عُقاب شمهورش الفصل السابع

سألتها بسرعة وانا بقولها:

- ايه بقى الكتير اللى حصلها ده؟

رديت الست بحزن واحباط باين على وشها وهي بتقول:

- ابوها مكتفاش انه يحضر عليها شمهورش بس الجن اللى بيساعده، ده بقى بيجرب كمان يحضر عليها غيره وغيره من الجن وعشائرهم المختلفة عن عشيرة شمهورش...كان شمهورش ده بيحضر عليها وبيخلص جوزي الحالة اللى عنده ويصرفه من غير اذى لأيات، وهي الحمد لله كانت مش بتفتكر ولا بتاخد بالها من اي حاجة..كل اللى زاد عليها بس هو ان الصداع بقى مستمر معاها علطول حتى المسكنات كانت مش بتجيب معاها نتيجة...لكن المصايب اللى بصحيح حصلت لما حضر عُقاب...أبن شمهورش، وده ملعون اكتر من ابوه، كان اخبث جني ممكن تتكلم عنه، كان بيكره الأنس وبيعشق أذيتهم ولأن ده مبيحصلش غير لو جت الفرصة اللى تسمحله بأنه يتواجد فى العالم بتاعنا ويقدر يتصرف مع بني البشر من خلال شخص يساعده فى ده جاتله فرصته عن طريق جسم ايات...كان فاكر ابوها انه بعُقاب هيقدر يحقق اللى شمهورش مبيقدرش يعمله، وفعلا هو فى البداية واول ما ابتدا يحضر على جسم ايات بقى بينفذ لجوزي كل حاجة هو عايزها، ومفيش حالة كانت بتيجي تطلب من جوزى أذى او شر لحد تاني الا وكان عُقاب بينفذها بدقة اكتر من ابوه كمان، حتى لو خير ولا جلب ولا صُلح كان عُقاب عنده القدرة اللى تخليه يوصل للي هو عايزه بطرق هو لوحده اللى بيعرف يستغلها، وطبعا اللى عمله زود طاقة جوزي وثقته فى نفسه وابتديت اسعار زيارته تزيد والناس بقيت بتزيد عليه اكتر واكتر...فى وسط كل ده كانت ايات كل يوم يجد عليها جديد...

قاطعتها وانا بقول بفضول:

- جديد ازاي يعني؟

رديت هي وقالت وهي بتمسح دمعة نزلت من عنيها:

- بقيت طول الوقت تقعد قصاد سهر تتفرج عليها وبس، لو سهر فى الحمام بتاخد دش كانت تفتح عليها الباب بأى حجة، كانت سهر بتتعامل عادي دى اختها يعني واحنا معندناش حد غريب فى البيت وابوهم علطول قاعد فى الدور اللى تحت...اصل البيت كان دورين، مرة على مرة بقيت ايات تلمس اختها بطريقة غريبة فى البداية كانت سهر بتستغرب وتبعد ايد ايات عن جسمها، لكن مع زيادة حركات ايات الغريبة مع اختها ابتديت سهر تضايق وتنفعل على اختها وتقولها:

- - اوعي تلمسيني بالطريقة دي مرة تانية، انا مبحبش الحركات دي يا ايات...بلاش تخليني اقول لأبوكي.

قاطعتها وانا هموت واعرف نهاية القصة:

- وبعدين قالت لأبوها ولا لاء؟

رديت الست وهي بتقول:

- ملحقتش سهر تقول حاجة، لأن ايات حصل منها اللى محدش كان متوقعه، لقينا عنيها اتحولت للسواد بشكل يخوف، انا مش عارفة لما كانوا بيحضروا عليها كانت بتبقى بنفس الشكل ولا لاء لأني مش ببقى معاهم فى الجلسة، لكن صوت ايات اللى خرج منها كان اكبر دليل على انه فيه جن حضر عليها، وسمعناه بصوت يرعب ونظرات كلها تهديد مبعدتش لحظة عن سهر:

- هتقوليله ايه؟ ميقدرش يعمل حاجة، ابوكي خادم ليا ولأوامري، ولو روحتى تطلبي منه يبعدني عنك يا سهر...هيبوس ايدي علشان اقرب اكتر مهما كان اللى هيحصل فيكي، بس المهم مصالحه متتعطلش، انتي مش شايفة ابوكي بقى فى ايه بسببي؟ بلاش تقاوميني علشان متأذيش اختك...هاهاهاهاهاهاها.

كنت بسمع وانا فاتح عيني وبوئي على اخرهم من الذهول، مش عارف اتخيل ازاي حد يشوف حاجة زى دي بتحصل فعلا قدام عنيه، لكن هي كملت كلامها من غير ما تهتم بذهولي ده وقالت:

- جريت على ابوهم فى المندرة بتاعته وانا بصرخ وبقوله:

- الحق، بنتك اتلبست، منك لله، مش قولت مفيش حاجة هتأذيها، البت راحت وهتضيع اختها كمان...

قام بهدوء من مكانه وطلع قدامي لأوضة البنات، كانت ايات واقفة بمنتهى الثقة على عكس طبيعتها قصاد سهر اللى كانت عنيها مليانة دموع واقفة فيها ومش قادرة تنزل، دخل الاوضة وقال:

- ايه اللى بيحصل يا ايات؟

من غير ما تلتفت ايات لأبوها، طلع صوته مرة تانية وهو بيقول بضحكات فيها استهزاء بينا:

- ايات مش موجودة دلوقتي يا عُبد، انا اللى موجود...سيدك ومولاك عُقاب هو اللى موجود، وعايز بنتك سهر وهي شايفة انك تقدر تمنعني..

فى اللحظة دي كان واقف عبده زي المبلول، كأنه بلع لسانه ومش عارف يلاقي حاجة يقولها، كانت سهر معلقة عينها على ابوها مستنية مساعدته ليها، لكن النظرات اللى كانت فى عنيه تقول ان عُقاب ده بيتكلم صح، وان ابوها مش هيقدر ينقذها منه، وانه يخسر بنته اهون بالنسباله من انه يخسر باب الكنز اللى فاتحهوله عُقاب، وملحقتش اقول حاجة لأني لقيت سهر وقعت من طولها مغم عليها قصادنا كلنا، ومع وقعتها دي سمسعت صوت ضحكاته مرة تانية وقبل ما اجري على سهر كانت ايات كمان مرمية على الارض شبه حتة القماشة، بقيت بصرخ فيه وانا راكعة على الارض بين بناتي بهز دي بأيد وبحرك التانية بأيد وكل واحدة منهم فى عالم تاني خالص، لكن فى وسط دموعي وصرخاتي دي هو واقف زي التمثال وبيقول:

- بير واتفتح يا ام البنات، يا هنتدفن فيه يا هيطلعلنا من بطنه الخير كله.

مشغلتش بالي بالرد عليه كان المهم بالنسبالي انهم يفوقوا، ولأن بيتنا معروف انه بيت ساحر كان مستحيل حد يقرب منه لو سمع صوت صريخ، دايما الناس شايفة ان دي اصوات عفاريت، اي صوت يخرج من بيتنا يبقى سببه العفاريت، ومحدش بيعتب بيتنا زيارة الا الناس اللى بتيجي علشان الاعمال والسحر وبس، فاقوا البنات بصعوبة وكان قلبي هيقف من الخوف عليهم، فكرت انهم ضاعوا مني، لكن كل واحدة فاقت حد تاني خالص غير اللى كانت عليه، من بعد اللى حصل سهر بقيت زى ما انت شوفتها كده علطول مكشرة وعلطول كلامها حاد وعلطول تحس فيها بالعدوانية، اما ايات فكانت طول الوقت بتتكلم مع نفسها لدرجة ان الناس كانت بتفكرها مجنونة ولما سألت ابوها على اللى بيحصل فيها ده لقيته بيقولي:

- سيبيها مدام ما اذيتش حد يبقى بتتكلم معاهم عادي.

اتعودت عليها كده، بتتكلم لواحدها من غير ما اعرف بتقول ايه، سهر بقيت تخاف تقرب من ايات وفى نفس الوقت صعبانة عليها، كانت سهر مبتقدرش تنام خايفة ان تحصل اي حاجة من ايات هي متلحقش تمنعها عنها، وفعلا كانت تفتح عنيها لو جربت تغمضها وتلاقي ايات قاعدة قصادها على السرير تحت رجليها بتلمس جسمها وعنيها كلها سودة وعلى وشها ضحكة مخيفة، تقوم تصرخ من الرعب ومجرد ما تولع النور تلاقي ايات اختفيت من قدامها، تقوم سهر تلاقي جسمها كله علامات لحد ما اخدتها وروحت بيها عند دكتورة نسا وعرفت انها الحمد لله لسه بنت بنوت، وخلصت الدكتورة وانا بحمد ربنا وطلعت على شيخ جامع محترم واتكلمت معاه فى كل اللى بيحصل لقيته قاللي:

- عُقاب ده مش هيسيب جسم بنتك ايات، هي فرصته الوحيدة للوصول لغايته ووجوده معانا، ودي ربنا يعينها على اللى هي فيه لأنه مش هيسمحلها تقرب يوم واحد من ربنا لأنها بكده هتبقى بتحرقه وده اللى مش هيسمح بيه الا لو خلص عليها وخسرتوها للأبد، لكن بالنسبة ليكي أنتي فاهو عاشقك، خير انه لسه مقدرش يعاشرك لأن أختك من جواها بتحاول تقاومه فى انه يأذيكي، وده بيعذبها، لكن انتي فرصتك اقوى منها فى حاجات كتير...واهمها انك تقدري تقربي من ربنا اكتر وبكده هتبقى بتحصني نفسك منه، اما التانية فطول ما هو بيستخدمها كممر بس لعالمنا يبقى مش هيفكر فى انه يعاشرها، الحل الوحيد ليها انها تتجوز، ويكون حد مالهوش علاقة بالعالم بتاعهم، لو انتي يابنتي اتجوزتي قبلها مش هيبعد عنك بالعكس ممكن يحرقها انتقام منك، لكن بتحصينك وجوازها من راجل يعرف ربنا هيكون هو حصن ليها، وده هيعمل حاجز بينكم وبينه...لكن المهم تبعدوا عن ابوكم لأن وجوده بيقوي حضور عُقاب وعلشان كده لازم تبعدوا عنه علشان تقدروا تضعفوا قدرته فى السيطرة على البنت الممسوسة.

رابط المقال / https://www.7kayatuna.com/2023/04/blog-post_63.html

عُقاب شمهورش الفصل السابع