا الدنيا أنا نحضنوا ونسمعلوا ونواسيه.

وانهار يقولك يا ميمة وين يما لي جابتني للدنيا هودت راسها وتبكي .

شفتي من هاد الهم راني نبكي انا ،لي ماشي ليك يا الحاجة يعييك يكسر ظهرك ويحنيك ،مهما درنالو وعيشناه نبقاو حاسين رواحنا مقصرين معاه لأنوا هو نحتاج والديه .

ربي يقدرنا نوقفوا معاه حتى ربي يفرج عليه ويهدي باباه ويرجع لولده ويتلها بيه لا انا ولا نتي مندومولوش .

ان شاء الله ياربي .

ربي يفرج علينا ويصلح أحوالنا مزال يا الحاج هادا لي راك رافد هموا هو لي يفرحك ويجمع عايلتنا ويفرحك أن شاء الله ياربي هادا مراني متمني ،وواش قال ولدك رايح معاك غدوى يروح بسيف عليه راني واعدت الناس حاب يحشمني أشومي معاهم كما مرة لفاتت والله ويقعد يدير هاكا غير واحد ميعطيه بنتوا شفت يا الحاج تقول سحراتوا اللفعة ملي بطل عليها محبش يدق باب ويخطب .

.

هااااا هاااااااصاي غير ضروك كنا نهدروا وكنتي متأثرة وتبكي وحنينة ومحلاك واش إستحضرتي الروح الشريرة تاع النسا لي فيكم ،واش دي سحراتوا ولد السلطان باشا ولدك ناس لاهية غير بيه .

انت مزال متعرفش النسا لمرا لي يبطل عليها الراجل وميرضاش بشروطها راهي تسحروا حتى تديه.

.

شوف أسيدي مزيا قلتيلي، نروح نرقي على روحي وقيل هادي سنين وانا غير مسحور خسارة عليك يا الحاج تعرفني نديرها انا .

.

لا لا مديريهاش نتي حاشا ،غير نرقي باش نحصن روحي حتى جا عندهم يضحك ويعاود لوحي لوووووحي .

.

هزه داره في حجره سما انت تحكم غير التالية ملازمش الواحد يهدر قدامك ولا كفاه يااااستوت ااأااااااا ويضحكوا عليه .

.

مريحة في البيرو تاعها وتخدم حتى دخلت عليها تجري وقفت مخطوفة ،نورسين واشبيك داخلة هاك .

دكتورة لاميران لاااااميران .

وااااااشبيه؟

.

.