رواية ولنا في الحب لقاء (كاملة جميع – جميع الفصول – بقلم سلمي محمد
🖊️ بقلم: سلمي محمد – الأديب المبدع لدى موقع حكايتنا
رواية ولنا في الحب لقاء الفصل الاول
بارك الله لكم، وبارك عليكم، وجمع بينكما في خير.
فرح عيره، وشوش كدابة، بيمنوا علينا بحضورهم، الكل بيبارك بابتسامه صفرا، ازاي قادرين ييجوا فرح في الأصل كان ميتم. استأذنت منهم وطلعت أوضتي، القصر الواسع من غير احباب بيبقى تربة، حسه بخنقه دا مش مكاني مكنش المفروض ابقى هنا، مكاني هناك في مصر بدرس اللى عيشت عمري كله بحلم بيه، دا مش مكاني
مراد: إنتِ يا هانم
داخل الاوضه متعصب، إزاي أطلع واسيبه لوحده معاهم، بيلوم عليا، غريبة مع اننا احنا الاتنين مغصوبين على حالنا، عادة الغصب بيجي مع قوة، طرف قوي بييجي على الأضعف ويمشي كلامه عليه مش عارفه وقتها القوي بيحس بايه يمكن لذة يمكن فخر بحاله بس اللى انا متأكده منه هو احساس الضعيف، محستش بيه أكتر من دلوقتي
هدى: ايه بتزعق ليه في ايه؟
كنت بقولها بعصبيه مش لازم ابدا يحس بوجعي
مراد: في حد يسيب ضيوفه و يطلع
هدى: مش ضيوفي دول ضيوفك انت تتصرف معاهم انت مش أنا
مراد: مش انتِ اللى تمشي كلامك عليا و...
هدى: لا اسمع انت بقى انا الليلة دي كلها ولا تهمني بما فيهم انت، اصلا مش شيفاك فلو هتفضل تزعق كده كتير معنديش اكتر من الصوت العالي فتهدأ كده وانت بتكلمني علشان انا جايبة أخري ومش طايقك ولا طايقاني ولا طايقة حد.
مراد: يعني ايه يعني
هدى: يعني تشوفك حته وتقعد فيها، و مادام فيك صوت كده معترضتش ليه على الجواز الزف.ت دي ليه ها، طب على الاقل أنا بنت للاسف قدورا عليها، لكن انت بقى يا سبع الرجاله غصبينك ليه، موافق على الهم دا ليه هااا
مراد: أنا ...أنا
هدى: أنا هقولك، انت مقدرتش عليهم بس جاي تقدر عليا انا، ولانك زيهم شايفيني الحيطة المايلة فجاي تفرض عليا كلامك وأفعالك وفاكرني هقول حاضر ونعم بكسره، هما صحيح كسروني بجوازتي منك وحلمي اللى ضيعوه بس الكسور تقدر تعور تقدر تد.بح، فعلشان الدنيا تمشي بينا بسلام كل واحد هيخليه في حاله اعمل اللى انت عاوزة بس بعيد عني وكمل حياتك عادي خالص زي ما انا هعمل بالظبط وهكمل حياتي عادي
مراد: انتِ متجوزة يا ست هانم
هدى: انت مصدق بجد اننا زوج وزوجة زي الناس، فوق يا مراد لا أنا حباك ولا أنت عاوزني، ومسيرنا هنطلق وكل واحد يروح لحاله بس لحد الوقت دا انت في حالك وانا في حالي.
مكنتش بيديله فرصه ينطق كان عصبي والغضب مالي عينه بس كان لازم أبان قوية كان لازم يحس اني مش ضعيفة وزواجي منه مش هيقهرني.
خد هدومه يغير و سابني بكمل أكلي بعد ما غيرت هدومي
هدى: رايح فين
مراد: هنام
هدى: هتنام فين
مراد: على السرير
هدى: تؤ انت هتنام بره
مراد: يعني ايه يعني بقولك ايه انا سيبتك تتكلمي براحتك لكن مزودهاش.
كان معايا سلا.ح ابيض مش بيعمل حاجه غير حمايتي منه، شاورته بتهديد بالسكي.ن اللى معايا
هدى: قولتلك تطلع بره، وافتكر دايما اني معنديش حاجه اخسرها.
لم حاجته ونام فعلا في الاوضة التانية، مؤمنه جدا بمثل اتقى شر الحليم اذا غضب، واهو بركاني بيثور حتى لو حاولت أوقفه فمش هقدر.
مراد: صباح الخير
بصيتله بلامبالاة وروحت احضرلي فطار صحيح البيت في خدم بس ابوه اعطى لهم أجازة يومين
مراد: مش هتعمليلي فطار معاكي
هدى: ليه ايدك اتش.لت، اعمل لروحك
مراد: هو محدش علمك ازاي تتكلمي مع جوزك
هدى: لا علموني اللى يقول كلمه متعجبنيش أدب فيه السك.ين اجيب أجله، تحب تشوف
مراد: ها..لا لا مش عاوزه
هدى: شاطر.. ولحد ما نلاقي حل يفكنا من الدبيس.ة السودا دي مش عاوزاك تتكلم معايا خالص، علشان أنا خلقي ضيق مفهوم طبعا
مراد:هي مش عيشة على فكره
هدى: منا عارفه ان دي مش عيشة ولا عاوزه يبقى فيه اصلا بينا عيشة.
مراد: كده هتجوز عليكي
ضحكت بسخرية: لو كنت تقدر تعمل حاجه كنت على الاقل موافقتش وكنا كلنا ارتحنا.
مراد: ما دي للاسف وصية جدي علشان رد معروف لابوكي اللى انقذ حياته فاكرك هتضيعي في الدنيا وانتي ياحرام مبقاش ليكي حد غير أمك الست الكبيرة دي ميعرفش انه لو اتسابتي في وسط ١٠٠ راجل تسدي.
كلامه بسطني وقتها بس اتأكدت ان الشخصية اللى
بمثلها نجحت، عقبال ما ابقى ممثلة مشهورة، مسير الحلم يتحقق.
فوقت من سرحاني قبل ما ياخد باله، جمدت ملامحي ورجعت من تاني لاوضتي.
فاتت أيام وشهور والحال هو الحال، منكرش انه حاول نبقى صحاب علشان الحياة تمشي بس أنا كنت برفض، اخاف اتعلق ووقت ما امشي يوجعني الفراق.
وقتها كان قاعد على المكتب بيقطع تفاح وأنا بصرخ وجاية عليه
مراد: في ايه، ايه اللى حصل
هدى: فار، لمحت فار.. اهو
مراد: هدى القوية المفتر.ية تخاف من فار
قالها بسخرية وقتها سحبت السكين وأنا بصاله وحدفتها وجت في الفار قتلته
هدى: ابقى نضف الدم أصلي بقرف.
سيبته في حاله ذهول أنا كمان مذهولة من نفسي من ثواني كنت جايه استنجد بيه وفجأة بتحول ١٨٠ درجة، وقتها خفت ابان ليه ضعيفة، وخايفة من حيوان لاحول ليه ولا قوة، انا عمري ما حبيت أقتل حيوان حتى لو نملة ضميري بيأنبني بس وقتها مات ضميري لثواني، يمكن من محاسن ابويا انه علمني النشان، فكان من السهل عليه موته.
كنت في المطبخ سرحانة في اللى حصل وبعملي ساندوتش، لمحته جاي
هدى: ها رميته
مراد: أه أه ...هو ايه اللى حصل
هدى: تقريبا دخل من الجنينة و...
مراد: ايه اللى حصل في الاوضه أقصد؟
هدى: موته عادي
مراد: إنتِ كنتِ خايفه منه ازاي قتلته بالجرأة دي
هدى: بكره أشوف حد مستضعفني فتلاقني بقوى أكتر
مراد: أنا مش قادر أفهمك
هدى: عادي ساعات مبفهمنيش.
الزمن وقف حواليا الموضوع مش بس إني بمثل اني قوية، الموضوع شكله جد، وانا مكنتش عاوزة كده، أنا كنت مبسوطة بحياتي البسيطة، ضحكتي الدايمة، روحي الهادية، أنا إزاي بتحول كده، إزاي ممكن الانسان يتغير للدرجة، أنا مش حباني واللى مثلته زمان بيتحقق قدامي، عاوزه ارجعني بس شكل الوقت فات، أنا عاوزاني.
مراد: اتفضلي يا ندا
وقتها كنت في الصاله بشوف مسلسلي رجعت براسي ورا علشان اشوفه جاي مع مين
مراد: هدى، دي ندا صديقتي و...
رجعت تاني اشوف المسلسل: مش مهتمه، نادي على الخدم يعملوا ليها حاجه تشربها ولا أعمل انت
مراد: هدى تعالي عاوزاك
هدى: بعدين ...
قرب عليا مسكني من دراعي وقومني بالعافية ودخلنا الاوضة
اتكلمت بعصبية: اياك تمسكني كده تاني فاهم لا قدام حد ولا قدام نفسك حتى فاهمني؟
مراد: إنتِ ايه؟ ها، على الاقل مثلي قدامها انك مهتميه على الأقل بيا، أنا مأذيتكيش في حاجه بعاملك كويس واللى عاوزاه بجيبه حتى لو مطلبتيش، بحاول أقرب حتى نكون أصحاب وانتِ بترفضي، أنا مستاهلش منك كده، أنا مغصبتكيش على اللى احنا فيه
هدى: ولا أنا غصبتك، من الأول فهمتك أنك مش فارقلي ولا هتفرقلي، وتشكر يا سيدي على المعاملة الكويسة اللى بتعملهالي
مراد: إنتِ عمرك ما هتشوفي الحلو اللى جوايا
هدى: لا أنت عمرك هتشوف التشوة اللى حصلي بسبب وصية جدك الغبي.ة
سابني وخرج قعدت على الارض، أنا ايه اللى وصلني لكده، أنا ازاي بقيت بشعة كده، أنا مش بس محرقتش اللى حواليا لأ أنا حرقت روحي معاهم.
كان راجع من شغله مبسوط ولأول مرة أسأله عن حاله استغرب في الأول ورفض يجاوب بس السعادة اللى على وشه مكنش ليها غير سبب واحد سبب يوجع اي ست.. غيري
سابني ودخل الاوضه يغير هدومه وقفت على الباب
هدى: اسمها ايه؟
مراد: ها
هدى: قول قول يمكن افيدك
مراد: إنتِ بتتكلمي جد
هدى: ومش هتكلم جد ليه
مراد: يمكن علشان متجوزين مثلا
هدى: بطايق بس، يعني في واحدة؟
مراد: أأأأ
هدى: يعم قول متخافش هساعدك والله، وجه جديد في الشركة؟؟؟
مراد: اه جت من شهر من وقت من حاسس بحاجه ناحيتها، حاسس اني اعرفها من زمان، حاسس إني ....
هدى: بتحبها؟
مراد: إنتِ اللى قولتي احكي، ثم انا محبتكيش ولا إنتِ كمان حباني، والقلب معلوش سلطان ...صح
كان بيقول كلامه الاخير وهو بيطبطب عليا بيه فاكرني هضايق يمكن اضايقت مش علشان بحبه لكن يمكن كان نفسي في حياة غير دي، كان نفسي في بيت دافئ وزوج لطيف وبنوته جميلة، كان نفسي نكون أسرة افرح إني كونتها.
هدى: وهي عارفه انك متجوز
مراد: للأسف اه وبتتجنبني من وقت ما عرفت.
هدى: إمممم..وإنت بتحبها أوي يعني
مراد: أوي.. احم لا أنا بس عادي و..
هدى: متبسبسشي بقى ليها حل
مراد: بجد
كان فرحان فرحة العيل بهدوم العيد، قلبه دقلها ليها، اهو يبقى حد فينا لقى حبه.
هدى: مفيش مناسبة قريب للشركة أو ليها
مراد: في النهاردة حفل توقيع سفقة مهمه للشركة وأنا عزمتها بس في مشكلة؟
هدى: إيه
مراد: إنتِ
هدى: أنا!!!
مراد: مش إنتِ مراتي إزاي بقى هقعد معاها وإنتِ المفروض هتيجي معايا
هدى: بس أنا مش جاية
مراد: ليه؟
هدى: علشان أنا ست مفتر.ية رفضت تقف جمب جوزها في مناسبة مهمه زي دي
مراد: دا بجد؟
هدى: فوقلي يا مراد، دا اللى هتقوله ليها لما تسألك عني
مراد: هو إنتِ مش هتضايقي إني اتكلمت عنك وحش
هدى: لا هضايق وهاجي اتخانق معاك انك بتحب واحدة عليا وافضح.ك في الشركة، هتبقى مبسوط
مراد: أأأ
هدى: يبقى كده البنت طارت من ايدك، عاوزاها تطير؟
مراد: لا والنبي خلاص
هدى:لا تطير
مراد:مخلاص يا حجه بقى
هدى: بعد ما تقولها كده تقعد على اقرب ترابيزة و تزعل ويا سلام بقى لو تنزلك دمعتين يااااه
مراد: تفتكرتي هينفع
هدى: عيب عليك، احنا البنات نحب الحاجات دي أوي، نحب نطبطب على اللى قدامنا في العادي تخيل بقى وانت حزين، الطبطبة هتبقى الضعف
مراد: بس هي قاهرية وإنتِ يعني ..
هدى: علشان ارياف يعني، العجينة واحدة
مراد: ايه؟
هدى: متاخدش بالك و..
مراد: إنتِ ليه مطبطبتيش عليا
هدى: هنرجع للكلام اللى ملوش لازمه
مراد: ردي عليا ليه مطبطبتيش عليا؟
للمزيد من الروايات الحصرية زوروا موقع حكايتنا للروايات الحصرية.
