رواية غدر العشاق ملك وياسين الفصل الثاني 2 كامل | بقلم كريمة حماده
_ عارفة لما نتجوز هلففك العالم كله
: ودا ازاى بقى يا كابتن
_ يابنتى ما أنا طيار ، هاخدك فى كل رحلة معايا
: طب هنقضى شهر العسل فين بقى
_ البلد اللى تحبها ست ملك هانم هنروحها
" افتكرت الكلام دة وانا واقفة فى البلكونة .
.
ازاى قدر يرسم شخصية زى دى .
.
شخصية كانت بتدينى حب ، اهتمام ، حنية ، وامان .
.
ازاى قدر يخلينى اصدقه واثق فيه بالشكل دا وهو من جواه كان بيخطط ازاى يدمرنى
حسيت بيه دخل البلكونة بتاعت اوضته ولما شافنى كان هيدخل تانى بس وقفته لما قولت من غير ما ابصله :
اتمنى السبب اللى خلاك تعمل فيا كدا يكون قوى .. سبب يستحق فعلا أنه يدمرنى بالشكل
" وقف على سور البلكونة وسند أيديه وبص للسما وقال بسخرية :
متخافيش ، دا سبب كفيل يخلينى اقت.لك
: ومعملتهاش ليه
ياسين بجمود : مش حابب الوث ايدى بدمك
" ضحكت بخفوت وهى باصة لتحت ودموعها نزلت غصب عنها ، بصتله وقالت بابتسامة كفيلة أنها توجعه أضعاف وجعها :
صدقنى يا ياسين ، انت بعد اللى عملته دا خلتنى اتمنى الموت دلوقتى عشان اخلص منك .. براڤو يا ياسين قدرت تحول الحب اللى ليك جوايا لكره ملهوش اخر وفى خلال ليلة واحدة
" خلصت كلامها ودخلت لجوة .. أما هو ضر.ب السور بعنف وغضب وبعدين دخل لاوضته ..
____________________&
"تانى يوم الصبح "
/ الله فى ريحة كيك بالشوكولاتة
ملك بابتسامة : صباح الخير يا ماما
حنان : صباح الورد يا ملوكة ، ايه النشاط دا كله وريحة الكيك دى
ملك برقة : ماما وبابا جايين النهاردة فحبيت اعملهم كيك بالشوكولاتة وكمان عملت لحضرتك ولرغد
حنان بحب : بالف هنا يا حبيبتى .. انتى كويسة يا ملك
" مسكت ملك أيدها وقالت بابتسامة : انا كويسة ، لازم ابقى كويسة عشان خاطر اهلى وعشانك وقبلهم عشان نفسى كمان
حنان بحب : ربنا يقويكى يابنتى ويجبر بخاطرك يارب
" ابتسمت ملك ليها وكملت الكيك وحنان كانت بتساعدها
من بعيد كان واقف بيراقبها .. غصب عنه ابتسم ليها وقلبه مرتاح وهو شايفها بتضحك كدة رغم أنه متاكد من جواها موجوعة .. مش قادر ينسى كلامها امبارح ولا نظرة عينها ليه ..
/ لما انت بتحبها عملت فيها كدا ليه ياسين
_ اظن قولت سبب خاص بيا
/ مش انا اختك حبيتك اقرب حد ليك
_ وعشان انتى اقرب حد ليا انتى بالذات مينفعش تعرفى حاجة
/ ليه يعنى
ياسين بهدوء : متشغليش بالك يا رغد ، خلى بالك من نفسك ودراستك .. وجوزك
رغد بحنق : وهو فين جوزى دا يا ياسين بس
ياسين بغموض : قريب كل حاجة هتتصلح يا رغد وكل غلطة عملناها هنصلحها
" جيه الليل .
.
ملك جهزت نفسها لاستقبال أهلها ، حاولت بقدر الإمكان تدارى الجرح اللى فى راسها بالميكب .
.
اتنهدت بعمق وبصت لنفسها مرة أخيرة فى المراية ،.
كانت هتخرج بس وقفت لما لقيت ياسين دخل الاوضة
وقف قصادها وبصلها من تحت لفوق ، اخد نفس وقال بتحذير :
مش عايز حاجة حصلت تخرج برة لأهلك .. مفهوم يا ملك
ملك ببرود : متخافش ، انا مش عايزة اهلى يبصولك بخزى .. عايزة الصورة اللى رسمتهالهم تفضل زى ما هى
ياسين بجمود : وانا ميهمنيش حد
: تمام تمام ... ابعد بقى خلينى انزلهم
" زقته ملك وخرجت برة الاوضة ، وهو اتنهد ونزل وراها ..
كان مراقبها وهى بتضحك وتهزر مع اهلها ومامته ولا كان حاجة حصلت
/ ايه بقى هتقضوا شهر العسل فين يا حبايبى
" بصت ملك لياسين لقيت ملامحه جامدة .. اتنهدت وقالت لمامتها بابتسامة :
مش هنسافر يا ماما
/ ايه دا ليه
ملك بهدوء : ياسين معاه شغل ضرورى وانا كمان الدراسة خلاص وانتى عارفة انى دكتورة فى الجامعة وكدا ولازم اراعى شغلى ، فقررنا ناجلها للإجازة عادى
/ ربنا يريح بالكم يا بنتى ويسعدكم يارب ويرزقكم بالذرية الصالحة
" خلصت الليلة وملك ودعت أهلها .. كانت قصاد المراية بتسرح شعرها وافتكرت شىء ..
_ ادينا كتبنا الكتاب يا ستى مش هتورينى شعرك بقى
: لا لما نروح بيتنا هتشوفه
_ ياستى حابب اشوفه دلوقتى ، هو انتى مش واثقة فيا ولا ايه
: انا بثق فيك جدا يا ياسين ... بص هورهولك بسرعة وهلبس الطرحة تانى تمام
_ ماشى
" قلعت الطرحة وشعرها اتفرد .. كان طويل جدا ولونه بنى ، اتسحر بيه وقال بنبرة محبة :
بسم الله ماشاء الله .. اللهم بارك يا ملوكة دانا هحسد نفسى عليكى والله
" نزلت دموعها بصمت وسابت المشط على التسريحة وبصت لشعرها بشرود ، فتحت درج التسريحة وخرجت مقص وحطته قصاد عيونها وبصتله بوجع
قربته من شعرها ببطء وحطت شوية شعر جواه وفجأة : ...
يتبع
(
/ وحشتينى يا رغد
" كانت واقفة فى بلكونة اوضتها ولقيت اللى بيحضنها من ضهرها..اتأفأفت بزهق ولفتله وقالت ببرود :
حمدالله على السلامة يا عمر
عمر بضيق : هو دا استقبالك ليا يا رغد
: وعايزنى استقبلك ازاى يعنى معلش
عمر بحزن : لا ولا حاجة يا رغد .. استقبلينى زى ما انتى عايزة براحتك
رغد ببرود : طيب اوكى ، عن اذنك بقى هنام عشان مرهقة شوية
" نامت رغد على السرير وسابته واقف بيبصلها بحزن وضيق منها ، نفخ بزهق وقال بهمس :
ملعون الحب اللى مصبرنى عليكى لغاية دلوقتى يا رغد
___________&
" مسكت المقص وقربته من شعرها ببطء وحطت شوية شعر جواه وفجأة لقيت اللى بياخد منها المقص بعنف وكان ياسين اللى بيبصلها بغضب وقال بحدة :
انتى مجنونة .. انتى كنتى هتعملى ايه
" قامت ملك وقالت ببرود : كنت هقص شعرى واخليه قصير
ياسين بجمود: وعايزة تقصيه ليه اصلا
: عشان بقيت بكره طوله وشكله وهو كدا
_ وانا مش هسمحلك تعملى كدا يا ملك
ملك بسخرية : ويهمك فى ايه انى مقصهوش يا ياسين ، شعرى هامك اوى كدا يعنى اقصه أو مقصهوش مثلا
ياسين بجمود: جوزك ومن حقى امنعك عن اى حاجة هتعمليها مش على هوايا
" ضحكت ملك بسخرية وقالت : والله ضحكتنى .
.
جرا ايه يا ياسين هو مش انت قولتلى انى مش نوعك المفضل وبتكرهنى وعايز تكسرنى ، مالك بقى بيا اقص شعرى ، اموت نفسى ، اعمل اللى انا عايزاه من غير ما ارجعلك .
.
هو قلبك حن مثلا فجأة كدا ولا ايه
" رمى ياسين المقص فى الارض ومسك أيدها ولفها ورا ضهرها وقربها منه .
.
كانت قريبة منه جدا ووشها قريب من وشه .
.
عيونها فى عيونه وشايف انعكاس صورته جواها ، حط أيده التانية على شعرها ومسكه بخفة وقال وهو بيجز على سنانه:
كل حاجة فيكى تخصنى يا ملك .. حياتك مرهونة بيا انا ، وقت ما احب اسيبها هسيبها حتى لو بعد سنين .. فهمتى يا ملك
" اتعمقت النظر فى عيونه وقالت بنبرة موجوعة :
حياتى فعلا مرهونة بيك يا ياسين .. بس بدل ما كانت مرهونة بالحب ، بقيت مرهونة بالقهر والوجع منك ... اعمل فيا زى ما تحب ، موتنى بالبطيىء يا ياسين
" سابها براحة وهو لسة بيبصلها ... قلبه بيدق جامد وبعنف ، كلامها زى السو.ط اللى نازل على قلبه .. جات على باله ذكرى ليهم قبل كدا..
_ يابنتى ما توافقى بقى نكتب الكتاب عشان حياتنا تبقى واحدة
: ما هى واحدة يا كابتن
_ واحدة ازاى بقى يا عيون الكابتن
: مش انا بثق فيك .. بحس بالأمان وياك .. يبقى حياتى مرهونة بيك يا كابتن
_ انتى بجد بتثقى فيا للدرجة دى يا ملك
: انا اديتك كل ثقتى يا ياسين ، عيونك وحدها لما بتبصلى بتحسسنى بالأمان .. بس اوعى يا ياسين تيجى فى يوم وتخذلنى صدقنى هتكسر اوى بجد
_ عمرى ما هفكر كدا يا ملك عمرى
" فاق من ذكرياته وغمض عيونه للحظة بتعب .. فتحها ولقيها مشيت من قدامه وراحت نامت على السرير ومغمضة عيونها ..
اخد المقص من على الأرض وحطه فى الدرج مكانه وخرج من الاوضة
" اول ما سمعت صوت قفلة الباب فتحت عيونها وفضلت تعيط وتشهق جامد لغاية ما غلبها النوم ونامت ..
__________ &
/ يارب تكونى مرتاحة بعد ما خربتى حياتهم
_ الا مرتاحة يابنتى.. ولسة هخليه يكره واحدة اسمها ملك
/ نفسى افهم ليه بتعملى كدا فيهم .. انتى كدا بتظلمى تلاتة معاكى
_ هما السبب ، هما اللى خلونى اعمل كدا وابقى بالصورة الشيطانية دى
/ ما تحاولى توقفى دا كله وتدى نفسك فرصة جديدة
_ لا ، مفيش فرصة جدا هديها لنفسى غير لما ادمرهم كلهم مرة واحدة ، لما اخد حقى منهم .. صدقينى راحتى هتكون فى دمارهم كلهم مرة واحدة....
____________&
حنان : صباح النور يا ملوكة عاملة ايه دلوقتى يا حبيبتى
ملك بابتسامة : انا بخير يا ماما متقلقيش عليا
حنان بطيبة : دايما بخير يا عيونى .. يلا تعالى عشان نفطر كلنا
عمر : عاملة ايه يا دكتور ملك
ملك بهدوء : بخير يا بشمهندس
عمر : يارب دايما
ياسين بجمود : ياريت ناكل من غير كلام
" عمر اتحرج منه وكمل أكله من غير ما يرد عليه .. أما ملك معطتهوش اهتمام وكلت بصمت ..
رغد بمكر : امبارح كنت نازلة اشرب وعديت من جنب اوضتك يا ملك وسمعتك بتعيطى جامد ، خير فى حاجة حصلت
حنان بصرامة : وانتى مالك يا رغد بتدخلى ليه
رغد : فى ايه يا ماما بسالها عادى ، مش لازم اطمن على مرات اخويا برضو
ملك ببرود : متقلقيش عليا يا رغد انا كويسة ، ولو على العياط فكنت بسمع مسلسل تركى والبطل اللى بحبه مات
رغد : يا حرام ومات ازاى بقى
" بصت ملك لياسين لثوانى وبعدين ابتسمت بسخرية وقالت : لا هو مات فى نظرى ، أصله خان البطلة وخدعها ووصلها للانتحار .. فاعتبرته مات بالنسبالى
" ابتسامة جانبية ظهرت عليه لما فهم مغزى كلامها .. كمل أكله ببرود وقال بنبرة ساخرة :
معلش ربنا يعوضها بقى بواحد تانى غيره
ملك بقوة : دا كدا كدا .
.
اصل فى الحلقة اللى بعدها اتعرفت على واحد رجعلها ثقتها فى نفسها وخلاها ترجع تضحك وتعيش.
من تانى .
.
وهو كان بيتفرج عليها من بعيد وهو ندمان ياعينى على اللى ضيعه من أيده
" كلامها عصبه جدا لدرجة أنه رمقها بنظرة حادة وعيون محمرة من شدة الغضب ، وهى كانت قابلت نظرته بتحدى وبرود وكملت اكلها قدامه ..
أما رغد كانت بتتمنى تقوم تضر.بها ، من جواها الحقد ناحيتها بيزيد اوى ، ومن غير ما تقصد وقعت كوباية العصير على عمر جنبها..
عمر بخضة : مش تحاسبى يا رغد
رغد ببرود : اسفة مقصدش
حنان : خدى جوزك وصلحى اللى عملتيه دا يا رغد
عمر : محصلش حاجة يا طنط ، انا هطلع اغير هدومى
حنان بحزم : وانا قولت تطلعى معاه يا رغد
رغد بزهق : حاضر يا ماما حاضر
" بعد ما مشيت رغد ومعاها عمر ، بصت حنان لياسين وملك وقالت بصرامة :
انتو الاتنين مفيش خروج ليكم من هنا الا وانا عارفة منكم كل حاجة حصلت
ملك بهدوء : انا معنديش حاجة أقولها يا ماما ، لانى ببساطة زيك معرفش حاجة
حنان : وانت يا كابتن ياسين ، مش هتقولى برضو
ياسين بجمود : لا .. مفيش حاجة هتتقال غير فى وقتها
حنان بزعيق : والله عال اوى عليكم ، اتنين اتجوزوا عن حب وليلة فرحهم تتقلب فجأة والعريس يسيب عروسته ومعاملتهم لبعض زى الزفت ، ومحدش فيهم راضى يقول حصل ايه بينهم وصلهم لكدا
" قامت ملك وقالت : عن اذنكم هروح اوضتى ارتاح شوية
حنان : البنت انطفت خالص ، انت عملت ايه فيها خلاها تبقى كدا
ياسين بحدة : قولتلك مش هقول دلوقتى يا امى
حنان بصدمة : انت بتزعقلى يا ياسين ... انت ازاى بقيت كدا
قراءة رواية غدر العشاق ملك وياسين الفصل الثالث 3 كامل | بقلم كريمة حماده
اقرأ الفصل التالي من رواية غدر العشاق ملك وياسين الفصل الثاني 2 كامل لمزيد من الأحداث.
اقرأ غدر العشاق ملك وياسين كاملة جميع الأجزاء
جميع فصول رواية غدر العشاق ملك وياسين كاملة في مكان واحد لتسهيل الوصول والقراءة.
أحدث روايات كريمة حماده
استمتع بقراءة أعمال كريمة حماده الأدبية الكاملة بدون حذف.
