ريحان: امك الله يرحمها كانت حنينه وكانت متعلقه باختك اوى

يحيى : وحضرتك يا بابا كنت ونعم الزوج قدرت تعبها ومرضها ورغم انها طلبت منك الجواز اكتر من مره لكن انت راعيت مشاعرها ومرضيتش تتجوز عليها واكتفيت بينا

ريحان: انتوا اهم حاجه عندى فى الدنيا

يحيى : ربنا يخليك لينا يارب

_______________

نرجع مره تانيه عند زليخه

زكى رجع البيت بليل وكان ابنه قاعد بيتفرج على التلفزيون

زكى : ها كلمت امك وعقلتها

وائل : اه يا بابا اطمن والشغل كمان اتسلم انهارده

زكى : ايوه كده عايزك دراعى اليمين وتفضل مصحصحلى

وائل: بقولك ايه يا بابا انا عايزك تخلصلى حوار الشقه ده بقى عايز اخطب واتجوز انت اهو هتتجوز التانيه وانا لسه ملحقتش اتجوز الاولى

زكى : بكره نروح نخلص فيها ياد اهم حاجه اى حاجه تحصل فى البيت بينى انا وامك ومراتى الجديدة انت ماتدخلش بينا سامع

وائل : سامع يا كبير وحقك تتجوز اربعه مش اتنين بس هو دلع حريم بقى

زكى : ايوه كده جدع طالع لابوك

______________

عند يسر كانت بتكلم خطيبها

يسر : زى ماحكيتلك كده بابا هيتجوز على ماما

عمار : على فكره انا شايف انه عادى ما رجاله كتير بتتجوز على مراتتها ابوكى لاهو اول ولا اخر واحد والمفروض انكم الاهم عند امك من ابوكى انتى بس خليكى فى صفه عشان يجبلك كل اللى انتى عايزاه فى جهازك عشان نتجوز ونخلص

يسر بصدمه بس دارتها : يعنى ده رايك ان عادى بعد العمر ده كله الراجل يبع العشره ويتجوز على مراته ويقهرها

عمار : امك مش كبيره تقدر تطلق منه وتشوف حياتها هى كمان

يسر : ايه اللى انت بتقوله ده لا طبعا

عمار: ابوكى بصراحه مش غلطان امك اللى غلطانه عايشه دور المضحيه اوى واحده غيرها كانت خلت واحد زى ابوكى ده خاتم فى صباعها بس هى اللى مش عارفه قيمه نفسها امك دى عامله زى الدهب كل اما بتقدم بتغلى بس للاسف مش عارفه تقدر قيمه نفسها

يسر : للاسف بابا واخد من ماما كل حاجه

عمار: ابوكى بيهمه مصلحته وبس وامك فضلت طول عمرها تدى من غير حساب ومامناله اوى

يسر : دى شالت جدتى واستحملتها وكانت عايشه زى الخدامه ليها لحد ما ماتت وقبل ما تموت تيتا حبت تخلى ماما تسامحها راحت كتبتلها البيت اللى احنا قاعدين فى ده باسمها وحلفت ماما مانجيب سيره لبابا وادتها الدهب بتاعها وبابا اخده منها باعه وسابلها كام حاجه كده مع ان تيتا كانت بتحب الدهب وكان معاها دهب كتير وكردان كبير لوحده كان عامل كيلو دهب غير الغوايش ماما شتلتلها اسوره كبيره خبتها وسلسله كبيره وخاتم دول اللى قدرت تخبيهم من بابا لكن بابا خد الباقى كله وباعه

عمار: وهو عرف ان البيت اللى انتوا فيه ده باسم امك

يسر : لأ طبعا انا أصلا حاسه ان ماما ناسيه الموضوع ده وحتى لو باسمها مش هتعرف تعمل حاجه لان بابا واخد وائل فى صفه ورولين كمان

عمار: طيب فين اهل امك

يسر : عايشين في محافظة كده بعيدة عن القاهرة بقالنا سنين مش بنسافر ليهم بس ماما بتكلم تيتا فى التليفون على طول واحيانا خالو بيجى يزورنا لو عنده مصلحه بيخلصها هنا وبيجي صد رد كده

عمار: يعنى امك لوحدها مالهاش ضهر

يسر : تقدر تقول كده المهم دلوقتي انا عايزاك تخلص الشقه بسرعه لانى بصراحه مش هقدر استحمل وجود ست تانيه غير امى فى البيت وكمان بفكر اخلى ماما تيجى تعيش معايا

عمار: بتوتر : اه طبعاً طبعا يا حبيبتي تنور على راسى

__________

تانى يوم الصبح على الفطار

زكى : بقولك ايه يا زليخه عايزك تنضفى الدور اللى فوق كله وتروقيه سامعه عشان الخميس الجاى دخلتى

زليخه: وانا مالى ماتيجى العروسه واهلها ينضفوا الشقه وتفرشها هى

زكى : لا يا اختى لا هى ولا اهلها هيعملوا حاجه انتى اللى هتفرشى وتنضفى فاهمه وكمان الاكل عايزك تجهزى اكل عرايس سامعه

زليخه: وانا مش هعمل حاجه انا ايه اللى يجبرنى على كده

زكى : اسمعى الكلام بدل ماهخلى فيكى حته سليمه ومحدش هينجدك من ايدى فاهمه كلامى ولا اقول تانى انا رايح الشغل عايز اجى اطلع فوق الاقى الشقه مفروشه وجاهزه سامعه

والاكل انا هبعتلك الاكل اللي انا عايزك تعمليه وانتى تحضرى وبس فاهمه عشان ايامك تعدى على خير

زليخه:

عدى يومين وجت هند عشان تشوف شقتها

زكى : يا زليخه يا زليخه تعالى سلمى على ضرتك هند

هند مدت طراتيف صوابعها عشان تسلم على زليخه

هند : بقرف لزليخه أهلا

زليخه مردتش عليها

زكى : بقولك ايه تعالى يلا نطلع عشان تتفرجى على شقتك الجديدة عشان لو محتاجه اى حاجه نلحق نعدلهالك يا عروسه

هند : اه يا حبيبي يلا عشان نطلع وبصت زليخه وانتى كمان يلا عشان تطلعى معانا

زليخه: وانا مالى اطلع معاكوا ليه

هند : امال مين اللى هيشوف اللى انا عايزاه ويعدله

زليخه: ماتعدلى انتى لنفسك انا مالى

هند : نعم يا ختى لا طبعا انا عروسه ومش بعمل حاجه ولا انت ايه رايك يا زكى

زكى : ايوه طبعا عندك حق يلا يا زليخه اطلعى معانا واى حاجه تقولهالك هند نفذيها على طول من غير كلام سمعانى

زليخه: وانا ايه اللى يجبرنى على كده

زكى : انا اللى بجبرك على كده واسمعى الكلام عشان مامدش ايدى عليكى قدامها يلا اتنيلى واتحركى بقى

زليخه طلعت معاهم وبتحسبن فى سرها

طلعوا الشقه

وهما طالعين هند فضلت تدلع على زكى قدامها عشان تغيظها وزكى كمان كان بيساعدها على كده وزليخه كانت ماشيه معاها ماسكه دموعها على العشره اللى داسها برجليه وعلى عمرها اللى ضيعته على الفاضى بس هى هتصبر عشان ولدها يمكن ربنا يحنن قلوبهم عليها

هند : بقولك ايه انا عايزه الكنبه بتاعت الانتريه دى هنا والكرسيين دول هنا سامعه يا زليخه

ودخلت غرفه النوم : ايه ده فين التليفزيون

زكى : مافى واحد في الصاله

هند : اه الصاله ده عشان لما يجوا ضيوف انما انا عايزه واحد فى غرفه النوم يسلينى على ما الغدا يجهز انت عارف انا بحب انام واصحى براحتى لما اصحى اتفرج عليه عقبال ما الغدا يجهز ويطلع

كده ما ينفعش يا زيكو

زكى : عيون زيكو بكره يركبلك احلى واكبر تلفزيون وباس ايديها وفضلوا يتفرجوا على الشقه وهند بتحاول تطلع اى ملاحظات عشان تخلى زليخه تعملهالها وبتحاول بشتى الطرق انها تضايقها وتغيظها خلصوا فرجه ونزلوا الشقه تحت

زكى: ها يا قلبى تحبى تتغدى ايه

هند : مكرونه بالبشاميل وبانيه

زكى : يلا يا زليخه اسمعى كلام هند واعملى الاكل اللى قالتلك عليه واثناء كلامهم دخل وائل

وائل: ازيك يا بابا ازيك يا مرات ابويا

هند : اهلا ازيك يا وائل

زكى بص على زليخه لقاها واقفه

زكى : ماتتحركى يا وليه اعملى الغدا واقفه بصالنا كده ليه

وائل : اه يلا يا ماما لحسن انا جعان اوى بسرعه

دخلت زليخه بدون ولا كلمه تحضر الغدا وبتبص على المطبخ والبوتاجاز اللى عماله تتحايل على جوزها عشان يغيروا ليها وهو مش راضى وراح جايب احلى واغلى حاجه لمراته الجديدة استغفرت ربنا وبدأت بتجهيز الاكل

وخلصته وحضرته على السفره

زليخه: الغدا جاهز اتفضلوا

قعدوا كلهم على السفره ولسه زليخه هتقعد

هند : بقولك يا زليخه عايزه مخلل معرفش اكل كده وهاتيلى كوبايه حاجه ساقعه ابلع بيها

زليخه دخلت بدون كلام جابتلها اللى هى عايزاه

هند : اكلك حلو يا زليخه كده خلاص اطمنت ان كل يوم الاكل اللى هيتعمل هيكون حلو

زليخه: وانا مالى بالاكل اللى هتكليه كل يوم

هند : مهو انتى اللى هتطبخى انا مش بعرف اطبخ ومتفقه مع زكى على كده

زليخه : لا انا مش بطبخ لحد انا بطبخ لولادى وبس

وبتبص لوائل عشان يقف فى صفها لقته قان وقف مره واحده

وائل: بابا معلش انا همشى دلوقتي عشان التجار واقفين يستلموا البضاعه لما اجى نتكلم سلام وسابهم ومشى

هند : بصى بقى يا حلوه انا جايه هنا هانم وانتى شغاله عندى فاهمه من اولها كده عشان تبقى فاهمه وعارفه نظامك ايه فى البيت ده وقت الغدا هرن عليكى اول ماصحى من النوم تطلعيلى الغدا عشان انا بصحى متاخر مش بفطر بتغدا على طول وبعدين تشوفى ايه فى الشقة محتاج تعمليه وبعدين تنزلى تشوفى وراكى ايه هنا ولما أحتاج منك حاجه هكلمك تطلعى تعمليهالى فاهمه

زليخه بصت لزكى : انت موافق على كلامها ده

زكى : اه موافق وانا اللى قايلها كده انتى خلاص راحت عليكي وهى ست البيت الجديدة اللى تقولهولك تنفيذه حتى لو طلبت منك تغسليلها رجليها تنفذى من سكات فاهمه واه ابنك عارف وموافق على كل حاجه ومفتكرش حد من البنات يقدر يفتح بقه لارين اهم حاجه عندها خروجاتها مع صحابها والدروس وبنتك التانيه ساكته عشان اجهزها واجوزها فلمى الدور بقى وارضى بنصيبك

زليخه: حسبي الله ونعم الوكيل فيكوا حسبى الله ونعم الوكيل

زكى انتى بتحسبنى عليا وراح ض*ربها وموقعها فى الارض وكانت هند قاعده وحاطه رجل على رجل وبتبصلها بشماته

هند : عجبك كده ماكنتى سمعتى الكلام من الاول لزمتها ليه تقلى من نفسك كده 😔.

خلاص يا زيكو هى هتبقى كويسه وتسمع الكلام من غير اعتراض يلا ادخلى اعمليلى كوبايه نسكافيه وشوفى زيكو هيشرب ايه

اثناء حديثهم دخلت بنتها يسر

يسر : ماما ايده مالك في ايه

زكى : مافيش حاجه كل ده عشان قولنالها تعملنا كوبايتين نسكافيه

يسر : خلاص يا ماما تعالى ارتاحى وانا هعمل للضيوف بنفسى النسكافيه تعالى معايا واخدتها دخلتها الاوضه بتاعتها تعالى اوضتى على مخلص النسكافيه واجى اتكلم معاكى

يسر عملت النسكافيه وخرجته ليهم

هند : على فكره يا حبيبتي انا مش ضيفه انا مرات باباكى وهسكن في الشقه اللى فوق يعنى مش ضيفه يا حبيبتي

يسر فهمت مامتها ليه زعلت

يسر : اه اهلا يا طنت طيب يعنى لسه مسكنتيش يعمى ضيفه اتفضلى بقى اشربى النسكافيه وخدى واجب الضيافة وسابتهم ودخلت لمامتها

_____

زكى : ها يا ست الكل ايه رايك عملتلك كل اللى انتى عايزاه اهو راضيه

هند : اه يا حبيبي راضيه طول مانت مابتعملى اللى انا عايزاه هبقى راضيه عليك

وكده احسن عشان تعرف مقامها من اولها ومتستجراش ترفع عنيها فيا تانى

زكى : اى خدمه يا عسل

_______

يسر : مالك يا حبيبتي حصل ايه وانا في الكلية

زليخه حكتلها كل اللى حصل

يسر : وانتى ليه تستحملى القرف ده يا ماما انتى ناسيه ان تيتا كتبالك البيت ده يعنى تقدرى تطرديهم هما الاتنين من البيت مش بس هى