الخوف الفصل الاول

الخوف

الفصل الاول

هبدأ معاكم كلامي بأن اللى هتسمعوه مني مش حاجة حصلت وخلصت، اللى هتكلم معاكم فيه حاجة انا بعيشها وعايشاها ومش عارفة نهايتها ايه؟ يمكن علشان كده قررت اكتب لو جرالي حاجة او لحقت نفسي وخلصت من اللى بشوفه الاقي اللى يساندني او حتى يهون عليا او يلومني ويقول ان انا اللى الغلط فيا، اسمي سمر..عندي 27 سنة، خلصت كلية طب واتجوزت رامي زميلي فى الكلية وحب عمري كله من وقت ماكنت فى الثانوية العامة، بابايا الله يرحمه متوفي من قبل ما اخلص جامعه، عندي اخ واحد اسمه محمد لكن مسافر من كام سنة ومتجوز بنت من بلد عربية ويمكن مش شاغلين بالنا كتير بأنه بعيد بسبب عدم موافقتنا بجوازه من البنت دي، مش سهلة وده اللى شوفناه فيها من وقت ما عرفنا عليها، واختي سارة بكالوريوس تجارة انجليزي وحاليا موظفة فى بنك خاص وهي اكبر مني بخمس سنين، مامتي كانت موظفة لكن طلعت معاش من كام سنة... انا برغم اني دكتورة لكن مش بشتغل تقدروا تقولوا ماصدقت اني اتجوز حب عمري ماكنتش عايزة في حياتي اي حاجة غير اني اعيش له هو وبس، وفعلا من وقت ما اتجوزنا وانا شغلي الشاغل هو اني اسعده، وعلشان كده كنا كل يوم بالنسبالنا كأنه اول يوم فى جوازنا، قليل جدا لو حصلت بينا مشكلة وفى الغالب بتكون بسبب غيرتي عليه مش اكتر، لكن الحمد لله معندناش اي حاجة تانية ممكن تسبب مشاكل، معندناش اطفال لأننا شايفين اننا لسه محتاجين وقت لنفسنا وبس، مش عايزين ييجي طفل يشغلنا عن بعض واحنا لسه ملحقناش نشبع دلع وسعادة، مش معنى كده ان الاطفال هتمنع ده، لكن فكرة المسؤلية وان هيبقى فيه طفل لازم يكون له اهتمام خاص بالنسبالنا كان محتاج وقت كافي مخصص له لواحده، ولأننا استنينا نتجوز سنين طويلة حسينا اننا لسه مقضيناش الوقت اللى نقول عليه كفايا علينا نكون لواحدنا، رامي بيشتغل فى مستشفى استثماري وله اسم كويس جدا وناجح جدا فى شغله برغم انه مش كبير فى السن يعني، هو اكبر مني بسنة واحدة بس لكن بسبب سنة واحدة وقعت منه فى الدراسة كنا مع بعض سنة بسنة، حياتي مع اهلي عادية جدا زياراتي لأمي مش كتير لأني بحب بيتي اكتر مما تتخيلوا، وفي نفس الوقت بصراحة مش بحب اتكلم عن علاقتي برامي قدام سارة اختي كتير علشان مضايقهاش بالكلام لانها اكبر مني ولسه مجالهاش النصيب، وانا بصراحة معنديش حاجة ولا مواضيع اتكلم فيها غير بخصوص رامي وعن رامي، هو محور الاحداث بالنسبة لحياتي، ماما اوقات كتير بتضايق من اني مش بروحلها لأني دلوعتها زي ماتقولوا لكن من كُتر مازهقت من الكلام بطلت خلاص واخر حاجة قالتهالي فى عتابها:

- ياختي خلي قاعدتك جنب الدكتور بتاعك تنفعك.

بالنسبالي الكلام مش بيزعلني لأن قاعدتي جنبه وفى اي مكان فيه ريحته بينفعني، وبيريحني...يمكن تقولوا عليا ملزقة ومسهوكة والكلام ده، لكن يمكن اللى يحسوا بمعنى كلامي اللى استنوا سنين طويلة محافظين على مشاعرهم ونفسهم وتصرفاتهم قصاد حد بيعشقوا التراب اللى بيمشى عليه علشان ربنا يتمم علاقتهم دي بالحلال، فطبعا ماصدقت اعوض كل السنين اللى كنت ببقى حابسة فيها مشاعري وكتماها جوايا وخايفة اصارحه بيها لحد ما اتجوزنا، بقالنا متجوزين بس اربع سنين... يعني لسه بدرررري اوي عقبال ما احس بالملل من الجواز او من علاقتي بيه، وشايفة ان لسه وقت طويل لحد ماحياتنا تكون روتينية، رامي مامته وباباه عايشين في دبي واخته رغد متجوزة هي كمان وعايشة هناك، كل سنة بييجوا زيارة وبنقضي اوقات جميلة الحقيقة مع بعض انا بحبهم وهما كمان الحمد لله بيعتبروني بنتهم، المميز فيهم انهم مش شاغلين بالهم بالدخول فى تفاصيل حياتي انا وجوزي ولا حتى موضوع الاطفال ده، رغم ان اهالي كتير بيتدخلوا فى الموضوع ده فى العادي وخاصة بقى لو كان ولد واحد وعايزينه يجيب ولد يشيل اسم العيلة، العلاقات بين اهلي واهله طيب ومفيش فيها اي مشاكل من اول ماعرفوا برغبتنا فى الارتباط ببعض لحد دلوقتي، لكن خلوني اتكلم معاكم فى اللى حصل معايا انا ورامي من كام يوم بس، كان لسه راجع من الشغل ومن عادتي انه كل يوم لازم ييجي يلاقي البيت ريحته تجنن والنور هادي والغدا جاهز وانا على سنجة عشرة زى ما بيتقال، عروسة بمعنى الكلمة، الميك اب الهادي واللانجيري اللى بيعجبه وتسريحات شعري اللى بجيبلها كل يوم طريقة جديدة من على النت، حاجة كده تخليه ميفكرش فى اى حد تاني ولا اي حاجة تانية غير انه يرجع البيت وبس:

- حد يصدق انه هيشوف القمر قاعد فى نص بيته كل يوم كده؟

جريت عليه حضنته اول ما قفل باب الشقة:

- وحد يصدق ان انا عايشة مع صاحب احلى عيون فى الدنيا كلها؟

رامي وهو بيدخل بيا الاوضة شايلني:

- محدش ابدا بيصدق اني لسه عايش عريس برغم اننا بقالنا كذة سنة متجوزين.

سمر:

- وليه تحكي؟ خاف من الحسد، اصل محدش استحمل اللى احنا استحملناه غيرنا.

رامي وهو بيغير هدومه:

- تصدقي انا فعلا بستغرب جدا من اللى بيتحكالي من زمايلي، مشاكل من صعوبتها فيه ناس خايفة تتجوز اصلا.

سمر:

- انت مش شايف خوف محمد اخويا من الجواز من بناتنا هنا خلاه خد واحدة عاملة ازاي؟ قالك ان احنا نكد وبنحب المشاكل، وسارة كمان اتعقدت، عرفت ليه بقولك خاف من الحسد.

رامي وهو ماسكني وطالعين نتغدا:

- بصراحة الواحد مش عارف العيب فى البنات ولا الرجالة، اصل اخوكي خاف من بنات مصر راح اتجوز من برة، واختك خافت من الرجالة فقررت متتجوزش، وتلاقي الرجالة طفشانين من بيوتهم وستاتهم، وتلاقي الستات بتلعن الساعة اللى وافقت فيها على الجواز، الوحد مش قادر يقتنع بفكرة ان طرف واحد هو السبب فى الفشل ده.

مسكت المعلقة وابتديت أكله بأيدي وانا بقوله:

- مالناش دعوة بيهم خلينا احنا فى نفسنا وبس.

ضحك رامي واكلنا سوا وبعدين دخل اخد الدش بتاعه وطلع من الحمام دخلنا اوضتنا قضينا وقت حلو كعادتنا ونمنا شوية الوقت بتاع بعد العصر ده، متعودين على كده ونصحى على بعد المغرب وننام بليل على الساعة 12، ده روتين حياتنا اليومي، ظروفنا المادية ممتازة، نايمين حاضنين بعض وكل واحد فينا تقريبا عايش مع التاني فى احلامه لحد ما فتحت عيني فجأة على صوت صرخة مرعبة... صرخة بصوت واحدة ست مش بصوت رامي، صرخة من اوضتي...لالالا مش من اوضتي، دي من جنبي...من على السرير بتاعي، صوت صرخة بشهقة كتمت نفسي من الخوف والرعب وانا مش قادرة اعرف مصدرها ايه بالظبط، ماهو مش معقول يكون رامي هو اللى صرخ بالطريقة دي...ده صوت واحدة ست، وصوتها مرعب ويخوف فعلا، حاولت اقاوم فزعي من الصوت اللى سمعته وحركت رامي بسرعة وانا عايزاه يقوم يطمني بس اللى حصل عكس كده تماما، لأن.......

يتبع

هستنى رأيكم اكمل ولا ايه؟