#روايه_زين
الحلقه التاسعه
#بقلم_سحر_فرج
دكتور حسام انتبه لخبط الباب وقال اتفضل ..
وابتسم اول لما شاف زين وكمان معاه عمر وبص لي ليل وقال : وادى اللى خبطك يا ستى لو عاوزة تعاتبيه انه انقذ حياتك وجابك المستشفى وكان المفروض يمشى ويسيبك وانتى بين الحياه والموت عاتبيه براحتك بقى اتفضلى ....
زين أستغرب جدا من كلام حسام أول لما دخل فبصله!! وبص لى ليل وحس بشىء غريب أوى معرفش أيه هو وقال : مساء الخير وأبتسم وعيونه ركزت أوى على ليل وعلى الحزن اللى واضح في عيونها ودموعها اللى نازله وخاف لاتكون تعبانه أو بتتألم
فقال : مساء الخير وحمد الله على سلامتك وأنا آسف على كل اللى حصل .. ويارب تكونى بخير دلوقتى .. أحب أعرفك بنفسى أنا زين الجبالى وده اخويا عمر .
وجينا علشان نطمن عليكى بعد العمليه .
ليل عيونها جت فى عيونه بكل وجع وألم ومدت ايديها ومسحت دموعها اللى كانت نازله وقالت : الله يسلمك أنا كويسه الحمد لله. وأنا اللى أسفه على اللى حصل منى أنت ملكش أى ذنب بس!! ياريتك ما انقذتنى وكنت سيبتى أموت واستريح😔
زين باستغراب وعلامه استفهام كبيرة بص لحسام أوى وكأنه بيقوله فى ايه؟! وعيونه ركزت تانى مع ليل وقال : أسفه على أيه بس يا انسه ....... ؟ وليه بتقولى كده .. مهما الواحد بيعدى عليه مشاكل طول الوقت لازم يتحمل ويصبر ويبقى عنده ثقه فى الله ويحاول يقاوم وما يستسلمش كده ويضيع حياته فى لحظه لأن مفيش أى حاجه مستاهله ابدأ إنى أخسر روحى علشان أى حاجه تزعلنى .
حسام رد وقال : قولها يا زين قولها .
ياما بنقابل مشاكل كتير وبندعى ربنا أنه يحلها المهم نعمل اللى علينا ونتحمل ونرضى بالمكتوب ونصبر ونسيبها على ربنا .
ليل اتنهدت جامد وقالت : للأسف يا دكتور حسام ساعات كتير الدنيا بتقفل أبوابها فى وشك وتاخد منك أقرب الناس اليك فى لحظه وبعدها بتقابل مشاكل كتير فوق طاقتك وتحس ساعتها أد إيه أنت وحيد ومش قادر تقاوم اى شىء .. على العموم يا أستاذ زين أنا السبب فى الحادثه دى، أنا اللى مكنتش مركزه خالص للطريق وللعربيات .
فجاه وقبل ما ليل تكمل كلامها جت ممرضه وطلبت من حسام انه ينزل للطوارىء حالا علشان فى حاله حرجه .. فشكر الممرضه وبص للكل وقال : اعذرونى يا جماعه لازم أنزل للطوارىء حالا زى ما سمعتوا، فاستأذن حسام من عمر ومن زين وكمان ليل وسابهم وخرج من الاوضه .
عمر أخيرا أتكلم وحاول يخفف حاله الحزن والوجع اللى موجوده دى فقرب من ليل وأبتسم ومد أيده وقال بسرعه : أنا عمر الجبالى وتحت أمرك فى أى شىء والف سلامه عليكى ولو محتاجه أى حاجه أنا موجود .
اعتبرينى زى اخوكى الصغير بالضبط 😉 والمرة الجايه وأنتى بتعدى الطريق أبقى خلى بالك يا جميل .
زين استغرب من كلام عمر السريع ده وبصله وقال 🤨 بشويش عليها يا بنى آدم أنت كل ده كلام ورا بعضه؟ أهدى شويه يا عم انت!! أنت داخل مسابقه ولا إيه فى الرغى متنساش أنها تعبانه ومحتاجه الهدوء والراحه مش الرغى ده كله يا رغاى أنت 🤨
عمر بص لى ليل وقال : بزمتك يرضيكى الكلام ده أنا رغاى يا انسه ليل؟ عجبك اللى أخويا زين بيقوله ده طيب أنا هاسكت خالص اتفضل حضرتك اتكلم بهدوء يا استاذ زين 🙄
ليل غصب عنها ابتسمت وبصت لعمر وقالت : الصراحه أنت اتكلمت كتير اوى وبسرعه ومفهمتش معظم كلامك 😐
زين أبتسم على ابتسامتها الرقيقه والبريئه اللى هى ابتسمتها وعيونه جت على عمر وقال : أيه رأيك أهى قالتلك اهى مفهمتش أى حاجه من كلامك نقطنا بسكاتك بقى احسن والتزم الصمت .
عمر : أشطى أنا هاسكت خالص اهوووو😶 حتى لو طلبتم منى إنى أتكلم مش هارد عليكم، وانتى بالذات يا ست ليل بكرة تيجى وتتحايلى عليا وتطلبى منى إن أتكلم معاكى وساعتها ولا هاعبرك 🙄
ليل ضحكت لاول مرة من سنين طويله من قلبها لدرجه أنها وهى بتضحك اتألمت من الجروح اللى ماليه معظم جسمها وبصت لعمر وقالت أنت مضحك جدا على فكرة .
عمر بصلها 🤨 مش هارد عليكى
زين بص لى ليل وقال : المهم سيبك من الواد عمر ده وقوليلى لو محتاجه أى حاجه أنا موجود أهو بلغينى..ولو عاوزة تتصلى باهلك وتبلغيهم بكل اللى حصل تليفوناتى تحت أمرك وأنا مستعد أبعت عمر بنفسه بالعربيه ويجبهم لحد هنا علشان ميتعبوش نفسهم فى الطريق .
ليل بحزن تانى ردت وقالت : متشكرة جدا ليكم وشكرا لحد كده تعبتكم كلكم معايا .
زين استغرب ردها فقال : متقوليش كده أنتى تعبانه وزى ما أنا شايف إنك لوحدك ومحدش من أهلك عرف باللى حصل معاكى لحد دلوقتى ولازم تطمنيهم عليكى.
ليل : أن شاء الله يا استاذ زين 😔 وشكرا لأهتمامك .
زين ابتسم وبص لعمر كأنه بيقوله أستعد و يالا بينا وبعدها بص لى ليل ومد أيده فى الجاكيت بتاعه وطلع كارت من بتوعه
وقال : دى كل ارقامى يا انسه ليل أنا هاستأذن دلوقتى علشان أسيبك ترتاحى ولو عزتى أى شىء اتصلى بيا على طول أو بلغى الممرضه أو الدكتور حسام وهو هايتصرف على طول ويتصل بيا .
ليل كانت بدأت تحس بالم رهيب ووجع وظهر على ملامح وشها وده اللى لاحظه زين فقرب منها وقال : انتى كويسه؟!
ليل بألم مقدرتش تستحمله بدأت تتوجع جامد وغصب عنها ااااااااااه .. اااه مش قادرة مش قادرة 😥
جرى عليها عمر هو وزين بسرعه وحاولوا يعرفوا منها فى إيه بالضبط وأيه اللى بيألمها بالمنظر ده وهى للأسف مقدرتش ترد من شده الوجع .
زين بسرعه بص لاخوه عمر وقال : بسرعه انده الممرضه أو دكتور حسام من بره بسرعه يا عمر .
وفعلا عمر خرج بسرعه من الاوضه وزين قرب من ليل وقال : ارجوكى أهدى واستحملى يا انسه ليل وقوليلى حاسه بأيه بالضبط!! حسام هايجى حالااااا ارجوكى استحملى .
ليل بوجع وبدموع ردت وقالت : مش قادرة مش قادرة ااااه ألم فظيع فى كتفى ااااه .
سيبونى أمووت سيبونى اموووت .
ليه انقذتنى لييييييه؟
تعالالى يا بابااااااا تعالالى يا باباااااااا وخدنى معاك علشان استريح .
تلت دقايق بالضبط ووصل حسام بسرعه ومعاه الممرضه بتاعته ودخل اوضه ليل وقرب منها وشافها بتتألم جدا من شده الوجع فاطلب من زين وعمر يستنوا بره ويقفلوا الباب وراهم .. وفعلا خرج زين وعمر وقفلوا الباب وراهم وبدأ حسام يسأل ليل وقال .. خير يا انسه ليل حاسه بأيه بالضبط وفين بالتحديد شاوريلى عليه .
ليل بكل وجع وألم بصت للدكتور حسام وقالت .. مش قادرة يا دكتور حسام حاسه بوجع رهيب فى كتفى الشمال لدرجه إنى مش قادره اتنفس من كتر الألم .. ارجوك يا دكتور ادينى اى مسكن ااااااه مش قادرة .
حسام بدأ يهديها وبدأ يكشف عليها فى الجزء اللى بيألمها وبعد ما خلص كشفه طلب من الممرضه انها تديها حقنه مسكنه فى المحلول وده هايوقف الألم اللى هى حاسه بيه ده وكمان هايخليها تنام شويه .
ليل بصت بكل وجع لحسام وقالت بألم .. خير يا دكتور أيه سبب الالم الفظيع ده اللى أنا حاسه بيه .
حسام رد وقال : يا ليل أنتى طالعه من حادثه كبيرة وده شىء متوقع جدا وعامل حسابه .. كل اللى أنا طالبه منك أنك تهدى خالص ومفعول الحقنه أول ما تخديها هايبدأ يهدى الألم والوجع ده خالص وأنا طلبت من الممرضه أنها تديكى حقنه شديده شويه وهاتستريحى بعدها على طول .
انا هانزل مكتبى دلوقتى ولو عزتى أى شىء منى اطلبى من الممرضه فورا وهاكون عندك على طول .
وفعلا الممرضه أدت لى ليل الحقنه فى المحلول وفضلت جنبها شويه لحد ما الحقنه بدأت تعمل مفعول وراحت ليل على طول فى النوم .
وأول ما الدكتور حسام فتح الباب وخرج شاف زين وعمر واقفين اودام الباب وعلى وشهم قلق وتوتر بسبب اللى حصل مع ليل .
زين قرب منه وبكل قلق سأل حسام وقال : طمنى يا حسام الانسه ليل مالها وأيه سبب الالم الرهيب اللى هى حست بيه ده؟
حسام رد وقال : اطمن يا زين ومتقلقش هى هاتبقى كويسه بعد الحقنة اللى هى خدتها دلوقتى وكل ده شىء متوقع وانا عامل حسابه بعد حادثه امبارح الكبيرة دى .
عمر بصله وقاله : يعنى مفيش حاجه تقلق يا دكتور حسام وكلها كام يوم وهاتبقى كويسه ولا انت شايف ايه ؟
حسام ابتسم ورد وقال : اطمن انت كمان يا عمر .. اسبوع بالكتير وهاتبقى احسن من الاول وهاتبقى زى الحصان المهم نفسيتها لانها اهم شىء واهم من العلاج نفسه اللى هى هاتخده .. خدوا بعضكم وروحوا على الفيلا دلوقتى وقفتكم ملهاش اى لازمه اطلاقا .. هى خدت حقنه شديده وهتنام لحد بكرة الضهر .
زين اطمن شويه وأبتسم وبص لحسام وقال : انا مش عارف أشكرك ازاى يا حسام بتعبك معايا دايما، ومش دلوقتى بس لاااا من ساعه ما كنت واقف نفس الوقفه دى معايا زمان و هنا فى نفس المكان ونفس المستشفى،
ولولا وقفتك ومساندتك جنبى ساعتها انا مش عارف كان هايبقى مصيرى أيه ومش عارف من غيرك كنت عملت ايه، ربنا ما يحرمنى منك وكمان كان ممكن الانسه ليل تبلغ الشرطه .
عمر ضحك وقال : فعلا حسام وقف معانا كتير كتر خير .. ومن ناحيه ليل وانها تبلغ الشرطه عندك حق يا زين كنا زمانا دلوقتى فى
(س و ج) وكان زمان أسامينا على كل القنوات وكمان السوشيل ميديا .
حسام ضحك وقال : يا جماعه أنا معملتش أى شىء تشكرونى عليه ده شغلى يا زين ولا أنت ناسى إنى دكتور .. وبعدين يا سيدى عد الجمايل من هنا ورايح 😂
زين ضحك ورد وقال : لا فاكر كويس أنك دكتور يا صاحبى المهم، سكت شويه كده وقال .. بس قولى الاول أيه حكايه ليل دى يا حسام أنا حاسس إن وراها موضوع كبير اوى؟واللى مستغربه جدا!! أيه اللى يجبها فى مكان زى ده باليل لوحدها وأيه كميه الحزن والألم اللى فى عيونها ده؟ وليه لحد دلوقتى محدش من أهلها جه ولا هى اتصلت بحد ليها علشان تطمنه عليها ليه كل ده يا حسام قولى؟!
حسام رد وقال : كل اللى أنت سألته ده أنا كمان سألته لنفسى واستغربت جدا وعرضت عليها أنها تكلم أهلها من موبيلى وتطمنهم بس هى ......
وقبل ما يكمل كلامه جت ممرضه وبلغته ان استشارى القلب عاوزه ضرورى فى مكتبه .
فرد عليها وقال بلغيه انى هاروحله فورا .
وبص لزين وقال : أنا لازم أمشى واسيبكم دلوقتى وأنتم كمان يالا روحوا ملهاش لازمه وقفتكم هنا ونكمل كلامنا بعدين .. وفعلا خدوا بعضهم هما التلاته وراحوا ناحيه الاسانسير وركبوا ونزل حسام الدور التانى اللى فيه قسم القلب والأوعية الدمويه، وهما كملوا فى الاسانسير للدور الارضى وخدوا بعضهم وخرجوا من المستشفى وراحوا على العربيه وركبوا ورجعوا على الفيلا .
_________________________________
وفى مكان تانى خالص فى أرقى أحياء القاهرة
وعلى فيلا كبيرة فخمه جدا تشبه القصر كان فيه يافته صغيرة على الباب مكتوب عليها "فيلا العاصى"
كان فى بودى جاردات واقفين بيحرسه البوابه الضخمه دى .. وعربيات كتير واقفه وخلف البوابه دى كان فيه جنينه كبيرة جدا مليانه اشجار كتير وانواع مختلفه من الزهور وحمام سباحه وعلى بعد حوالى 300 متر كان مبنى عالى من تلت ادوار وفى نصفه باب طويل عباره عن تحفه فنيه وواقف عليه بودى جاردات.
وفى إحدى غرف الفيلا كانت شاهى العاصى قاعده على سريرها بتقلب فى موبيلها .
وبدور على تويتر والفيس بوك عن اكونت بأسم زين الجبالى .
اللى كان شاغل كل تفكيرها الفترة الأخيرة دى وبالذات من ساعه ما طردها من المحاضرة بتاعته .
واللى بيعاملها بطريقه هى مش متعوده عليها من كل اللى حواليها .
كله بيقدم ليها دايما فروض الطاعه وكل اللى هى بتطلبه بينفذ ليها على طول .
شاهى كانت بنت وحيده ومدلعه وأبوها أكبر رجل أعمال فى مصر والشرق الاوسط ومعروف جدا جدا .
عايشه هى وباباها ومامتها جوا الفيلا دى واللى معظم وقتهم بيقضوه بره كلهم .
الأب مشغول دايما بشغله وبشركاته وسفرياته .. والام دايما مع أصحابها ومقضياها حفلات وخروجات ونادى معظم وقتها .
ولكده شاهى دايما حاسه بفراغ وبتحاول تشغل الفراغ ده بالفسح والسهر لوش الصبح مع اصحابها .
وكان صديقها الوحيد المقرب ليها عن أمها وأبوها واللى بتحكيله كل شىء يخصها كان عمها الصغير "يوسف الشريف"
باب اوضتها خبط وهى ماسكه الموبيل وبتقلب فيه وانتبهت لخبط الباب وقالت ادخل .
الشغاله ابتسمت وقربت منها وقالت : العشاء جاهز يا شاهى هانم تحبى أجيبه لحضرتك هنا ولا على السفره؟
شاهى من غير ما تلتفت للشغاله وكملت تقليب فى الموبيل قالت : مش عاوزة اتعشى اخرجى برة واقفلى الباب وراكى .
الشغاله من غير أى تعليق لفت نفسها ولسه هاتخرج من الاوضه شاهى اتعدلت وقامت وقفت وقالت : جهزيلى عصير توت
ونزليه تحت عند البسين وانا نازله وراكى على طول .
الشغاله بكل أدب : حاضر يا هانم .. تؤمرينى بحاجه تانيه؟
شاهى نفخت واتنهدت وهى بتقلب فى الموبيل وقالت : لااااا روحى انتى .
وفعلا نزلت الشغاله ورجعت شاهى قعدت على طرف السرير وبتكلم نفسها وبتقول : ازاى شخص زى ده وفى مكانه ده وملوش أى أكونت على أى تطبيق من التطبيقات دى كلها .
غريبه اوى .
ده انا ملقتش غير صفحه كبيرة جدا تخص اسم شركته واكيد بدام مش ليه اى اكونت حد غيره هايبقى مسؤول عنها من الموظفين .
🤔
بس هاتروح منى فين يا زين يا جبالى؟ أنا هافضل وراك و هاعرفك مين هى شاهى العاصى وقامت وقفت ورمت الموبيل علي السرير وراحت وقفت اودام دولبها وطلعت المايوه الخاص بيها اللى كان عبارة عن قطعتين وغيرت لبسها ولبسته ورفعت شعرها بتوكه لفوق ونزلت على تحت
عند حمام السباحه وفى لحظه كانت ناطه فيه .
_______________________________
وفى اسكندريه وبالتحديد فى جنينه القصر
كانت سميحه أم زين وسماح اختها قاعدين وبيتكلموا فى حاجات كتير من ضمنها الحفله اللى هايعملوها خلال أيام بمناسبه عيد ميلاد زين بالقاهرة زى ما اتعوده كل سنه يعملوها رغم عدم موافقه زين عليها.
سميحه بصت لاختها وقالت : اومال شاهندا راحت فين مش باينه بقالها كام ساعه يعنى من ساعه ما اتغدينا يا سماح ؟
سماح باستغراب ردت وقالت : انتى نسيتى ولا إيه يا سميحه مش شوشو قالت إنها هاتخرج تقابل صاحبتها ويلفوا مع بعض يشتروا شويه حاجات بالعربيه، وأنا متأكده أنها رايحه تشوف هديه لزين علشان عيد ميلاده .
بس عملت نفسى مش عارفه حاجه علشان محرجهاش .
سميحه اتنهدت وبصت لاختها وقالت : انا مش عارفه بس الواد ده هايفرحنى امتى بجوازه هو وشاهندا ويحس ويقدر حب شاهندا ليه؟ بس ياما قولتلك يا سماح اتكلم معاه واعرفه حقيقه مشاعر شاهندا ناحيته وانتى رفضتى ده وقولتى خليه يعرف ويحس بنفسه من غير ما ندخل بينهم .
قال أيه علشان يكون واخدها بقرار منه هو مش مجرد ضغط منى أنا علشان ياخدها .
سماح : فعلا هو ده اللى المفروض يحصل يا سميحه انتى مفكرة إنى لما أشوف بنتى دايما اودامى حزينه ومكسورة وزين مش حاسس بيها أو حتى بيحاول ياخد باله منها ده شىء بيعجبنى بالعكس ده بيقتلنى وبيوجع قلبى عليها .
بس أرجع وأقول مسيره يعرف أد إيه هى بتحبه وبتتمناه من وهى لسه عيله صغيره .
ومش عوزاها تعيش اللى إحنا عشناه زمان أنا وأنتى.
سميحه بحزن : عندك حق يا حبيبتى وكفايه اللى حصل معانا زمان وأحنا صغيرين وبابا جوزنا غصب عننا من ناس منعرفهاش كانوا شركاءه فى شغل كتير يخصهم من غير ما ياخد رأينا فى أى شىء علشان ميحصلش معانا اللى حصل مع هدى أختنا .
واتنهدت أوى وبكل حزن قالت : فاكرة لما صحينا من النوم فى يوم من الايام ولقينا هدى خدت كل لبسها وهربت وسابت البيت وماما وقعت وأغمى عليها لما عرفت الخبر ده .
كانت صدمه كبيرة جدا عليها وعلينا وعلى بابا وفضلت على الحاله دى كام شهر لحد ما ماتت .
وبابا من بعد هروب هدى وهو منعنا أننا نخرج من البيت نهائى أو حتى نرجع ونكمل دراستنا.
سماح بحزن : ياااااااه يا سميحه .. رغم كل السنين اللى عدت دى وعمرى ما قدرت أنسى اليوم ده خالص وكأنه حصل إمبارح .
وافظع يوم عمرى ما قدرت انساه فى حياتى ابدأ بعد هروب هدى بيومين لما حد إتصل على بابا على تليفون البيت وبلغه انهم لقيوا شنطه على شط البحر وفيها جواب ولبس لهدى ومكتوب فيه أنها فضلت الموت عن الحياه .
ورغم صدمه بابا من الخبر ده خرج بسرعه لوحده من غير ما ياخد أى حد فينا أو يقولنا أنه كدب وخرج وهو مصدوم وحزين رغم غضبه منها بسبب هروبها وفضلنا كلنا مصدومين ومرعوبين ومش مبطلين عياط وبندعى ربنا إن الخبر ده يكون غلط وأن هدى تكون لسه على قيد الحياه .
سميحه بحزن : يااااااه يا سماح
انا اليوم ده عمرى ما قدرت انساه ابدا .. اليوم ده حول حياتنا كلها لسواد وحزن كبير .
هدى فضلت أنها تموت لمجرد أن بابا رفض الشخص اللى قلبها حبه وأختاره .
بحجه أنه فقير ومعندوش أهل ولا عزوة يليقوه بيه وبماكنته فى المجتمع وسمعته بين معارفه واهله .
ياااااه يا سماح انا لو اقدر اقولك هما كانوا بيحبوا بعض أد إيه .
كانت دايما بتحكيلى أنا كل حاجه بينهم لأنى كنت أقرب ليها عنك، وكانت بتخاف تحكى اودامك أى شىء لا تقولى لماما أو بابا زى عاويدك زمان و.........لسه هاتكمل كلامها ويكملوا حكايه هدى واللى حصل معاها زمان شاهندا كانت وصلت بعربيتها وركنت العربيه وطلعت كام شنطه فى ايديها وراحت وسلمت عليهم وهى مبتسمه .
شاهندا بابتسامه جميله بصت لهم وقالت : مساء الخير يا حلوين أنتم لسه سهرانين ليه لحد دلوقتى .
سماح حاولت تغير ملامح الحزن اللى على وشها وابتسمت وقالت : هو أنا أقدر أنام أو يجيلى نوم من غير ما أطمن على أمورتى الحلوة أنها رجعت بالسلامه .
مع إنى قولتلك متتأخريش أو خدى السواق معاكى علشان أطمن بس أنتى مردتيش .
شاهندا باستغراب : يا سلام يا ست موحه ده على أساس إنى لسه صغيرة وهاتخطف وأنا لوحدى ولا ايه؟ وبصت لخالتها سميحه وقالت : ما تقولى حاجه يا خالتوا لأختك هو أنا صغيرة ولا إيه علشان تخاف عليا بالمنظر ده؟
سميحه بحب : يا حبيبتى هى قلقانه عليكى وبتخاف عليكى مش اكتر وبعدين فين الصغيرة دى أنا اودامى ست البنات كلها عروسه زى القمر وفعلا نخاف عليها .
شاهندا رفعت حاجب ونزلت حاجب وقالت لااااا أنا طالعه اوضتى علشان مش هاخلص منكم أنتم الاتنين يالااا تصبحوا على خير .
وفعلا خدت بعضها وطلعت على اوضتها وبعدها على طول طلعت سميحه وسماح كل واحده على اوضتها بعد ما أطمنوا على شاهندا أنها وصلت بالسلامه .
_________________________________
وفى سرايه الحاج صفوان فى قلب الصعيد كان الشباب كلهم متجمعين فى جنيه السرايه سهرانين مع بعض بعد ما اتعشوا واطمنوا ان الحاج صفوان والحاجه انعام ناموا واباهتهم وامهاتهم كمان فقرروا انهم يكملوا باقى سهرتهم فى الجنينه .
وبظروفها كان مقضى اليوم ده معاهم سليم ابن عمتهم نعمه الله يرحمها هو ومراته الدكتورة ضحى .
كل واحد فيهم كان قاعد جنب مراته
قصى وفرح جنب بعض و عدى وهدى وفارس وسلمى وفهد وملك وكلهم كانوا حوامل وعلى آخرهم لانهم فى شهورهم الأخيرة الا هدى وملك كانوا متأخرين عنهم بحوالى شهرين .
عدى برخامه بصلهم وقال : أنا مش عارف بس إحنا قولنا وقررنا أنها هاتكون سهرة رجالى أنتم أيه اللى حشركم فى وسطنا كده زى الغرة وكابسين على نفسنا يا هوانم؟
هدى مراته وبتكون بنت عمته واخت سليم زغدته فى كتفه وقالت : يا سلام يا اخويا بقى إحنا زى الغرة ولازقين فيكم يا عدى وبصت للبنات وقالت سامعين يا بنات الواد ده بيقول علينا ايه؟
فهد برخامه هو كمان بصلهم واحده واحده وقال🤨فعلا يا هدى عدى جوزك عنده حق .. إحنا كنا عاوزين السهرة للشباب بس .. الجنينه كبيرة اهى ما تروحوا تقعدوا وتتجمعوا بعيد عننا شويه فى أى ركن حبكت يعنى تلزقوا جنبنا بالمنظر ده .
قصى بصلهم وقال : جرى أيه يا عم أنت وهو خفوا شويه على البنات هما عملوا أيه يعنى وبعدين حد يطول يقعد جنب مراته حبيبته أم عياله إن شاء الله فى جو رومانسى زى ده .
سليم أبتسم وقال : قولهم يا قصى قولهم اصل العيال دى غاويه الصرمحه والسهر لوحدهم لوش الفجر أنا مش عارف هايعقلوا أمتى ويحمدوا ربنا على النعمه اللى فى ايديهم .
عدى بعصبيه بصلهم وقال : نعم يا حبيبى انت وهو انتم هاتعملوها عليا طيب هما وهبل وهايكلوها لكن انا لا انا عدى 😉 ده انتم زمانكم قاعدين جنبهم ومش طاقينهم اصلا .
فارس بصدمه لااااا اتكلم على نفسك ياض انت وهو واعقلوا كده انتم الاتنين ده كلها كام شهر وهاتبقوا ابهات .
عدى بتحدى بصله وقال : ولو معقلناش أيه اللى هايحصل يعنى يا استاذ فارس؟
فارس بتحدى ووعيد عيونه جت على قصى وعلى سليم اللى فهمه على طول هو بيفكر فى إيه وبص فى الآخر على عدى وفهد وقال إحنا هانقولك حالا هانعمل أيه .. والله زمان يا عدى أنت وفهد وأنتم اللى هاتجيبوه لنفسكم أنتم الإتنين .
ولسه هايقوم ويقف هو وسليم وقصى .. بس عدى وفهد حسوا أنهم اتفقوا عليهم وقاموا بسرعه وجريوا من اودامهم .
قصى كان أسرع وجرى وراهم وبعده فارس وسليم وفضلوا يجروا ورا بعض كلهم والبنات ميته من كتر الضحك على منظرهم .
عدى : يا لهوووووى الحق ياد يا فهد دول بيجروا ورانا بجد هانهبب أيه قولى .
فهد بينهج من كتر الجرى فى الجنينه الكبيرة بتاعه السرايه وفضل يجرى وعدى معاه وقاله مش عارف يا ابوا لسان طويل قولى هانعمل أيه ومنظرهم كده ناوين على نيه سودا .
عدى بكل خوف : يااا لهووووى .. يا خرابى .. يا وقعتك السودا يا عدى يا إبن ام عدى عااااااااا الحقينى يا أمااااا.
البنات كانت ميته من الضحك وقاموا وقفوا كلهم وراحوا وراهم علشان يشوفوا أخرتها أيه معاهم لحد ما وصلوا عند حمام السباحه وقعدوا يتفرجوا عليهم من بعيد لبعيد وهما بيلفوا الجنينه زى التراك ورا بعض .
لحد ما فجأه قصى وسليم استخبوا بسرعه ورا نخله كبيرة عند حمام السباحه والبنات شافوهم ومحاولوش يظهروا كده علشان فهد وعدى يقعوا فى الكمين اللى هما عملينه .
عدى هو وفهد كانوا لسه بيجروا وشافوا ان فارس وقف فجاه وقعد يستريح على الارض من كتر الجرى اللى بيجريه وراهم وان قصى وسليم اختفوا هما كمان فتوقعوا انهم قعدوا هما كمان فى فى أى حته يستريحوا .. فهدوا الجرى خالص وفضلوا ينهجوا وقربوا ناحيه البنات لما شافوهم عند حمام السباحه وكأنهم هما اللى فازوا .
ولسه هايقربوا منهم ويقعدوا ياخدوا نفسهم جرى بسرعه سليم وقصى ومسكوا عدى قبل ما يجرى ولسه هايجروا على فهد هو كمان قام من خوفه منهم جرى وللاسف اتزحلق ووقع فى حمام السباحه .
عدى بصوت عالى جدا : عاااااااا سيبونى سيبونى يا خمامين مش هالعب معاكم تانى
يا لههههوى .. يا لهووى يا خسارتك يا عدى يا ابن ام عدى .. عااااااا
الكل عمال بيضحك عليه وعلى كلامه وفجاه شالوه هيلا بيلا هما الاتنين وحدفوه فى حمام السباحه مع فهد .
وفجاه سمعوا شباك اتفتح واترزع وسمعوا صوت الحاج صفوان من شباك اوضه نومه بيزعق وهو بيقول : انت يا بهيم يا اللى اسمك عدى اخرس وروح اتخمد احسنلك .. اقسم بالله لو نزلتلك يا حمار أنت وهو لا هابيتكم زى زمان فى الزريبه مع البهايم قبر يلمك منك ليه 😡😠😡
_________________________________
وفى بيت سعاد اللى كانت سهرانه هى وعيالها بيتفرجوا على التلفزيون فجأه سمعت خبط على الباب بشويش وده اللى خلاها تستغرب وتخاف .. فقامت وراحت ناحيه الباب وبصوت كله خوف قالت : ميييين ميين بيخبط؟
حسان من بره رد وقال : انا يا سعاد يا اختى افتحى، افتحى بسرعه .
اطمنت سعاد وخدت نفسها وفتحت بسرعه لحسان اخوها واول لما فتحت شافته واقف اودام الباب وحالته غريبه ومبهدله.
سهاد ابتسمت وقالت : اهلا يا حسان فينك يا ابنى اليومين دول، ولا انت خوفت و اختفيت علشان المضروبه اللى اسمها ليل واللى عملته معاها ؟؟
حسان ذقها ودخل وقفل الباب وراه وقال : يا اختى اوعى دخلينى الاول واقفلى الباب بدل ما حد يسمعنا ونبقى نتكلم جوا وتسألى براحتك، اه اختفيت علشان اللى ما تتسمى اللى اسمها ليل قولت لا تكون راحت للى اسمه الاسطى حسن ده وبلغت عنى علشان اللى عملته، وفضلت اراقب البيت من بعيد بقالى يومين واتاكدت انها معملتش كده .. فقولت أرجع وأعرف منك الأخبار لأن موبيلى الظاهر وقع منى ومش عارف وقع منى فين بالضبط .
سعاد ردت وقالت : تعال أقعد الأول واستريح وخدلك دوش وغير لبسك ده لما احضرلك لقمه تاكلها شكلك ميت من الجوع وبعدين احكيلك على كل اللى حصل .
حسان بخوف : لااااا أستريح إيه وأكل إيه أنا مش مطمن من البت دى هى واللى إسمه حسن الزفت ده، قوليلى بس حد جه حد اتصل عرفتى حاجه عنها قولى أى حاجه علشان آخد بعضى وامشى .
سعاد باستغراب : يا ابنى أهدى وأقعد وأطمن مفيش أى حاجه حصلت لده كله .. وبعدين أنت كنت عملت أيه يعنى لده كله وأيه الدليل على اللى أنت عملته معاها حتى لو عملت . وليه ما تقولش أنها هى اللى اتحرشت بيك وكانت بتغريك وبتتدلع وبتتمايس معاك وانت اللى مردتش علشان خاطر العيش والملح والعشرة اللى بينكم وعلشان خاطر ابوها .
يا حسان يا أخويا أقلب عليها التربيزة أنت قبل ما هى تقلبها عليك وتوديك فى داهيه
.. دى حتة بت ولا راحت ولا جت وملهاش أهل خالص تتحامى فيهم .
وبعدين لو اتزنقت أوى اتجوزها .. مش أنت عاوز كده يا روميووو .
حسان اتنهد وابتسم بخبث وقال .. معقوله الموضوع سهل كده وانا اللى من خوفى كبرته .. معقول بعد ده كله فى الاخر توافق انى اتجوزها .. وجز على شفايفه وقال .. يااااااه ده انا هابقى اسعد انسان فى الكوووووون كله .
وفجاه سمعوا رزع جامد على الباب لدرجه ان العيال اترعبت هى وسعاد وحسان من شده الخبط 😲
يا ترى فى ايه وايه اللى حصل .. ومين بيخبط بالمنظر والطريقه دى .
تواقعتكم ايه ؟؟؟
حلقه كبيرة اهى اول مرة اكتبها .
ياريت تفرحونى بتواقعتكم وبتعليقاتكم وليكاتكم الكتير ❤❤❤
ومش شايفه هبدات وتخيلات يعنى 🤔
#روايه_زين
## رواية زِيِنِ
#بقلمى_سحر_فرج
#بقلمى_سحر_فرج
الناشر / موقع حكايتنا للنشر الالكتروني
حمل الان / تطبيق حكايتنا للنشر الالكتروني واستمتع بقراءة جميع الروايات الجديده والحصريه